رتبها

اليوم الجمعه 9 يوليو 2021
أصدقائي الأعزاء ..
هتكلم معاكم النهاردة عن موضوع مهم وهو ..
إدارة الغضب
و هعرض علي حضراتكم أول وأهم خطوتين في إدارة الغضب وهما كالتالي :

1. تغيروا عن شكلكم بتجديد أذهانكم : رحلة التغيير تبدأ من الداخل وعلشان تغير أي سلوك خارجي عليك وعلي أفكارك ( العالم الداخلي بتاعك ) ، شوف نفسك بتكلم نفسك إزاي ؟

بمعني راقب أفكارك وكلماتك اللي بتكلم بيها نفسك وابدأ بتغيير الكلمات اللي حضرتك بتكلم بيها نفسك واللي بنسبة كبيرة هي كلمات غير إيجابية واللي بسببها مخك وعقلك اللاواعي بيتبرمج عليها ويصدقها ويدعمك فيها واستبدلها بكلمات إيجابية ....

يعني مثلا : غير كل الكلمات غير الإيجابية اللي بتقولها لنفسك زي ( أنا عصبي - أنا دمي حامي - أنا دمي بيفور بسرعة - أنا بغلي من جوايا - أنا عفاريت الدنيا بتتنطط في وشي - أنا مش شايف قدامي - أنا سهل أي حد يعصبني وينرفزني - أنا مش بقدر أتحكم في نفسي ... الخ )

وبدلها بكلمات إيجابية زي ( أنا هادئ - أنا أتحكم في انفعالاتي - أنا أمتلك ثبات انفعالي - أنا الفعل وليس رد الفعل - أنا + صفة إيجابية في صيغة المضارع المستمر )
طيب السؤال بقي : هل كدا أنا بكدب علي نفسي ؟
أحب أطمنك وأقولك لا يا سيدي مش بتكدب ولا حاجة

اللي بيحصل إنك لما تفضل تقول كدا لنفسك لغاية مخك ماهيتبرمج علي الكلمات الجديدة وبالتالي مشاعرك هتتغير وبالتبعية سلوكياتك ونتائجك هتتغير للأفضل بإذن الله وبالمناسبة يعني لازم الأفكار يصاحبها Action أو سلوك يدعم الفكرة الجديدة وإلا مش هيحصل تغيير ...

وبالمناسبة دا مش هيكون في يوم وليلة يعني أقصاها شهر لو في استمرارية في التعزيز الإيجابي
#تذكر إن الكلمات ليها قوة وطاقة وسحر كبير جداً فاستخدمها لصالحك طول الوقت

2. نبدأ بقي في الخطوة التانية نخرج شوية شوية للبيئة اللي عايشين فيها : طبيعي جداً إن الإنسان كائن اجتماعي وعايش وسط ناس ... فلو سمحت علي قد ما تقدر غير شكل البيئة اللي أنت عايش فيها علشان تتماشي مع الكلمات الإيجابية اللي بتقولها ...

#ملحوظة خد بالك أنت مش هتغير في طباع الناس ولا هتتحكم فيهم ... أنا أقصد غير اللي يخصك في البيئة اللي أنت عايش فيها ...

يعني مثلاً علي قد ما تقدر خلي بيتك أو أوضتك بالتحديد هي المكان الهادئ المفضل بالنسبة ليك، مكان منظم اتكلم فيه بصوت هادئ ومسموع بدون زعيق وإن أمكن يكون في موسيقي هادية شغالة تنام عليها وتصحي عليها ودا مش إعجاز وكلنا الحمد لله معانا موبايلات وعليها بدل الموسيقي والأغنية 10

فنقدر نختار موسيقي هادية تهدي الأعصاب
وافتكروا إنه علشان تبقي ناجح إلزق في الناجحين وبرضه علشان تبقي هادئ إلزق في الهاديين ومن جاور السعيد يسعد😂
* أخيراً وليس أخراً، مشوار الألف ميل بيبدأ بـ 10سم وهي أصغر خطوة لأصغر طفل بس المهم ابدأ بالقليل واستمر ... استمر ... استمر

* شجع نفسك بأي طريقة ( مادية أو معنوية ) علي أي تغيير إن شالله يكون تغيير بسيط بس التشجيع هيزود همتك ويحمسك إنك تكمل اللي بدأته

* استعد يا بطل واستعدي يا بطلة للمعوقات والتحديات اللي هتقابلك وتعطلك عن التغيير الإيجابي اللي عينك عليه،فهتلاقي البيئة المحيطة هتشدك تاني وتحاول إنها تتكاتف ضدك بس خليك ثابت ع موقفك واقع وقوم واصمد لغاية لما تحقق هدفك
" البطيء الغضب خير من الجبار ومالك روحه خير ممن يأخذ مدينة "

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد