السادات خرج الاسلامجية عشان يوازنوا اليساريين بعد احداث ٧٧ و ده توافق مع رغبة امريكا في انها تحول مصر لدولة تابعة باستخدام الدين (مخطط تم الاعلان عنه) بالتالي ابتدينا نشوف الحجاب بينتشر من غير تدين حقيقي، والتحرش والعادات الوسخة معاه، وطبعا تسمية الشركات بالشركة الاسلامية لكذا
و معاها طبعا التوحيد والنور و مليونيرات الدعوة و شيوخ الجاز، تقلص دور الازهر الى بوق للدعايات السلفية و تحول التدين الى دقن و عمامة وحجاب ونقاب والفتوى بقت من كل زاوية، والذوق انحدر والاخلاق راحت في داهية المهم التدين الظاهري، المهم يبقى "شكلك" مؤمن مش مهم اخلاقك
وطبعا توافق ده مع موجة اللي راجعين من الخليج بفلوس كتير و اخلاق الكفيل سواء كتحجيب البنات ولبس الجلاليب البيضا يوم الجمعة، وطبعا زيرو ذوق او فن او جمال، طلعلنا بقى ساعتها مناطق زي مدينة نصر والمهندسين مناطق عشوائية بيوتها مدهونة، تحتوي على زيرو تخطيط و مليانة قبح
في النهاية طبعا مبارك ماتعلمش الدرس بتاع السادات و فضل فاكر امريكا هتحميه وادينا شفنا النعاية، الحلقة اللخيرة من الصراع ده بتحصل دلوقتي على مستوى اجتماعي و ثقافي قبل مايكون سياسي، خناقات التحرش و حقوق المرأة ظاهرها مجتمع ذكوري لكن باطنها التخلص من المتعارف عليه اللي اتفرض
بقوة الفلوس شوية زي الفنانات المعتزلات او نجوم الاعلام زي محمد حسنين يعقوب او السيطرة الاقتصادية زي حسن مالك و خيرت الشاطر او مخطط الصفوة بتاع عمرو خالد و معز مسعود، الخناقة حاليا بتخلص و كان اكبر سلاح ضدها وياللعجب هو الاخوان نفسهم
طبعا فيه اسباب تانية زي ترييف المدينة اللي حصل نتيجة عدم تطوير الريف خلى القاهرة مليانة عشوائيات و ابتدى اهل الريف يهجروها عشان القاهرة افضل، وده برضه ساعد ف انتشار ظواهر تانية كتير من نوعية الناس اللي بتكسر الشقق عالناس اللي مستضيفين حد من الجنس الاخر وكدة
بس الخلاصة الشعب المصري تلقى ضربة في كل حاجة من اول القوى الناعمة لغاية دينه واخلاقه، واللي بيحصل دلوقتي ان الخناقة دي بتتلم وبترجع لاصلها المصري الطبيعي بتاع التدين من غير افراط ولا عادات بدوية ولا تشدد من غير داعي
المصري من الاول هو اللي اخترع التعايش والتدين والسلوك القويم من اول التاريخ اساسا،والطبع ده فينا و ده المقصود بشعب متدين بطبعه، لكن للاسف بقى احنا تخيلنا ان الناس دي هتعلمنا ديننا و حضارتنا اللي بقالها الاف السنين و قررنا نمشي وراهم
لما تبص على القواعد اللي كان المصري القديم كاتبها هتلاقيها اخلاق رفيعة جدا و محترمة و بتضمن ان المجتمع يمشي مظبوط من غير تشدد ولا تدخل زي اللي بيحصل النهاردة، الكلام ده مكاوب ف جيناتنا من زمان مش محتاجين حد ييجي يعلمهولنا، بس للاسف اتبذل فلوس ومجهود سنين كتير عشان ننسى
انا شايف كل اللي بيحصل دلوقتي ده هيرجعنا لاصلنا، مصريين متدينين و موحدين و ناس يتعلم منها العالم الحضارة، بس نبطل نعمل نفسنا ناس تانية و نقنع بفكرة اننا ده، مكوننا المصري اقوى من اي مكون عدى علينا ف تاريخنا، لسه فاضل عشرات السنين بس السكة صح لاول مرة من ٤٠ سنة
جاري تحميل الاقتراحات...