ثريد: رجاء كل المصريين يركزوا في اللي هقوله دا ويفهموه كويس جدا ، وطنكم في خطر مصر حبيبيتكم وهويتكم في خطر ، هتكلم عن الأفروسنتريزم زي ما بيسموها أو زي ما بسميها أنا المركزية السوداء وعلاقتها بسد النهضة، الكل يركز في كل كلمه هقولها ويمشي معايا للاخر بطلب من كل مصري واعي يركز.
ولأني بمشي معاكم واحدة واحدة هجيبلكم حاجة بسيطة ومثال حي الاول تتفرجوا عليه وبعدين هبدأ أشرحلكم دي تويتة أو تغريدة علي حسب لغة الاكونت او الحساب بتاعك لواحد مسمي نفسة إفريقي وكاتب إن النيل بتاعهم طبعا انت تبتسم وتفتكر انه يقصد ان النيل بتاع مصر كمان بقي بما إننا احنا كمان أفارقة
فيدخل شاب مصري أصيل يرد عليه الرد دا ، وبغض النظر عن المحتوي اللي هو كاتبة أنا مش هناقشه ولا هتكلم عنه مش قصتنا دلوقتي خالص ، المهم تابعوا بس الردود وهتفهموا قصدي للاخر.
فيدخل شخص حاطط علم جنوب إفريقيا يقوله لو الفراعنة رجعوا الحياة مش هيقفوا في صفكم كمصريين لأنهم مكانوش عرب ، فأقوم أنا اللي ظاهر في السكرين وكاتب اسمي بالخط الهيروغليفي داخل قايلة ان المصريين مش عرب فيقوم هو رادد عليا يقولي انتوا عرب مفيش حاجة إسمها مصريين.
فأرد أنا أقوله إن انا مصري فقط لا غير فيرد يقولي ان إحنا كلنا عارفين الأفارقة عاملين إزاي ، علي إعتبار إن المصريين عرب ومش مصريين أفارقة ومش أصحاب أرض مصر ، وإن الأفارقة هما سود البشرة بس ، المهم كملوا بس للاخر وهتفهموا حجم المؤامرة.
فانا هنا هرد عليه أقوله إن إفريقيا مش عرق بشري واحد ومش ملامح واشكال واحده والناس اللي عايشين فيها مهماش لونهم واحد ومهياش دولة واحدة ، إفريقيا فيها الفراعنة المصريين ، والأمازيغ والخ الخ والمصريين مهماش عرب وإفريقيا إتسمت إفريقيا بسببنا إحنا الشمال أفارقة (ودا كله تاريخيا صح)
المهم ان الحديث بيني وبينه كان عبارة إن هو بيسلخني من مصريتي وبيسميني عربي علشان ميبقاش ليا حقوق تاريخية في أرضي وفي مياه نهر النيل وفي أثاري وحضارتي وتاريخي وأنا برد عليه ردود منطقية وبالعلم والتاريخ ، كملوا الثريد بس للاخر وهتفهموا كل حاجة بالظبط.
الشخص إللي مسمي نفسه إفريقي دا بقي كاتب تويتة بيقول فيها ان النيل ملك الأفارقة وليس للعرب علي إعتبار إن المصريين الحاليين هم عرب وافدون وليسوا أصحاب أرض مصر ، ودي مش حقيقة إحنا المصريين أصحاب ارض مصر ومحناش عرب ومن هنا نبتدي نشرح بقي.
تعمل إثيوبيا علي نشر شعار "النيل للأفارقة" علي إعتبار من وجهة نظرهم ان الأفارقة هم فقط أصحاب البشرة السوداء وأن المصريين الحاليين ليسوا أفارقة بل عرب غرباء عن القاره ، بالرغم من اننا لسنا عرب وبالرغم أن إفريقيا سميت بهذا الاسم بسبب الشمال أفارقة إلا اننا ندفع ثمن العروبة الوهمية.
مبدأيا المصريين مش عرب لا قديما ولا حديثا وجغرافيا المصريين مش من ضمن الجزيرة العربية حتي ، ولا حتي بتتشارك معاهم لا جينيا ولا في سماتك وملامحك حتي ولا ثقافيا من ازياء وملابس وعادات ومأكولات حتي ، انت بس بتشترك معاهم في الدين والثقافه الاسلامية
المصريين شعب متميز ، ليه حضارته المصرية ولغته الخاصه اللي هي اللغة المصرية القديمة اللي اتكتبت بأربع خطوط ومرت بمراحل تطور وكتابة هيروغليفية وهيراطيقية وديموطيقية وقبطية (وقبطية هنا لا تعني مسيحية لأن المسيحية دي دين دخيل علي مصر تاريخيا زي الدين الاسلامي) المهم.
طيب ازاي إحنا بنتكلم عربي؟ بنتكلم عربي علشان مع دخول العرب لمصر ودخول المصريين في الإسلام الحمد لله ، صاحب الدخول دا تغيير اللغة فيما بعد ، القبطية إتغيرت للعربية عن طريق تعريب الدواوين وشوية إجراءات تم إتخاذها فبقينا بنتكلم العربي اللي إحنا بنتكلمة دا لكن إحنا مش عرب
يعني إيه يعني إحنا المصريين مش عرب؟ أيوه إحنا المصريين مش عرب إحنا أقباط ولغتنا في الأصل هي اللغة القبطية إللي متاخده من الكلمة اليونانية إيجيبتوس يعني قبطي معناها مصري وليس معناها مسيحي ، واخر مراحل تطور اللغة المصرية هي القبطية، ولكن الكلمة اتلزقت في المسيحيين لأسباب تاريخية
منها تمسكهم باللغة القبطية عن المصريين المسلمين وإلخ إلخ فالكلمة لزقت فيهم ، المهم دا إيه علاقتة بالموضوع وليه الناس دي بتقول كده؟ دا بقي كل العلاقة الحقيقة جمال عبد الناصر حديثا تبني القومية العربية ومحي إسم مصر تاريخيا وسمانا عرب وقال ان مصر بلد عربي وإلي ما اخره بقي
وكل دا لأسباب سياسية الحقيقة ، أسباب مالهاش علاقة بالتاريخ ولا بهويتنا المصرية ، إللي عمله عبد الناصر سلخ المصريين من هويتهم ، بدل ما عبد الناصر يبقي قومي مصري ، بقي قومي عربي ، اليهود كانوا أحيوا اللغة العبرية بتاعتهم واول حاكم مصري من أيام الفراعنة يمسك مصر مأحياش القبطية.
بل وروج للعروبة في الافلام والاعمال الدرامية علي الرغم اننا كمصريين محناش عرب اصلا ، زينا زي الاتراك مسلمين لكن مش عرب ، وزينا زي الفرس مسلمين لكن مش عرب وزينا زي الماليزيين مسلمين لكن مش عرب. ودا عمل خلط رهيب ودا حصل لأن ببساطة الفترة دي بتعكس ايدلوجيات عبد الناصر وأفكارة
اللي كانت مياله ومقتنعه بالقومية العربية إللي هي مش قوميتنا وأثبتت فشلها اصلا لأن ليس هكذا تبني الامم وليس هكذا تقام الاتحادات ، وجدير بالذكر ان ابو بكر الرازي مش عربي بل هو فارسي مسلم والخوارزمي مكنش عربي بردو والمصريين مهماش عرب.
الإتحاد الاوروبي عامل تحالفات وتكتلات سياسية واقتصادية وعسكرية وكل دولة محافظة علي خصوصيتها ولغتها القومية وقوميتها ، أما إللي بيحصل في الشرق الاوسط من تعميم القومية العربية علي جميع شعوب الشرق كأنها شبكة واي فاي كلنا هندخل فيها دا إسمه مهلبيه حرفيا ، كل دولة ليها قوميتها.
عبد الناصر بدل ما يتبني القومية المصرية ويعمل تكتلات عسكرية وتحالفات مع دول الشرق والعرب ، ويحيي اللغة المصرية بصفتة حاكم مصري ، تبني القومية العربية وبدل التحالفات عمل إتحادات بين دول بدل تحالفات ونتيجيتها كانت الفشل طبعا لأننا مش شعوب واحدة ومش قومية واحدة
نرجع بقي للأفروسنتريزم اللي معناها المركزية الافريقية ، ولكن الحقيقة انا هسميها المركزية السوداء فقط ، لأن هي قايمة علي مركزية أصحاب البشره السوداء فقط اللي بيعتبرونا إن إحنا كمصريين مش عرب ، الناس دي بتحاول تسرق حضارتنا وتنسبها ليهم وبيحاربونا بسد النهضة
مستغلين إننا مش متمسكين بهويتنا القومية والمصرية وبيقولوا اننا عرب واننا يجب طردنا من مصر أرضنا وإحلال أصحاب البشرة السوداء مكاننا ، وبيحاولوا يضربوا عمقنا التاريخي ويدعوا إن الفراعنة كانوا من أصحاب البشرة السوداء هوريلكم نماذج بس لسرقتهم لتاريخنا
ليه بيقولوا كده؟ وإزاي الأمر بدأ؟ كل دا هشرحه في ثريد تفصيلي قريب إن شاء الله لكن انا قلت أكتب حاجة سريعا جدا علشان بس المصريين يبقوا واخدين بالهم من إللي بيحصل حواليهم في العالم برا ، أوعدكم اني هكتب بشكل مفصل وتفصيلي عن الأمر ومدعم بمصادر ومرتب أكتر من كده.
إقروا الثريدات دي
لينا عمق تاريخي يا جماعة ، لو عمقك التاريخي ومصريتك إتضربت فانت كده فقدت حقك في أرضك ولغتك وتاريخك وحقوقك التاريخية في نهر النيل وكل حاجة حرفيا ، متعرفش نفسك غير بأنك مصري فقط لا غير.
إعذروني اني كتبت الموضوع كده بشكل سريع ، ولكني كتبتها كده من حسرتي وغضبي وحزني إن المصريين مش عارفين أصولهم وتاريخهم، وإن الناس من جميع أنحاء العالم بتعمل ضدنا مؤامرات والمصريين مش مدركين لحجم الخطر المهول إللي بيحيط ببلدهم واوعدكم هبقي أكتب عن الموضوع والقصة من الأول وبشكل مفصل.
"إن الفرعونية متأصلة فى نفوس المصريين وستظل كذلك بل ستقوى، وأن الأكثرية الساحقة من المصريين لا يمتون بصلة إلى الدم العربى بل يتصلون مباشرة بالمصريين القدماء" - طه حسين
بعتذر لو في لخبطة في الكتابة أو أي أخطاء وبعتذر ان الموضوع مش مفصل ، لكن انا فعلا كتبت وانا كلي حزن وحسرة إن المصريين مش متمسكين بهويتهم القومية المصرية ، وسايبينها كل من هب ودب يسرقها ويعمل بيها مؤامرات ضدنا حقيقي حقيقي حزين ، لكن أوعدكم إني هكتب بشكل مفصل إن شاء الله.
@Moh142198 لأن مصريتنا فقط لا غير هي اللي بتضمنلنا حقوقنا ، وإن إحنا نحيي الهوية واللغة المصرية القديمة خصوصا انهم بيتعلموا اللغة المصرية القديمة علشان يدعوا انهم مصريين أصليين وفيديوهاتهم موجوده عالنت بيدوا كورسات ، نتشرف بمتابعتك لنا ، هنا إحنا بنوعي المصريين بتاريخهم ومن خطر الموضوع دا.
حبيت أضيف دا رئيس الكونغو في الثانية ٥٨ ذكر قدام الرئيس السيسي ان هو هيزور الاهرامات مفخرة افريقيا اللي بناها اجدادنا المشتركين وان هما بيعتقدوا انهم جم من مصر وكلمة اجدادنا المشتركين دي ماهي الا مجاملة منه لينا لو عليه هيقولنا اطلعوا برا افريقيا، شاهد : youtu.be
@essam_saaed لو علي ادلة علمية تاريخية فممكن احط الف دليل حالاً ان قبطي يعني مصري وان آخر تطور للغه المصرية كان القبطية وان المصريين مش عرب وانهم تعرضوا لتعريب الدوواوين ووضحت اني هعمل كده ، لكن حضرتك متعرفش كل دا ، حضرتك شخص بيدعي العلم والمعرفه بمنتهي البساطة.
حبيت اضيف مصادر (١)
حبيت اضيف مصادر (٢)
حبيت اضيف مصادر (٣)
هذا الجهد موجه إلي شعب مصر العظيم ، في محاولة مني للدفاع عن حق المصريين في ارض مصر ضد هذه الدعوات العدائية والغير صحيحة علمياً وتاريخياً والتي تهدف الي سلخ المصريين من مصريتهم وتاريخهم وأرضهم وحقوقهم المائية في نهر النيل ، إسمي هو ساهر حسن وأنا حاصل علي ليسانس الآداب قسم التاريخ.
جاري تحميل الاقتراحات...