هذا الثريد خاص لليأسين والباحثين عن العمل وماجاتهم الوظيفة الي يحلمون فيها ، سواء حكومية أو خاصة أنا سبق وقلت أني خريجة درسات أسلامية وكنت أتوقع أني بتخرج وأتوظف معلمة دين على طول ، وبما أني دايم أفكر خارج الصندوق قلت لنفسي حنان حطي أبعد نقطه عن الرياض وتوكلي على الله .
جاء وقت القبول للوظايف التعليميه حنان واثقه أنها مقبولة الثقة عمياء الله يهديني ، الصدمة كانت قوية بعدم قبولي والاقوى من الصدمة الي يهونون عليك السالفة ويرددون أنتظري السنه الجاية فيه تقديم ماعليك ، وأنا كلي تعجب كيف اضيع سنة من عمري أنتظر تقديم السنة الجاية الي بعد ماهو مضمون 😳
مثلي مثل أي خريج مكسور سجلت بحافز فلوس وأنا نايمة ياسلام الله يعز الحكومة😂✋🏼بس أنا من داخلي مو مرتاحة لطريقة حياتي وقتها قررت أدخل اليوتيوب واتعلم شيء مفيد وأقدر أستفيد منه لكن كان المحتوى العربي قليل جداً والبحث صعب ولغتي الانجليزية مش ولابد ،ولا كان بحثت في الانجليزي
وبعد بحث مطول شفت أكثر من شخص يشرح ويتكلم عن التصميم ، دخلت وتعلمت 6 أشهر كاملة بين بحث وممارسة مافيه أحد يعطيك معلومة و محد يرد عليك ، كان حلم حياتي وقتها المصمم يرد علي ويجاوب على أسئلتي الي كانت بسيطة جداً بنسبة له وصعبة عندي لكن مالقيت اي تجاوب منهم🥺
( وهذا سبب يخليني أحاول ارد على أي سؤال يوصلني ) لي ان وقتها لو المصمم رد علي ممكن أختصرت الوقت لي اني جلست ادور على طريقة تحميل البرنامج اسبوعين لين قررت اروح مكتبة وانزل البرنامج ، صار عندي تحدي اكون ولا ما اكون ، والحمدالله نجحت في التحدي ✋🏼
أنا كتبت هذا الثريد عشان أوضح لك أمور . .الاول : انه الخيره فيما أختارها الله لك وبتكتشف هذي الخيرة بعدين ممكن لو أني أنقبلت في الوظيفة الي درست طول عمري لها ماحسيت في متعة العمل الي قاعده أحسها الان😍
الثاني : المعلومة في وقتنا هذا تقدم لك على طبق من ذهب عكس قبل سنوات ، الان الكل قاعد يقدم معلومات قيمة ومفيدة والمحتوى العربي تطور المصممين أكثر رحابة من قبل ، وفي كل المجالات تجد معلومات مجانية او مدفوعة المطلوب منك السعي فقط والاجتهاد والاستمرار
الثالث : الان العالم تغير وبقوة ومع ضرورة التعليم الجامعي الا أن التعليم الذاتي قد يجلب لك المال والوظيفة .
رابعا: صديقتي تخرجت معي بنفس السنة لازالت كل سنة تقدم على جدارة والى الان لم تقبل بالوظيفة التعليمة ، وهذا ليس تقليل منها هي أقرب لي من روحي . . لكن هي أختارت الانتظار
أتمنى أني قدرت أقدم لكم فائدة لو بسيطة بهذا الثريد ( هدفها أنت تصنع نفسك ) ♥️
جاري تحميل الاقتراحات...