مفيش أي مانع تكره أو تحب ميسي، هو مش نبي ولا رسول ولا حتى بيعمل حاجة مفيدة لحياة البشر غير إنه بيلعب كورة ممكن تحبها أو لا، لكن تناول أي موضوع بقشوره وبكل سطحية لأنك عايز تثبت شيء على هواك هو تدليس واضح.
ثريد عن حقائق مش كتير يعرفها: ليونيل ميسي، لا أملك إلا قدمي!
ثريد عن حقائق مش كتير يعرفها: ليونيل ميسي، لا أملك إلا قدمي!
بشكل عام، أسوء شيء ممكن الشخص يناقشه ويتكلم فيه هو واقع بيحصل من سنين بتفاصيل مش الكل يعرفها، مش لأن الواحد بيكون مطالب بتوضيح الأمور، لكن لأنه بيكون مطالب بكده لناس مش مستعدة أصلًا تفهم ايه اللي بيحصل وبتحكم بالحب والكُره،
المشكلة الأكبر إن ميسي بيتقال عليه فاشل مع الأرجنتين بمبررات من الخيال؛ مفيش مشكلة تقول إنه بيتوتر تحت الضغط الجماهيري مع المنتخب لو كان ده السبب فعلًا، أو إنه فاشل لأنه فشل في الفوز في 4 نهائيات في 5 سنين، رغم إنه السبب الأول في صعودهم للنهائيات دي ودي نقطة هنرجعلها تاني،
كل ده كان هيتم حسمه في صالح ميسي لو روميرو تصدى لتسديدة ماريو جوتزه في الشوط الرابع من نهائي كأس عالم 2014 مثلًا، أو لو هيجوايين سجل بعد ما ميسي حوله لإنفراد، 'تصدي وتسديدة' بعيدًا عن أي أمثلة أخرى لأن فيه تاني كتير كانوا هيحسموا جدل مستمر من أول يوم مثل فيه الأرجنتين من 15 سنة.
كل ده معروف، وهي دي المشكلة الأزلية في الجمهور، إنه بيشوف النتائج بس بدون الدخول في وجع دماغ زي التتفاصيل المنطقية خصوصًا لو الموضوع على هواه،
في مونديال 1986، الأرجنتين في ربع نهائي كأس العالم صعدت من إنجلترا بهدف بإيد مارادونا بعد ما إنجلترا خلاص كانت هتصعد، ومش هقولك لو فيه Var كانت إنجلترا صعدت فعلًا وأسطورة إن مارادونا أفضل من ميسي علشان حقق كأس العالم كانت هتنتهي، لا الموضوع أكبر من كده،
بعد الماتش مباشرةً مارادونا قال نصًا.. 'إنها كانت يد الإله التي سجلت الهدف وليس يدي'، في إستغلال واضح لشعب الأرجنتين اللي جسّد مارادونا في صورة إله فعلًا مش مجرد بطل شعب فقير ومقهور سياسيًا،
مارادونا نفسه بعد 30 سنة بقى إتكلم في تفاصيل الهدف ورد فعل اللاعبين، قال إنه مش نادم إنه سجل هدف بإيده، مش دي المشكلة، قال كمان إنه بعد الهدف واصل الجري للأمام علشان يحتفل ومحدش يشك في الهدف، إلا إن لاعب الوسط سيرخيو باتيستا جري وراه وقاله نصًا.. 'لقد أدخلتها بيدك، أليس كذلك؟
مارادونا رد عليه وقاله نصًا..'أغلق فمك القذر وإستمر في الاحتفال'. هنا التساؤل، هل ميسي لو كان في اللقطة دي كان هيتصرف نفس تصرف مارادونا؟
ليه السؤال ده؟ تعالى أحكيلك، خورخي فالدانو نجم منتخب الأرجنتين السابق بيقول إن فيه إختلاف في طبيعة نشأة مارادونا وميسي؛ مارادونا نشأ في حواري بوينس آريس الفقيرة، إتعلم الكورة في الشارع وشارك في الدوريات الشبابية البسيطة لما الكورة كانت عبارة عن 'حجر في جلد'،
الشارع الارجنتيني بيعلمك من صغرك ازاي تاخد حقك، بالبلدي كده، ازاي تستفز خصمك بأبسط الصور، ازاي تخترق أي نظام وقانون وازاي تستخدم العنف، ده كان واضح لما مارادونا بدأ عصره مع برشلونة بعد بوكا جونيورز بتعاطي المخدرات، أو إنه قرر يبدأ مسيرته مع فريق فقير من طبقته زي نابولي ويكون بطله
ميسي هو النقيض، ثقافة مختلفة، إتعلم الكورة في أكاديمية برشلونة، درس الكورة بنظام صارم، عنده مدرب بيلقنه التعليمات، سياج حديدي بيفصله عن الجمهور، مفيش سابقة إخترق فيها النظام زي مارادونا، علشان كده 36 بطولة لميسي مع برشلونة و 6 بالون دور لا يعنوا شيء طالما فشل في نظرهم مع المنتخب.
نرجع بقى لنقطة إن ميسي صعد 4 نهائيات في 5 سنين مع الأرجنتين، مش كتير يعرف إن ميسي هو هداف الارجنتين التاريخي وأكتر لاعب صنع أهداف في تاريخهم، بل إنه هداف الكوبا كمان، وده لأن محدش عايز يعرف ده أصلًا،
محدش يعرف كمان إن في مونديال 2014 الأرجنتين كلها سجلت 8 أهداف في البطولة، ميسي سجل منهم 4 وصنع 1، يعني ساهم في 5 أهداف من 8 ماتشات لوحده.
في مونديال 2018، كرواتيا سجلت 13 هدف، مودريتش سجل هدفين وصنع هدف ومنتخبه صعد نهائي كأس العالم مع فرنسا، ومودريتش أخذ الكرة الذهبية ودي مش مشكلتي، مشكلتي إن الناس 'عايزين' يقتنعوا إن مودريتش مش متخاذل وتحمل مسئولية منتخبه بعيدًا عن إن ده حصل فعلًا،
لكن مش عايزين يتقنعوا إن ميسي هو السبب في إن منتخبه يصعد 4 نهائيات وبدونه كانوا مش هيكملوا في أي بطولة أصلًا.
محدش عايز يبحث عن مشاكل الإتحاد الأرجنتيني، أو إنه بيعين مدربين لا يفقهوا شيء، أو إن كل نجوم الأرجنتين مش بيتم تفضيلهم كأساسيين على لاعبين بيلعبوا في دوري محلي، كله مش عايز يبحث عن مجرد لاعب نجم، بل منقذ زي جيافارا زي مارادونا متجسد في ميسي،
المشكلة الأكبر أصلا إن محدش برده عايز يعرف إن مارادونا كان مش منقذ ولا حاجة، لكن الشعب الأرجنتيني جسده في كده وكذّب كل التفاصيل لأنه جلب كأس العالم، محدش عايز يعرف إن مارادونا كان معاه ثنائي هجومي تاريخي معاه زي بورتشاجا وفالدانو، وإتنين مدافعين تاريخيين زي بوريجي وبراون، وغيرهم.
المشكلة إن محدش عايز يعرف إن في نهائي مونديال 1986 مارادونا نزل بعد الدقيقة 60، بعد تسجيل الأرجنتين هدفين ضد المانيا، بل إن محدش عايز يعرف مين أصلًا سجلهم، وإن أهم لقطة في الماتش هي أسيست مارادونا لبورتشاجا في الهدف الثالث بعد تعادل ألمانيا.
وعلشان كده هييجي في بالك جملة 'ميسي كان بيلعب لوحده وكان بياخد البالون دور في برشلونة'، في موسم 2019 التاريخي له، كانت المفارقة العجيبة إن أفضل أداء فردي له كان تحت قيادة فالفيردي، لكنها بالنسبة لي مش مفارقة عجيبة ولا حاجة، لأن فالفيردي فعلًا كان أذكى حرامي في العالم،
علشان تفهم ليه، فبرشلونة في آخر السنوات أصبحوا مش بيكسب وهو سيء، مش بس ضد مدريد، لا ضد الكل، في حين إن مدريد ممكن يكسب وهو سيء عادي بغلطة أو إتنين بس من الخصم، ولازم برشلونة يقدم 120% من مستواه مش 100% بس وبدون أخطاء علشان يقدر يكسب ريال مدريد أو حتى أي خصم، وده كان بيحصل مع بيب،
علشان كده تقدر تكتشف لغز فوز إرنيستو فالفيردي المستمر على ريال مدريد رغم إن برشلونة قدم كرة سيئة غير قائمة على الإستحواذ معاه، لأنه كان بيلعب بخطة 4-4-2 أو 4-3-3 بثلاثي وسط بدني، علشان يقدر يوفر 2 من لاعبيه على كل لاعب ضد ريال مدريد أو ضد أي خصم في كل مكان في الملعب،
بل ويقدر يقلل خطورة مدرب الخصم في غلق زوايا التمرير على ميسي، بحيث ميقدرش يعزل باقي اللاعبين عنه ويقدروا على الأقل يوصلوا الكرة له، وهو هيتكفّل بالباقي، دي أبسط مفاهيم السرقة الذكية، ازاي توظف لاعب زي ميسي بأكتر توظيف هيظهر فيه كـ Super hero وأنت قاعد تتفرج كمدرب زيك زي الجمهور،
دي حاجة مدربي الأرجنتين من فقرهم حتى معرفوش يعملوها مع ميسي، وده شيء كارثي إنهم يوصلوا للدرجة دي من العدمية؛ مفيش مدرب قدر يوظف لاعب وسط جيد مع ميسي،
مش هقولك نجم زي أجويرو اللي كان بيقعد دكة ليهجوايين أو دي ماريا اللي كان مش بيلعب أو ديبالا المستبعد، لا، ولا بابو جوميز ولا ديبالا ولا لوسيلسو، لدرجة إن ميسي بيقدم أفضل أداء له مع دي باول لاعب أودينيزي لأنه بيعمل نفس الموضوع معاه حتى لو بشكل أقل.
إنتهى الثريد.
شكرا لوقتكم!.
إنتهى الثريد.
شكرا لوقتكم!.
جاري تحميل الاقتراحات...