رتبها

ليه الجاهل مفكر نفسه علَّامة وبيحب يفتي؟!
تابع الثريد👇

وأنت رايح كليتك أو شغلك الصبح معدي ع القهوة لقيتهم بيتناقشوا في نتايج وتأثير خروج بريطانيا من الاتحاد الأوروبي..وكله بيدلي بدلوه ومحدش فيهم دارس أو قاري سياسة..ومع ذلك تلاقيه بيقاوح ويحاول يقنعك بنفسه..هو ده
The Dunning-Kruger Effect
أو ما يعرف بتأثير دانينج كروجر..

تأثير دانينج كروجر عبارة عن تحيز معرفي واللي فيه الناس بيبالغوا خطأً في تقدير نفسهم وقدراتهم ومعرفتهم ف مجال معين وده بسبب إن نقص الوعي بالذات عندهم بيمنعهم من تقييم مهاراتهم بشكل صحيح.

الباحثين ارجعوا التأثير ده لمصطلح اسمه metacognition أو إدراك الإدراك واللي معناه قدرة الفرد على تحليل أفكاره وأدائه
وإن الأفراد اللي عندهم قصور ف المعرفة بيعانوا من"العبء الثنائي Dual Burden"
أو اللي بيسموه"اللعنة المزدوجة Double Curse"
لأنهم مش بس مبيأدوش كويس..لا

دول معندهمش وعي كافي بالذات لتقييم نفسهم بشكل صحيح..فمبيتعلموش ولا بينموا مهاراتهم.
مبدأ تأثير دانينج كروجر ظهر للنور بعدما نشر عالما علم النفس دافيد دانينج وجاستن كروجر ورقة بحثية من جامعة كورنيل عام ١٩٩٩م..
وفيها اختبروا مشاركين من الطلبة في حس الفكاهة..المنطق..القواعد..

لقوا إن الطلبة ذوي المهارة المحدودة كانوا بيقيموا نفسهم ف مستوى أعلى من قدراتهم..وللمفارقة الغريبة إن الطلبة ذوي القدرات الأعلى كانوا بيقيموا نفسهم أقل..لأنهم مفكرين إن المهارات بتاعتهم الكل بيقدر يعملها..يعني عندهم سوء تقدير للآخرين..لكن

صحاب تأثيرنا عندهم وَهْم داخلي إنهم لو عرفوا معلومة ولو بسيطة عن موضوع فهما كده بقوا خبراء استراتيجيين..
حد هيسألني طيب ليه هما بيفخموا من نفسهم؟!
أقولك ده بيكون نوع من الثقة الزايدة وسببها الرغبة ف إنهم يبانوا أشطر وأذكى من اللي حواليهم.
لكن ده ممكن يضر بيهم للأسف..إزاي؟!

لأن لو واحد مثلًا لسه باديء رفع أثقال وهوبا دخل ف واحد ف تحدي مين يشيل ٥٠ كيلو وواثق إنه ممكن يشيلهم..لكنه للأسف كده بيضر نفسه وممكن تحصله إصابات.
ختامًا إزاي نقدر نتجنب تأثير دانينج كروجر؟
الحل زي ما قال عمو دانينج وهو إن الناس تحاكم نفسها وتحاسبها..

أو تسأل أهل المعرفة لو معندهمش فكرة..وأخيرًا تحكم وتقيم مهاراتها وتفكيرها ومتاخدش كلامها ع إنه حقايق مسلم بيها.

جدير بالذكر إن دانينج وكروجر خدوا فكرتهم من قصة المجرم مكارثر ويلر واللي ف سنة ١٩٩٥م سرق بنكين وهو مغطي وشه بعصير ليمون عشان كاميرات المراقبة😂😂..كان جاهل بالخصائص الكيميائية لعصير الليمون كحبر سحري.
وعلى كده بقى هل فيه حالة الناس فيها بتقلل من استحقاقيتها للشيء؟
دور وابعتلي😌