قررت أشارككم تجربة (صداقتي مع نفسي) في ثريد:
في فترة من الفترات كنت أحس بملل وفراغ كبير بمجرد ما أجلس لحالي حتى لو كنت قبلها طالع ثلاثة أيام ورى بعض ولما أرجع البيت وأقعد ساعة بس حسيت بطفش وفراغ وضيقة صدر وكنت أكره الشعور ذا..
كان عدوي الفراغ ما أحبه! لأني كنت أفكر وأفكر وأفكر حتى في توافه الأمور وأبدأ أضخمها لا شعورياً وأشوف كل شيء قدامي صعب وأضطر أهرب من الواقع واختار النوم وأنا ضايق صدري لأن كل شيء صار صعب على أمل إني أصحى على رسالة من أحد معارفي يقول يلا نطلع...
لين في يوم قررت أواجه أفكاري وأحاول أعرف ليه أطفش ويضيق صدري بدون سبب؟ بعد فترة من التفكير طلع معي أشياء كثيييير وكان أهمها اكتشفت إني صديق سيئ لنفسي! يعني ما أعرف أقضي وقتي لحالي لازم معي أحد ولا بدخل في دوامتي اللي تبدأ غالباً بأفكار سلبية وتنتهي بهروبي للنوم!.
فبعدها قررت أخصص وقت لنفسي فقط وهنا جاتني المشكلة الثانية طيب وش أسوي! فقلت مو مشكلة الحين بطلع كأني طالع مع أحد من أصدقائي وفعلاً قمت واستعديت كأني بقابل أحد أعرفه بس أخذت شنطتي حطيت الكتاب اللي أبي أقرأه من شهرين + أيباد + سماعة شاحن متنقل، وقلت طيب وين بروح لو معي فلان؟
أوه عرفت وين بروح المقهى الفلاني! وفعلا رحت وطلبت وجلست مع نفسي بس هذي المرة ما كنت طفشان ولا أفكر وأضخم الأمور، جلست استخدم الجوال ولا دريت إلا مطلع الكتاب وأقرأ وشوي أتابع على الايباد لين استوعبت أن الوقت تأخر ولازم أرجع..
انسدحت بنام وكنت مبسوط لين جاتني فكرة "يمكن أنك مبسوط عشانها تجربة جديدة ومصيرك تطفش من نفسك" تعوذت من أبليس ونمت، وصرت كل ما جاني وقت فراغ أسوي هذي الطريقة استعد وكأني طالع مع أحد أعرفه لين وصلت مرحلة صارت نفسي صديقتي وأدركت إني أشوف أفكاري وقت الفراغ بعدسة مجهر تضخم الأمور..
صرت متسامح أكثر مع نفسي والحمدلله وصلت لمرحلة التقبل اللي أبيها وهي أنه عادي جداً وغير ممل أنه مايكون عندك شيء تسويه أو تكون مع أحد عشان ما تطفش وبالعكس صرت أحيانا أفضل إني أجلس لحالي لدرجة صار وقتي مع نفسي أشبه برحلة استجمام لتصفية الذهن.
صرت أجلس بالبيت وأقضي وقت مع نفسي وأهلي أكثر من قبل وبكل أريحية ولله الحمد، صرت أقرأ أكثر، تحسن نومي ومزاجي بمراحل، فهمت طبيعة علاقاتي مع معارفي أكثر وكتبت ثريد لأول مرة😂!
ما أكذب عليكم أحيان تداهمني أفكاري اللي قبل وأخاف وأقلق بدون سبب بس صرت أخصص وقت للمشاعر هذي يعني مثلاً إذا حسيت بقلق أقول لنفسي معك ٥ دقايق تقلق فيها براحتك ( للأمانة مدة الوقت مجرد مثال ماقد حطيت منبه😂) وبعدها خلاص أكمل الشيء اللي كنت أسويه بدون أي مشاكل..
ومن الأشياء اللي لاحظها علي شخص قريب مني قال( أنت صار عندك ذكاء عاطفي)، تقدر تفهم مشاعرك من غضب، حزن، ملل إلخ.. في لحظتها وتعرف كيف تتعامل مع مشاعرك هذي، وهذا شيء ما كان عندي من قبل وفعلاً استوعبت كلامه يوم قارنت نفسي الحين بنفسي في السابق..
من الأشياء اللي صرنا نسويها أنا ونفسي العزيزة على قلبي إذا حسينا بتشتت وما قدرت أسوي شيء من الأشياء اللي لازم أنفذها، بدون تردد أطلع مكان هادي ومعي دفتر وقلم وأكتب الأشياء كلها وأرتبها من حيث الأولوية..
بدون مبالغة بمجرد ما أنتهي من كتابة الأشياء وترتيبها استوعب إني عطيتها أكبر من حجمها بمراحل وأبدأ أخلص الأشغال بكل سلاسة وبدون عشوائية وتشتت..
أتمنى لي أنا ونفسي الحبيبة أن نكون سعداء ما حيينا وأتمنى لكم صحبة مسلية مع أنفسكم وسخروا كل الوقت والجهد المطلوب للاهتمام بصحتكم النفسية كما تسخرون الوقت والجهد المطلوب للاهتمام بصحتكم الجسدية
لا تنسون تشاركوني تجربتكم وكيف تعاملتم مع أنفسكم في أوقات الفراغ، وفي الختام قررت أن ينتهي هذا الثريد باقتباس "عندما لا نطيق تحمل الوحدة، فإن هذا يعني أننا لا نُقدّر على الأرجح الصاحب الوحيد الذي يرافقنا من المهد إلى اللحد؛ أنفسنا"
جاري تحميل الاقتراحات...