ب17 تشرين فكرت السلطة أنها تغلي الواتس آب 7 سنت .. قامت الدنيا وما قعدت وطلعوا الناس من بيوتها عالشوارع إعتراضاً على هيدا القرار والحمدلله انلغى ورجعوا على بيوتهن
بس هلأ ليش عم تقولولهن يرجعوا ينزلوا؟ ليش بدكن الناس ترجع تثور وتغضب؟ ليش بدكن ياهن ينزلوا عالشوارع؟ ليش؟ إيه؟ ليش؟
بس هلأ ليش عم تقولولهن يرجعوا ينزلوا؟ ليش بدكن الناس ترجع تثور وتغضب؟ ليش بدكن ياهن ينزلوا عالشوارع؟ ليش؟ إيه؟ ليش؟
هلأ أي نعم طلع فينا أكبر تاني إنفجار بالعالم .. وراحوا شهداء كتار .. وتدمرت بيوت .. وانجرحت ناس .. وخسرنا نص العاصمة .. وكله من ورا إهمالهن ومعرفتهن السابقة .. بس كلمة الحق بتنقال .. سعر الاتصالات ما غلي
هلأ أي نعم الدولار عم ينطح ال13 ألف .. وعم يحركوه على كيفهن .. وأكلوا أموال المودعين .. وعم يذلوهن بصفوف ليسحبوا قروش من أموالهن .. وكل شي بالسوق صار حقه أضعاف أضعاف ولكن الواحد يحقي الحق .. سعر الاتصالات ما غلي
هلأ أي نعم .. المستشفايات عم يعانوا نقص حاد بمادة البنج .. والعمليات كلها عم تنعمل معداتها على سعر صرف الدولار الغالي وعم تموت الناس لأنه مش قادرة تأمن هالمبلغ .. بس سعر الاتصالات ما غلي
هلأ أي نعم .. ما في أدوية .. ولا في حليب .. ولا في شي أبداً .. وكله مفقود .. إن كان الدوا الأساسي أو البديل .. بس الواحد يحكي ضميره .. سعر الاتصالات ما غلي
هلأ أي نعم .. ما في بنزين .. ولا مازوت .. ولا محروقات .. والناس عم توقف تنذل ساعات ورا ساعات .. ليشحدوها ب20 ألف ليرة .. بس هاد كله .. ما بيؤثر طالما سعر الاتصالات ما غلي
هلأ أي نعم .. عطفاً على مشكلة المحروقات .. بتطلعلك مشكلة الكهربا .. والاشتراكات .. ياللي أسعارهن صارت أرقام فلكية .. مع تقنين على التقنين .. بس عادي .. طالما سعر الاتصالات ما غلي
هلأ أي نعم .. رايحين على رفع الدعم عن كل شي .. وسعر اللحمة رح ينطف ال200 ألف ليرة .. بس معليش .. كل هاد مقبول لأنه سعر الاتصالات ما غلي
وغيرهن وغيراتهن .. يعملوا شو ما بدهن .. آخر همنا كشعب وما في لزوم نعمل أي ثورة .. ليش؟؟ لأنه نحن انتصرنا بالثورة .. وما في لزوم نعمل غيرها .. والدليل؟؟ أنه نحن شعب بيحب الحكي .. وسعر الاتصالات متل الشاطرين .. رجعوه مطرحه .. ولهلأ لسا ما غلي !!
#بلال_مواس
#عقصة_دبور
#إذاعة_الفجر
#بلال_مواس
#عقصة_دبور
#إذاعة_الفجر
جاري تحميل الاقتراحات...