التويتة ديه عملت لي ارتباك جامد من ساعة ما قريتها، و يمكن الكلام اللي هاقوله ملهوش علاقة مباشرة بموضوع التويتة بس مرتبط بيها و محتاج اقوله يمكن الفضفضة تساعد شوية على ان الاضطراب اللي جوايا ده يهدي شوية
أنا بحب مصر فعلا، بحبها بشكل مش عادي، عارف انت اللي هو جسمك يقشعر و محسن ممتاز بيقول لرأفت الهجان .. مصر يا رأفت، او و رأفت بيقول لحد من بتوع المخابرات ان مصر حلوة و تستحق في آخر المسلسل تقريبا، بس ده شكل المشاعر و تأثيرها لكن اسبابها كتير جدا، بحب مصر و تاريخها و آثارها
بكل إيجابيات التاريخ ده و سلبياته، كل حاجة قريتها و عيشتها كانت بتزود الحب ده مبتقللوش، مش باتكلم عن الانتماء، باتكلم عن الحب بمعناه الاسمى فعلا، بحب كل الاماكن اللي فيها و كل الجمال اللي احيانا موجود خلف اكوام من القبح بس بيعرف يظهر و يتميز ، بحب ناسها و مصر هي ناسها فعلا، بحب
نيلها و شواطئها، البيت اللي اتربيت فيه، الشارع اللي سكنت فيه الاصحاب و الاهل و الاقارب، المدرسة و المدرسين، كل حاجة شكلتني و بقت جزء لا يتجزأ مني و أنا صغير كنت مش بس رافض فكرة الهجرة انا كنت متضايق من اللي بيهاجروا - اذا كان كل واحد هيهاجر علشان نفسه مين اللي هيصلح البلد؟ - +
كنت مدرك ان البلد فيها مشاكل، بس شايف ان البلد في اساسها كويسة و ممكن اصلاحها و كل بلاد الدنيا فيها مشاكل ( كل بلاد الدنيا جميلة لكن اجمل من وطني لا 😔) بس لما كبرت شوية اصابني اليأس من فكرة ان حاجة تتصلح، و مع ذلك كنت شايف ان جذوري هنا و صعب انخلع منها
لما قامت الثورة اتحول اليأس و الحزن ده لاول مرة لأمل حقيقي، كنت شايف دائما مصر تستحق احسن من اللي هي فيه بكتير و كان فيه فرصة حقيقية لده بس الفرصة راحت للأسف، راحت بسبب اللي كانوا قوة دفع للتغيير و اتسببوا في خلق الفرصة قبل ما تروح بسبب اللي ضد فكرة التغيير و حاربوا أي أمل
إن الوضع يتحسن، الناس بكل اطيافهم و اختلافاتهم كانوا سبب لصدمة مش هينة مش متخيل حجم السواد اللي ظهر و لا حجم الشر الغير مبرر اللي ظهر بشكل مش مفهوم، مصر كانت هي الناس بالنسبة لي بجانب التاريخ العريق و الجمال اللي لا يضاهي، فاذا كانوا دول الناس فده بينعكس على مصر اللي جوايا ازاي؟
و زد على ذلك عشرات من المآسي العامة و الشخصية اللي حصلت خلال فترة الاضطرابات و الخلافات و الصراعات و اللي بتضغط على القلب و تزيده حزن فوق حزن، احكي عن زميلي في المدرسة و اللي كنت باتطلع ليه لأنه كان نابعة، عبقري حقيقي بشكل نادر و هو مكانشش صاحبي و انقطعت اخباره من زمان و لكن
كنت باحترمه و اقدره بشكل كبير و المرة الوحيدة اللي اعتبرت نفسي متفوق دراسيا بشكل استثنائي كانت المرة اللي جبت فيه تقدير مماثل له، و فرحت لده اكتر من التقدير و الترتيب على المدرسة، عرفت من كذا سنة انه محبوس لاسباب سياسية و مينتظرش خروجه، كل مرة لما بافتكره بافكر اني كان ممكن ابقى
في مكانه لكن الطرق اختلفت، احكي عن صديق كان في منصب رسمي مفترض انه يحميه و كل اراؤه متفقة مع كتالوج الآراء المقبولة و المرغوبة و معندوش شك فيها، الصديق فقد حياته عبثا بصدفة بائسة علشان صراع سياسي متنكر في شكل صراع على حتة أرض و الصراع السياسي اتحل و النزاع على الارض انقضى،
بس الصديق مرجعش للحياة و مينفعش أي حق يترد له، و افكر اذا كان "ده" حصل له كده، امال الناس اللي زينا ممكن يجرالها ايه، و اذا كانت ديه قصص شخصية مش شرط تنسحب على الجميع و ممكن تكون خاضعة للصدفة و صعب تحصل لأي حد، قدر، فخليني احكيلك عن الوضع زي ما بافكر فيه دلوقتي
انا واحد شغال في شغلانة ما، باقبض مرتبي و مستكنيص، حصلت لي حادثة شديدة، لو الحادثة ديه تسببت لا قدر الله في اقعادي عن العمل او لا قدر الله اني افقد حياتي، مصير الناس المسؤولة مني ايه؟ طب الشغل اللي باطحن نفسي فيه لدرجة المرض و المرتب اللي بيعديني الشهر بالعافية فايدتهم ايه؟
ليه اصلا الناس تحتاج تشتغل اكتر من شغلانة علشان بس تكفي نفسها و مصاريفها و الشهر يعدي و مش مهم صحتها و لا حياتها، المهم الشهر يعدي
طب انا راجل مقتدر و هافتح مشروع مين يضمن لي اني بعد ما استثمر فيه و ايا كانت علاقاتي اللي بتحافظ على المشروع ميطلعش قانون عشوائي يدمره او حد صلاته اعلى حط المشروع في دماغه و قرر يوقفه او حتى كارثة طبيعية مفيش ما يحمي المشروع او يعوض عنه لو راح
طب انا كصيدلي لو حد من اهلي تعب او جاله مرض، فايدة شهادتي ايه لو ملقتش الدواء اللي هما محتاجينه او معرفتش اوفر مكان في مستشفى او مفيش ضمان انه حتى لو وفرت ده انه يتعالج صح و بكفاءة و القصص اللي باسمعها و اشوفها حواليا مرعبة و متفرقش معاك فلوس و نفوذ و لا لأ باستثناء فئات معينة
ناهيك عن الفساد اللي بيزيد ما بيقلش، من اول ما وعيت على الدنيا و هو من سيئ لأسوأ و بكل الاشكال و في كل المجالات الممكنة، انا بحب مصر جدا لكن حجم الغضب و الحزن و اليأس جوايا بسببها و بسبب الوضع اللي هي مش المفروض ابدا تكون فيه كبير جدا و مش عارف اذا ده ممكن يتغير في يوم ما
و ان كنت اظن صعب فعلا، ربنا يرحمنا
جاري تحميل الاقتراحات...