التعليم
التكنولوجيا
الشباب
الصحة
الابتكار
التأثير الاجتماعي
الابتكار الاجتماعي
التكنولوجيا المساعدة
الاتصالات الميسرة
دي حكاية تستحق تتعرف لـ شاب يستحق يتعرف عمل حاجة عظيمة تستحق تتعرف ومش بعيد خلال كام سنة نسمع إنه بسببها أخد "نوبل".. "عُمر عبدالسلام".. شاب مصري من مدينة المنصورة.. عنده 20 سنة.. بيدرس في قسم الاتصالات والحاسبات في كلية الهندسة..
أهالينا وأخواتنا من الصُم والبُكم بيعانوا في التواصل مع باقي الناس إنهم بيكونوا محتاجين حد يفهم لغة الإشارة بتاعتهم عشان يعرف يوصل لهم كلامه لإنهم مش هيسمعوه لو اتكلم.. حلو.. هنا جه "عُمر" وقال لك أنا هحل القصة دي.. عمل إيه؟..
صمم ونفذ نظارة بيلبسها أى حد من الصُم والبُكم ومن خلال ميكروفونات موجودة فيها بتلقط أصوات الناس وهما بيتكلموا وتحولها لـ لغة إشارة بتتعرض على إزاز النظارة من جوه ويشوفها الشخص اللي لابسها ويفهم إيه اللي بيتقال!.. طيب لو حد من الصُم والبُكم عايز يقرا كتاب؟..
ن خلال مستشعرات موجودة في النظارة برضه يقدر وبمجرد ما يوجهها ناحية أى صفحة مكتوبة وهيتم تحويل الكلام المكتوب لـ لغة إشارة هتتعرض قدام اللي لابسها!.. مش بس كده.. كمان ومن خلال نفس المستشعرات لو اللي لابسها عمل بإيده لغة الإشارة عشان يشرح لحد قدامه أى حاجة؛ النظارة هتترجمها لصوت..
هيخرج منها عشان أنا وأنتم نسمع بالصوت هو يقصد إيه!.. "عُمر" بيقول في حواره مع الصحفية "دينا عبدالخالق" إنه عمل 9 نماذج للنظارة بتاعته وكل نموذج جديد كان بيطور فيه حاجة عن اللي قبله لحد ما وصل لـ النموذج النهائي رقم 9 دلوقتي!..
بسأله في مكالمة بيني وبينه أنت عندك 20 سنة، بدأت في التجارب دي كلها إمتي؟.. قال لي من وأنا في أولى إعدادي!.. "عُمر" سمى اختراعه "SensEar Glasses".. أول مرة في العالم حد يعمل حاجة بالشكل ده، وفيه أبحاث كانت عايزة توصل لكده بس ظلت مجرد ورق ويشاء ربنا إنها تتنفذ على إيد شاب مصري!..
الدول بتتقدم باللي دماغهم زى دماغ "عُمر".. نموذج مصري محترم، شبهنا، متعلم تعليم حكومي عادي زى معظمنا، وبيثبت للمرة المليون إن بلدنا فيها دماغ شباب ولاد وبنات تتوزن بالدهب.. عاش.. كل الحب والله.
جاري تحميل الاقتراحات...