رتبها

قصة قصيرة
#من_غير_إذن
في يوم شغل حر طويل،وبعد زحمة كتير وفصال كتير مع خلق تضيق الخلق
وإذا بالست نيرمين خلصت مطبخ ودوشة العيال ولم الغسيل من على الحبال وقالت تدخل الفيس بوك تشوف حصل إيه في عالم الخيال
عجبها بوست فيه طريقةعمل الفراخ المشوية على الطريقة الهندية وبسرعة شيرتها
-١تابع

وكتبت
"اتمنى أجربها، شكلها هيطلع تحفة"
وانهالت التعليقات عليها من الأصحاب ... وظهر تعليق من حساب متعرفوش والكلام اللي فيه مفهمتوش
-مش أحلى من الفراخ اللي بتشويها على الفحم بالطريقة بتاعتك يا نيرمين
طبيعي كان لازم تستغرب حبة وتفكر حبيتين قبل ما تقرر ترد
-٢تابع

-هو حضرك تعرفني؟ متهيألي إنك بتشبه على الحساب
-لا إنتي نيرمين الفوال وأختك مريم وأخوكي كريم وعليكي ديك رومي وورق عنب مدقوتش زيهم ولا في الفنادق
إتعدلت نيرمين من على كنبة الليفنج وقامت راسها لفوق وقررت تفتح حساب الأخ محمد عبدالمهيمن وتشوف دا مين.
-٣تابع

بس الحقيقة الحساب كان فاضي من أي ملامح ولا تضاريس تقدر تحدد بيها نيرمين شخصية آكل الرومي وورق العنب من إيديها.
طب الحل إيه ؟
صحيح دول من الحاجات اللي أنا متميزة فيهم بس دا ميمنعش إنه ممكن يكون عرف دا من حسابي وتعليقات أصحابي مثلا! أو يكون واحد من قرايبي
-٤تابع

اللي أنا عاملة لهم بلوك من زمان عشان تعليقات العشم الرخمة وتفاصيل الأحداث السخيفة جوا العيلة. طيب أرد عليه بذوق وأسكت بعدها
-متشكرة يا فندم
لكن الرد جه مباغت وسريع ومستفز
-لسة بتحبي البرد وتاكلي أيس كريم من المحل اللي في الكوربة؟
ولسة بتشوفي هبة الطحان وأمير فوزي؟
-٥تابع

لا كدة إنت تعرف هبة من أيام الجامعة و تعرف أمير من شغلي القديم وهو مش موجود عندي على الفيس بوك! لا إنت مين يا أخي
بس الصراحة هو مستناش رد نيرمين ودخل الخاص
آن آن آاااااان
-وحشتيني يا نيرمين
-أنا محمد الشبوكشي
الإسم ميتنسيش والحكاية متتنسيش بس
-٦تابع

نيرمين مش عايزة ترد على البني آدم دا بالتحديد.... أنقذها صوت مريم أختها وأولادها اللي مشرفينها من إنجلترا في إجازة الكريسماس هربانين من التلج في مدينة الضباب.
-نيمو نيمو نيمو إحنا جعانين يا نيمو مامي قالت إنك عاملة أكل مصري مفاجأة يلا فين الأكل؟
-٧تابع

كانت عاملة لهم كشري مصري من أبو دقة
و إندمجت معاهم في على السفرة تعلمهم الكشري بيتاكل إزاي وعن كم السعادة و الإندماج بينها وبينهم على الأكل وطريقة نطقهم للعربي المكسر و إنبهارهم بجمال الكشري وكلام كتير وضحك كتير ودفا وذكريات نيرمين بتسرقهم مع ولاد إخواتها
-٨تابع

بعيدا عن ضغوط الشغل وتعب الحياة.
خلصت فقرة الأكل وكانوا على معاد مع السينما بالليل وسابو نيرمين ترجع تفتكر قصة الشبوكشي.
زمان أيام شغلها في البورصة،
إتعرفت على الشبوكشي وكان مضارب نهم في شركة تداول الأوراق المالية اللي كانت بتتدرب فيها.
إفتكرت واحد فضل يحب فيها تلات سنين
-٩تابع

ويلاحقها بكل حب لكن هى كانت دايما صداه ...إنسان مشاعرها ناحيته متخطتش العطف وأحيانا عدم الإهتمام
رجعت لرسايل الفيس بوك وقررت ترد عشان نفسها تقوله أسفة على كل إحساس بالألم سسبته لك
بس مكانش سهل عليها:الإحساس بالذنب كان كبير،بس في الآخر إتشجعت وردت
-ياه يا محمد إنت لسة فاكرني
-١٠👇🏼

وبسرعة جه الرد وكئن المسكين كان حاطط الماسنجر في قلبه وردها عليه كانت الدقة اللي بيستناها قلبه
-وحشتيني أوي يا نيرمين
-شكرا
-إنت كنت عاملي كمين يا محمد وبتختبرني، عايز تعرف هعرفك ولا لأ؟
-لأ أنا مقدرتش أقاوم مكلمكيش
-من إمتى وإنت ليك في الفيس بوك؟
-١١تابع

-دخلته عشان أدور عليكي بس محاولتش أزعجك زي ما طلبتي مني آخر مرة
-واضح لإن الحساب تقريبا فاضي
-إنتي نشيطة أوي على الفيس بوك ودي أحلى حاجة حصلت في السبع سنين اللي كنتي بعيد عني فيهم. كنت بشوفيك في كل حاجة بتشيرها وكل كلمة بتكتبيها
-هو إنت مبطلتش ملاحقةفيا حتى على النت يا محمد
-١٢👇🏼

-إفتكري وعدي ليكي مفيش ست تانية تاخد مكانك عندي وأنا مش هبعد بس إنتي مش هتحسي بوجودي
-ياه نسيت إنك قلت كدة فعلا
-نيرمين أنا مقدرش أبطل أحبك، أنتي نفسي... حد يقدر يبعد عن أنفاسه...
-معقول كلامك دا إحنا أخر مرة إتكلمنا من 7 سنين يا محمد
-بس إنتي مغيبتيش عن عيني ولا عن روحي
-١٣تابع

-أنا أكيد مش مصدقاك مش معقول هتقعد من غير جواز دا كله
-بس أنا متجوزتش ومش هتجوز غيرك
-إزاي طنط سابتك كدة، أكيد الست بتدعي عليا ليل ونهار
-بالعكس طنط عارفة إنتي إيه بالنسبة لي وهو طنط أجدع من مين عشان تغلب حبي ليكي؟
-كفاية الكلام دا يا محمد
-١٤تابع

-بحبك يا روح محمد
-بحبك وروح محمد الإتنين في نفس الجملة
دمعت من كلام الحب الصادق اللي طالع منه وصعب عليها حاله،إفتكرت إزاي كانت بتصده وتستهين بمشاعره وإزاي كانت شايفة إنه مش واقعي خصوصا إنها مبادلتوش نفس المشاعر. كانت بتتعمد تهرب منه عشان متضطرش تكون قاسيةعليه وجافة فكلامها
-١٥👇🏼

معاه لإنها في الفترة دي مكانتش تعرف إن في حب يوصل للدرجة دي. قطع دموعها رده
-هو أنا ينفع أكلمك؟
-إنت إزاي تطلب طلب زي دا، مش يمكن جوزي يزعل
-إنتي مجوزتيش يا نيرمين
-عرفت إزاي بقى!
-إنتي ناسية أنا بشتغل إيه وأقدر أعرف إيه؟
-١٦تابع

-أسفة يا حضرة الظابط ولا حضرة الظابط مبيقولهاش في رتبة سعادتك
-لأ بتتقال في كل وقت ومن أي حد غيرك إنتي
-إشمعنى أنا
-عشان إنتي حبيبتي
-تاني يا محمد!
-طب ينفع أسمع صوتك؟ أسمع صوتك وهقفل على طول مش هطول عليكي ولا هضايقك
-أوكى أطلبني
-إنتي عاملة لي بلوك يا حبيبتي فكي البلوك
-١٧تابع

-فكيته أهو معلش كنت ناسية
مفيش ثواني ورن التليفون وكأنه بيسابق سرعة الصوت وردت نيرمين
-ألو ألو ألو ألو
-أيوة يا أحلى صوت في الدنيا ألو يا ست الحسن وحشاني يا بنت قلبي
-يااااه يا محمد نفس اللي كنت بتقوله من زمان
-١٨تابع

-نيرمين أنا مبنساش أي حاجة تخصك، الكلام دا عمره ما كان من لساني، طول عمر كلامي ليكي كان من قلبي
-عرفت يا محمد وفهمت
-بحبك بحبك أوي، أنا مش مصدق وداني، معقول أنا بكلم حب عمري نيرمين، أنا مش عارف أنا قاعد ولا ماشي ولا واقف ولا بعمل إيه، إكلمي كدة
-أكلم أقول إيه يا محمد؟
-١٩تابع

-قولي أي حاجة أنا بحبك أوي ووحشاني يا روح محمد
-يا محمد خف شوية إنت لحقت!
-أخف دا إيه، أنا ما صدقت
-ما صدقت إيه بالظبط؟
-عارفة يا نيرمين، أنا طول الوقت حواليكي لكن زي ما وعدتك مش هتحسي بيا.
ولا هضايقك بس سيبيلي الكلام أعبر بيه عن سبيني أطير وأنا بكلمك
-٢٠تابع

-يعني إيه طول الوقت حواليا؟هو إنت كنت بتراقبني7سنين بحالهم؟
-هو إنتي حسيتي بيا؟ ولا أنا إتعرضت لك؟
-لأ
-يبقى براقبك إزاي؟إنتي تحت عيني
-يادي طبعك الزفت وشغلتك اللي طبعت عليك
-مش زيي ما إنتي فاكرة،أنا قصدي إني بتابعك من بعيد لبعيد ودا اللي وعدتك بيه ومتهيألي إني كنت ملتزم
-٢١👇🏼

-أنا فعلا محستش بيك طول الفترة اللي فاتت
-بس دا مش معناه برضو إني أنساكي ولا أبعد عنك
-فزورة دي بقى!
-لأ يا حبيبتي، أنا كنت بعمل حاجات تحسسني إني قريب منك، لكن مكنتش براقبك
-حاجات زي إيه؟
-ألف بالعربية حوالين شارعكو، أشوفك وإنتي نازلة من الشغل من بعيد وإنتي متشوفنيش،
-٢٢تابع

أسأل في السجل كل فترة عنك، كنت بركن تحت البيت لما تسافري عشان متشوفنيش بس أكون في مكان حاضنك وفيه من ريحتك.
-يااااااه عليك مُصر تتعبني يا محمد
-بعد الشر عليكي يا روح محمد، أنا مستحملش أزعلك وإنتي عارفة، أنا بحبك أوي فوق قدرتي على الكلام، بحبك ومش عايز من الدنيا غيرك.
-٢٣تابع

-أنا مش عايزة أسمع الكلام دا منك أرجوك، معادش ينفع أسمعه
-مبقولكيش حبيني، سيبيني أقول أنا بحبك زي زمان
-ولا دي كمان، معادتش تنفع
-ليه بس، تعباكي الكلمة دي في إيه
-محمد أنا عايزة أعتذر لك
-ياما إعتذرتي لي زمان وعارف الباقي "أنا أسفة يا محمد معنديش حاجة أديهالك،
-٢٤تابع

مشاعري مش بإيديا، وأنا متعودتش أخد ومديش" مش دا اللي هتقوليه، أرجوكي مش وقته وسيبيني طاير من السعادة وأقولك اللي محبوس من سنين جوايا
-لأ معلش إحبس العصافير تاني في القفص
-طب سبيلي المكالمة دي واللي بعدها إبقي إخنقي العصافير يا ستي براحتك
-صدقني مش هينفع
-٢٥تابع

-طيب إيه يرضيكي وأنا أعمله، أنا كفاية عليا أكون قريب منك
-إذا كنت بقولك مينفعش تقولي بحبك، تفتكر ينفع تبقى قريب مني؟
-ليه بس فهميني، إذا كنتي متجوزتيش، وواضح إنك مش مرتبطة، إيه يمنع إني أحبك ونتجوز؟ إنتي هتلاقي حد يحبك أدي؟
-محمد ممكن تقفل دلوقتي
-٢٦تابع

-خلاص متزعليش أنا مش هتكلم إتكلمي إنتي في اللي يعجبك عايز أسمع صوتك بس
-يامحمد مضايقتنيش بس لازم أنام عشان عندي شغل بدري
-إنتي مش بتنزلي3أيام في الإسبوع بس؟
-هههههههههه هتموتني من الضحك، من 2006 بعرفك وإنت زي ما إنت،وتقولي مش مراقبني،تلاقيك عارف أنا كنت طابخة إيه النهاردة
-٢٧تابع

-أيوة كدة سمعيني أحلى ضحكة، قلبي بيزغرط كمان إضحكي تاني يا نيرمين
-محمد بطل كلامك دا كفاية كدة مش بهزر
-خلاص يا روح محمد
-يا دي روح محمد متقوليش كدة ليا إسم تناديني بيه، ولو مش عارف تعمل دا يبقى مفيش داعي تكلمني سامعني!
-خلاص متزعليش ولا تعصبي نفسك
-٢٨تابع

-أنا أسفة أوي مكنش قصدي أكون عصبية عليك
-أنا مبزعلش منك يا غالية، متعتذريش
-ما هو دا اللي طول عمره بيهربني منك
-لو أعرف أعمل إيه وأرضيكي وتبطلي تهربي مني
-ممكن تقفل عشان محتاجة أنام
-أنا بقى هفضل صاحي، صوتك هيفضل في ودني وهحضنه بقلبي
-تصبح على خير
-٢٩تابع

-وإنتي من أهله ياست الحسن يا بنت قلبي
بس اللي حصل كان العكس تماما، محمد من كتر فرحته ودموعه راح في نوم عميق وهو حاضن صورتها والفستان اللي سرقه من شنطتها في رحلة راس سدر زمان!
إنما نيرمين معرفتش تنام من الدموع والحيرة، إزاي متعاطفة مع محمد وفي نفس الوقت
-٣٠تابع

كلمة بحبك منه مش قابلاها للدرجة دي، ليه حبه بالنسبة لها تعدي على مشاعر خاصة جدا!
فضلت صاحية طول الليل تسأل ربنا ليه نقابل اللي يحبنا للدرجة دي ومنحبوهوش،
إذا كان الحب رزق من عندك يا رب،
ليه بترزقنا الحب للي هنتعذب بيه؟
وليه مش كل الحب مكتوب له يكمل برغم الإخلاص؟
-٣١تابع

يا رب أنا ذنبي إيه إني مش عارفة أتقبل حبه.... بس
يا رب إنت عارف أنا مستغلتوش ولا حاولت أتمتع بحاجة مش هعرف أردها، أه الرد هو مشاعري اللي مش موجودة ناحيته. طيب ليه مفكرش أستفيد من مشاعره واتجوز واحد بيحبني الحب الجارف دا، طالما هو قابل ويمكن أحبه مع العشرة والوقت.
-٣٢تابع

بس نيرمين مقدرتش تعمل دا زمان عشان مكانتش عارفة قيمة الحب وخايفة من المشاعر الفياضة من ناحيته تكون كذبة، تندم عليها، بس بعد 13 سنة من الحب وهو لسة بنفس التمسك، لغى لها فكرة الحب المراهق والمشاعر المخيفة اللي كانت بتشوفها ورا الملاحقة المستمرة.
-٣٣تابع

مكانتش في الوقت دا قادرة تفرق بين الحب الحقيقي والرغبة في التمسك بالحبيبة وبين حب الراجل للتملك لأي ست بترفضه!
وبعكش شهرزاد صوت الديك مأسعدهاش، لأنه فكرها بالنهار اللي طلع والعقل اللي لسة شغال والقلب اللي متقتعة جواه الحبال، حبال المودة والحب دايبة ومفيش باليد حيلة...
-٣٤تابع

حاولت تنام ولكن مكانش دا في الإمكان، محمد وكلامه حطها أدام مراية حقايق ومواجع كانت بتحاول تتعايش معاها ولسة مش عارفة تتكيف...
كل دا وجع يا نيرمين..ليه
طلعي اللي جواكي ليه دموعك ساكتة وهى نازلة؟ ليه نظراتك راضية وهى مكسورة؟
إنطقى ولو حتى للمراية...
-٣٥تابع

إحكي مع أمك أو فضفضي مع أختك ليه الوجع المداري، وليه محمد وحبه مقطع قلبك أوي كدة؟
مش دا محمد اللي كنتي بتبعديه وتعملي خطط عشان تكرهيه فيكي ويبعد عنك؟ ليه صعبان عليكي لحد الدموع وعدم النوم بالشكل دا؟
قررت نيرمين تاخد فاصل وتلبس بدري وتنزل طالما مفيهاش نوم، وتاخد هدنة
-٣٦تابع

وتفطر فالنادي مع شوية رياضة
يمكن الحركة تدوخ التفكير ويسيب عقلها، بس واضح إن دا كمان فشل...لعبت ساعة كاملة بلا نتيجة صوت قلبها أعلى من خطواتها على المكنة...
طيب يلا يا نيرمين روحي الشغل وكملي النكد مع الوشوش اياها...
لا مفر،على الشغل رايحين، الفكر والحيرة والأسئلة مع نيرمين
-٣٧👇🏼

محمد كان في عالم من السعادة اللي متتوصفش:
سامع صوت حبيبته اللي مسمعوش من 7 سنين
مطمن إنها كويسة وزي الفل
نايم وصوت ضحكتها في حضنه
صاحي مليان أمل وسعادة وتأكيد إنها مش هتكون أخر مكالمة وفي كمان فرصة إنه يشوفها بقى وش لوش مش من بعيد ولا خطف ولا خوف إنها تضايق
-٣٨تابع

محمد صحيح بيحبها، وميقدرش يستغنى عنها، لكن عزة نفسه متسمحلوش يفرض نفسه عليها، بس في نفس الوقت هو ميقدرش يسيطر على رغبته في إنه يكون جنبها مش هيعرف يطلعها من دمه...
صحي فايق ورايق وحالق ومتشيك، عشان نيرمين نازلة الشغل وعلى الأقل هيشوفها وهى طالعة المكتب.
-٣٩تابع

النص دقيقة ما بين ركنتها العربية ودخولها العمارة بالنسبة لمحمد حياة
ها أكلمها ولا أبعت لها رسالة الأول، مش عايز أخوفها مني
أبعت لها رسالة أحسن
-وحشتيني أوي
وكإن نيرمين كانت مستنية الرسالة
-إنت لسة هنا
-وهكون فين غير في المكان اللي إنتي فيه
-طيب يا سيدي موتشكرين
-٤٠تابع

-عاملة إيه النهاردة؟
-الحمد لله يا محمد كويسة
-المليارات في العالم بينطقو إسم محمد وتيجي محمد منك إنتي تخلع قلبي من مكانه، إيه يا بنتي صواريخ جمال وطعامة في نطقك لمحمد
-هو إنت مبتفصلش؟ غزل 8الصبح يا مفتري
-وكل وقت لست الحسن بنت قلبي
-٤١تابع

-كل لما أسمع الأغنية دي بقول الله يسامحك يا هاني يا شاكر، محمد كان مصدعني بيها
-ولسة لحد دلوقتي ممكن أفضل مشغلها بدون توقف ومزهقش عشان بشوفك فيها ونسيتي أغنيته بتاعة بعشق ضحكتك؟
-بصراحة مش هكذب، أنا نسيت، ممكن أنا أشوف شغلي يا محمد بك
-طيب ينفع أكلمك 3 دقايق بس؟متقوليش لأ
-٤٢تابع

-مش دلوقتي بعد الشغل
-حاضر هستناكي الساعة 4 وعشرة بالدقيقة هتصل بيكي
-إشمعنى يعني وعشرة؟
-عشان تكوني قفلتي المكتب ونزلتي لحد العربية، عارف مواعيدك مظبوطة
-سلام يا محمد
-سلام يا روح محمد
محدش ممكن يتخيل ال8 ساعات دول عدو إزاي على محمد بك، شوق وترقب قلق وأمل
-٤٣تابع

إنتظار ونشوى بس الغريب إن في اليوم دا، الإبتسامة مفارقتش، وشه وودانه مش سامعة غير نيرمين، ومفيش حد طلب منه حاجة الإ ووافق عليها والحمد لله مكانش عنده مأموريات في اليوم دا
محمد بك كان في منتهى الأناقة بشكل مبالغ فيه،
-٤٤تابع

الساعة الغالية أوي أوي أوي طلعت والبرفان اللي بريحة حلوة أوي أوي أوي مالي المكان والقميص بتاعة الماركة النادرة أوي أوي أوي ظهر والكل بيسأل هو ماله النهاردة، إتجرأت واحدة سنها كبير من موظفات المديرة ليها دلال على محمد بك
-إيه الشياكة دي كلها يا فندم؟
-شكرا يا أستاذة سامية
-٤٥تابع

-لأ بجد هو حضرتك رايح تخطب
الضحكة رنت في المكتب والدور كله، ضحكة من فرحة القلب اللي بيحب ومش طايل، ضحكة من اللي بيقولو عليها بتطول العمر
-إيه اللي بتقوليه دا
-شكلك عريس النهاردة يا فندم
-ربنا يجبر بخاطرك
كلمة عريس لوحدها علت الزغاريط في ودانه،
-٤٦تابع

عريس يعني نيرمين عروستي
يا الله على جمال الخيال بس
الساعة على الحيطة بتدق في عين محمد والساعة في أيده بتدق على قلبه وبرضو الوقت مبيعديش، الساعة جات2 أنا هقوم أروح لها،أنا هقف وأقابلها،مش بيقولو شكلي حلو
يعني هي كانت عمرها قالت شكلك وحش يا محمد
ما إنت عارف إنت شكلك مش العقبة
-٤٧👇🏼

قلبها ومشاعرها هي اللي عمرها ما إتحركت ناحيتك إلا بالحنية والعطف وإنت مقبلتش كدة ومعرفتش تستمر على كدة
بس محمد فضل يروح ويرجع من المكتب للباب فوق ال9 مرات بيسأل نفسه أروح لها ولا بلاش أروح لها، ممكن تقفش
أخر كل المرواح والمجي دا؟
-٤٨تابع

قام راح تحت مكتبها عشان وهي نازلة من العمارة وبتركب العربية يبقى شايفها وهي بتكلمه...
طيب إفرض إتشجعت أشوفها وأوقفها أكلمها، أسلم عليها وأبص في عينيها ويمكن أبقى سعيد الحظ وأبوس إيديها،
أروح لها بإيدي فاضية؟
-٤٩تابع

أنا مش رايح لها البيت
بس أنا نفسي أوي أجيب لها الورد اللي بتحبه فاكر كل الأنواع اللي بتحبها،عايز أجيب لها الأبيض منه
وقف محمد عند محل ورد كبير عشان يلاقي التشكيلة كاملة،نيرمين تستحق كل الأصناف،بس مش عايز أحرجها هجنن أجيب من كل اللي بتحبه مرة واحدة،بس همشي معاها واحدةواحدة
-٥٠تابع

وأخد بوكيه من النوع اللي كان بيخطف عينيها ووقف على أيد الراجل زي زمان يشارك في ذوقه وشياكته.
لسة الساعة 3 والوقت مش عايز يعدي، وكل شوية يبص على البوكيه ويحس إنه قليل، طيب هيجرى إيه لو إشتريت لها شوكلاتة من اللي بتحبها مع الورد،
لأ يا محمد متزودهاش
-٥١تابع

إنت عارف أنا بقالي كام سنة بقف أدام الصنف اللي هى بتحبه ومش قادر أشتريه وإن شالله أبعته مع فاعل خير
لأ لأ لأ كفاية الورد وبعدين أجيب لها كل الشوكلاتة اللي نفسي أجيبها، بلاش عشان مبقاش تقيل.
الساعة أربعة إلا ربع لأ أربعة إلا عشرة بقت إلا خمسة ياه وصلت أربعة
-٥٢تابع

لسة عشر دقايق بحالهم .... يا مهون
-ألو
-بحبك يا نيرمين
-ههههههههههه هو مفيش إختراع إسمه ألو يا محمد
-بحبك أهم من ألو
-طيب يا سيدي عرفنا إنك بتحبني، عايز تكلمني تاني ليه؟
-عشان بحبك بحبك بحبك
-طيب خلاص قولت لي بحبك عايز حاجة تاني؟
-أه عايز أقولك إنك زي القمر
-ميرسي يا محمد
-٥٣تابع

-أنا بقول الحقيقة يا روح محمد
-بعد بحبك، هندخل على وصلة الغزل
-تستحقي الغزل يا نيمو ولايق عليكي
-كتر خيرك، أنا هسيبك عشان رايحة مشوار قبل ما أروح
-هو أنا ينفع أسأل رايحة فين؟
-إبتدينا
-لأ لأ أنا بس كنت عايز أطمن عليكي مش أكتر
-لأ مش ضروري تعرف
-خلاص بلاش براحتك يا حبيبتي
-٥٤تابع

-باي دلوقتي
-بحبك وخدي بالك من نفسك
طبعا محمد مكنش ممكن يفوت الفرصة ويمشي وراها عشان تفضل عينه شايفاها وقلبه مرتاح
الغريب هو تصرف نيرمين طلعت من مصر الجديدة على الطريق الدائري في الوقت دا رايحة فين!
ومحمد الملهوف وراها ...
-٥٥تابع

دخلت الأوتيل اللي على الدائري ركنت وقعت على ترابيزة لوحدها ومحمد واقف يراقبها من بعيد ، النار بتاكل فيه من كل حتة يا ترى جاية تقابلي مين يا نيرمين، من فضلك متعمليش فيا كدة ... وفجأة رن التليفون وكانت نيرمين هي اللي طالبة
-تعالى يا محمد أنا عارفة إنك موجود
-٥٦تابع

-موجود فين وإنتي فين وأنا أجيلك
-محمد أنا عارفة إنك في الأوتيل وعارفة إنك كنت تحت مكتبي وجيت ورايا من هناك لهنا، متنساش إني عشرة قديمة، أعرفك من 13 سنة
-أنا مقصدش حقيقي ألاحقك والله إنتي كنتي وحشاني يا حبيبتي
-أنا مش زعلانة منك أنا اللي جبتك لحد هنا عشان أقعد معاك
-٥٧تابع

جري محمد يجيب الورد من العربية جرررري ورجع قدمه لها وقف متسمر مش عارف ينطق وكأنه بيشوفها لأول مرة وكأنها داست على زرار حبها من أول وجديد!
مش عارف إذا كان سلم صح ولا لأ بس الحمد لله الورد إتكلم عنه
-الله قرنفل أبيض له ريحة.... الله بجد متشكرة أوي... أد إيه مبهج
-٥٨تابع

-الحمد لله إنه عجبك، أول مرة متكشريش في وشي وأنا بديكي حاجة، بداية حلوة شكلها كدة إن شاء الله
-ياه هو أنا كنت وحشة معاك أوي كدة؟
-عمرك ما كنتي وحشة وعمري ما بزعل منك ولا أصلا أعرف أزعل منك يا نيرمين وإعملي فيا أكتر من كدة ولا يهمك
-بس يا محمد كفاية، الكلام دا بيوجعني
-٥٩تابع

-مش فاهم يعني إيه بيوجعك بس حاضر
-أنا جايباك النهاردة عشان تفهم وأزيح الحمل دا من عليك وعليا
-بعد الشر عليكي من الحمول يا حبيبتي هاتي عنك وأنا أشيل
-محمد أنا شربت من نفس الكاس اللي إنت شربته واللي مكنش ليا دخل فيه بس عرفت حجم العذاب اللي كنت بسببه ليك
-٦٠تابع

-أنا مش فاهم عايزة تقولي إيه، نيرمين أنا بحبك بحبك أوي وأي تضحية إنتي عايزاها مني أنا هعملها وأي حاجة هتطلبيها أنا راضي بيها
-بطل تقولي بحبك أرجوك بطل الكلمة دي لو كانت بتضايقني وأعديها زمان، دولقتي مش هينفع حتى إني أسمعها معادش ينفع، تقدر تقول سبق السيف العزل
-٦١تابع

-فيكي إيه، مالك ليه بتتكلمي كدة
-مفيش حاجة بس بطل تقولي بحبك أرجوك
-يا حبيبتي أنا مقدرش أبطلها دا أنا عايش عليها، إنتي متعرفيش لما بنطق إسمك وأقول بحبك يا نيرمين بحس بإيه
-لأ عارفة وعارفة كل إحساس هتقوله بالنقطة والفصلة، عارفة حجم الوجع والعذاب اللي جواك
-٦٢تابع

-طيب ليه عايزة تمنعيني، أنا مطلبتش أكتر من إني أقولك بحبك
-ممكن أسألك سؤال
-إنتي تسألي 100 سؤال إتفضلي
-لو جت واحدة ملكة جمال وفيها مميزات الدنيا وعندها خزاين الأرض من المال وليها نفوذ وجاه وسلطان، وقالت لك أنا بحبك يا محمد وإنسى نيرمين، هتحس بإيه؟
-إيه السؤال الغريب دا؟
-٦٣تابع

-لاحظ إني سألتك هتحس بإيه؟ مش هترد بإيه عشان أنا عارفة إنك هترفض
-أكيد هضايق، بس يمكن عشان مش في الموقف مش عارف اوصف إحساسي بس هو طبعا إحساس سلبي
-أنا هقولك إنت هتحس بإيه عشان أنا في الموقف دا لما بسمع منك كلمة بحبك: في الأول بتصعب عليا وأحس بالذنب
-٦٤تابع

إن عندك مشاعر ناحيتي ملهاش مردود عندي وبعدها رفض شديد عشان أنا بحب حد تاني ولما بتزود العيار بحس إني بتوجع واتألم جامد جدا وبعدين احس بالذنب ناحية اللي بحبه، إزاي سمحت لك تقولي الكلام دا في غيابه، وكل مرة بتقولي بحبك بحس بنفس الإحساس وبدخل في نفس الدايرة الجهنمية دي
-٦٥تابع

-إنتي بتحبي واحد يا نيرمين
-مش هحب واحدة يا محمد
-قصدي إن في واحد في حياتك وبتحبيه
-في حياتي أو لأ دا مش موضوعنا، لكن أنا جبتك هنا عشان أشفقت عليك تعرف في التليفون وعشان أقدر أوصلك أد إيه أنا مقدرة إحساسك،وأد إيه إسترجعت زمان والألم اللي كنت بسببه،
-٦٦تابع

لكن مفيش في إيدي شئ يريحك أو حتى يديلك أمل في بكرة
-مش فاهم
-مش فاهم ليه جبتك ولا مش فاهم إحساسي؟
-مش فاهم يعني إيه بتحبي واحد وواضح إنه حب من طرف واحد زي حلاتي ومع ذلك مكملة، يعني إنتي غاوية تعذيب
-إنت عايز تعرف تفاصيل عن اللي بحبه وبس، لكن إنت فاهم كل حاجة
-٦٧تابع

-منكرش طبعا وعايز أعرف مين إبن المحظوظة اللي عرف يخطف قلبك ومع ذلك مش مع بعض.
-سيبنا من قصتي أنا وهو لإني مش هينفع أحكي أي شئ عنه لأن بجد مينفعش ومقدرش والموضوع تقيل عليا حكيانه وكمان ميلزمكش تعرفه، معندكش غير حل واحد يا حضرة الظابط
-ايه هو
-٦٨تابع

-بسيطة،تجيبني عندك القسم وتستجوبني وتهددني لو مجاوبتش تحبسني مع المجرمين وقتالين القتلة
-تتقطع إيد أي حد تتمد عليكي أو تفكر تزعلك
-طول عمرك نبيل على فكرة،طول عمرك كنت حنين وبتخاف عليا أكتر من نفسي،لكن إنت عارف أكتر مني إن المشاعر مش بإيدي
-هو يستاهلك طيب؟
-مش قولنا متسألش
-٦٩تابع

-بتعيطي ليه، إوعي يكون زعلك ولا أهانك، إوعي بجد مش هستحمل
-إنت تعرف برضو إن في حد ممكن يزعلني
-لا يا حبيبتي، إنتي طول عمرك نوارة الدنيا والكل بيحبك ويقدرك، شفت دا بعيني وعارف قيمتك في عيون الناس
-طيب طمنيني عليكي ليه حزينة وليه هو مش معاكي ولحد إمتى هتفضلي متمسكة بيه
-٧٠تابع

وهو معرفش بيحبك ولا سابك ولا إيه القصة
-ظروف يا محمد ومتسألش أكتر من كدة، المهم تعرف إن لو كان عندك أمل فيا 1%، الأمل دا راح، عشان أنا بحبه ومقدرش أرتبط بحد غيره لأنه بصراحة هيكون موجود ما بيني وبين أي راجل زي ما أنا موجودة ما بينك وبين أي ست!
-٧١تابع

-طيب ينفع تفهميني إيه اللي حصل بس عشان أطمن عليكي؟
-متعصبنيش يا حضرة الظابط وإحترم ذكائي
-خلاص يا نيرمين، أنا فاهم إنتي عايزة إيه
-عن إذنك أنا لازم أمشي
-الموضوع كله مفيهوش إذن يا نيرمين
-تقصد إيه
-٧٢تابع

-بيدق الحب بابنا من غير إذن،
وبنحب من غير إذن الطرف الأخر
والطرف الأخر بيمشي ويسيبنا من غير إذن،
والوجع يعيش جوانا العمر كله من غير إذن ...
-عندك حق أوي
-كان نفسي أقولك بحبك بس عارف إنها هتضايقك، لكن هقولك بتمنى لك السعادة ومرة تانية يا رب يكون يستاهلك
-٧٣تابع

ومش محتاج أقولك إني مستني منك إشارة العمر كله
-متصعبهاش عليا
-بس أنا مش هبطل أقول بحبك يا نيرمين
-ولا أنا هبطل أحبه يا محمد
-الصبر من عندك يا رب
*من غير إذن مشيت نيرمين
ومن غير إذن فضل محمد مكانه
ومن غير أي إذن الدموع مبطلتش من الإتنين
وكله من غير إذن

بقلم
#شيرين_هلال
-٧٤انتهى

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد