رتبها

الإعلام المصرى يدشن حملة تلميع مركزه و(غشيمه) للزعيم السيسى على ضوء تفاعله مع أزمة الداخل الفلسطينى الحاليه , مع بعض بهارات التلقيح على إدارة الهالك مبارك لتبيان الفرق الشاسع بين الأخير (الخائن عميل الصهاينه) والأول (العروبى المخلص المدافع عن أهل فلسطين) 😂

للناس اللى مستغربه من رد فعل السيسى الحالى تجاه احداث غزه والقدس , طالما مستغرب يبقى واضح انك مكنتش متابع احداث الكام سنه الأخيره , او كنت ف واد تانى ...
هاتكلم عن الموضوع باختصار بعد الفاصل .. إنتظرونا 😉

قبل كل شىء دعونا نتفق على قاعده ثابته , كل انظمة المنطقه انظمه وسخه عميله نصبها الغرب فوق رقاب شعوبها علشان تدعم مصالحه وتقمعها وتفشل اى محاوله حقيقيه لنهضتها ...
كلها ... كلها بلا إستثناء ..
أومال ايه الشو القديم بتاع قطر وتركيا ودعم فلسطين اللى كنا عايشين فى وهمه ايام 2000 دا ؟

علشان السيستم الوسخ اللى الغرب عمله دا يستمر ويعمر , لازم يكون فيه نقيضين (ظاهرا) , يعنى انظمه تقوم بدور الشرطى الطيب وانظمه تقوم بدور الشرطى الشرير ..
علشان الشعوب تفضل عايشه جوه الوهم وماتفكرش تكسر قواعد اللعبه وتخرج بره الصندوق الافتراضى اللى محبوسه فيه

الشرطى الشرير كانت بتقوم بيه (ولازالت) انظمه زى الامارت والسعوديه ومصر(حتى فتره قصيره) , والشرطى الطيب مخصص لانظمه زى قطر وتركيا والاردن ...
هاتقولى طب ازاى اذا كانت المحورين دول بيكرهوا وبيعادوا بعض لحد قريب؟!!
أقولك

كونهم بيخدموا نفس الاسياد وتروس فى نفس المنظومه القذره دا لا يمنع حالة العداوه والكراهيه والتنافس بينهم , ودا مطلوب علشان مفيش محور ينفرد بكروت اللعبه ويفكر يشم نفسه ويساوم الغرب زى ما عمل صدام زمان ..
وفى نفس الوقت العداوه دى لها سقف لا تتجاوزه للمستوى اللى يضر سير الآله الكبيره

حدا هايتكلم بقا يقول اصل الدبلوماسيه تقتضى مش عارف ايه وانت عايزهم يحاربوا امريكا يعنى وبلابلابلا...
فكك من كل الهجص دا , وفكك من كل التصريحات اللى بتتقال , ركز كويس فى الصوره هاتكتشف ان الكل فيهم بيخدم على الغرب أولا وأخيرا .. أمريكا ومن بعدها اوروبا

يعنى مثلا لما النظام التركى يروح يدعم ويسلح فصايل سوريا فدا مش معناه انه بيدعم الثوره ولا بيناهض الامبرياليه العالميه ولا بينصر الاسلام ..
دا معناه ببساطه انه بيفرض تدريجيا نفوذه عالفصائل دى وبيركب لهم لجام وسلاسل من غير ما يحسوا ,

بحيث مع الوقت يوصلوا لمرحله يكونوا خدم عنده ميقدروش يخالفوه فى امر , واللى بيقوله بينفذوه , وهو بدوره بينفذ اللى الامريكان (والروس فى مرحلة ما) بيقولوهوله ... وبالتالى ألف مبروك , كان عندك ثوار وكبروا وبقوا مرتزقه وعبيد قد الدنيا , ودا اللى حصل فعلا

نفس اللعبه لعبتها قطر مع فصائل غزه , ولعبتها قطر مع تنظيم القاعده وطالبان , ولعبتها باكستان مع طالبان , ولعبتها ايران مع فصائل غزه برضه (بس لصالحها هى علشان تساوم امريكا بيهم) ... وهكذا

كان بقا عندنا نظام غشيم , ماشى فى تيار محور الباد كاب دا , ولكنه كان فاشل وثقله فى المشروع شبه معدوم لسبب ..
زمايله فى المحور عندهم مقومات قوه , فمثلا فى نظام ثرى جدا وبيصرف ببذخ على اى شىء ريحته وحشه (طبعا عارفينه)..

وفيه نظام تانى ثرى برضه + انه مسيطر تماما على كل باقى انظمة الخليج + انه بيحتكر سلطه دينيه (طبعا عارفينه برضه)..

دول مثلا امكاناتهم بيضمنوا لهم ثقل فى المشروع , طب صاحبنا الغشيم الاولانى , لاهو نظام ثرى ولا معاه نفوذ دينى من اى نوع , بالتالى دخوله عالخط دا افقده ما تبقى له من ثقل فى المنطقه بعد ما خسر القطاع الاكبر بعد معاهدة كامب ديفيد .. عن النظام المصرى أتحدث

ومعروف ان طبيب الفلافسه اللى فى الحكم حاليا كان فى بداية عهده داخل على نفس الخط وماشى فى نفس امتداد الشرطى السىء اللى مشى فيه سلفه ..
لكن مع السنين ومع ظروفه الاقتصاديه المنيله , اصبح بحاجه ماسه انه يصنع لنفسه ثقل اقليمى يخلى الغرب يحافظ عليه كمحور استقرار للمنظومه الاقليميه دى

نضيف لما سبق , حدث تانى اجبره يتخلى عن مهاجمة أكبر طوطم شر اخترعه اعلامه وفضل سنين يهاجم ويشتم فيه ليل نهار ويحمله ذنب اى حاجه تحصل فى مصر ... حركة حماس

اللى حصل وتحديدا من حوالى 5 سنوات , ومع ظهور IS فى سيناء , وتحولها لمصدر تهديد ضد كلا من الخصمين (السيسى وحماس) , وفشل الاول فى تصفية تواجدها منفردا , ومع توافد شريان من الكوادر المدربه المنشقه عن حماس وباقى فصائل غزه والناقمه على سياساتهم , الى فرع IS سيناء ..

كان من اللازم والضرورى ان الطرفين يتجاوزوا خلافاتهم ويتقاربوا مع بعض علشان يشتركوا فى صد كيان جديد بيشكل تهديد لاستقرار النظام فى سيناء من ناحيه , وخطر وجودى يهدد بسحب بساط (الشرعيه الجهاديه بأعين بعض الشباب الغزاوى ) من تحت اقدام حماس من ناحيه تانيه

وقد كان , وتصالح الخصمان , وكوادر حماس بقت كل اسبوعين تالته تروح تعمل تان فى منتجع كوبرى القبه , وأبواق فضائيات صاحبنا اياها , توقفت فجأه عن فقرات سب ولعن حماس اليوميه ..

والاخيره بدورها اصبحت تبذل كل وسعها فى ضبط حدودها واعتقال اى غزاوى يحاول الانشقاق لسيناء , فضلا عن الجانب الاستخبارى وتقديم معلومات وافيه عن العناصر المنشقه بالفعل ومنع وصول اى امداد من الجانب الغزاوى الى سيناء

كدا نظامنا خسر تقريبا تلت مساحة ملعب الشرطى السىء القديم , ومع تطورات الاوضاع فى ليبيا خسر جزء جديد , ومع التصالح الخليجى القطرى ثم التركى خسر ما تبقى من الملعب تقريبا , ومعادش حد يلعب ضده لعبة الشرطى السىء سوى الاخوان !!

وهو اصلا على وضعه القديم كان ثقله الاقليمى شبه متلاشى , ولولا الوضع الجغرافى وتحكمه فى معبر رفح مكانش بقا له اى وجود اصلا فى ملف غزه ...
طب لما نحط التطورات دى جنب تطورات الوضع الداخلى اللى قلتها فوق والظروف الاقتصاديه وصورة الفيلسوف امام الرعاه الغربيين ,

كل دا يخلى النظام المصرى ترس شبه مكسور فى الآله اللى اتكلمنا عنها , ودا يفرض عليه يعيد تموضعه فى مكان تانى فى الآله دى يقدر من خلاله يعيد تلميع نفسه دوليا ويظهر قدام الغرب ك(سمسار إقليمى ناجح ذو ثقل) زى اردوغان كدا , وحليف فعال (زى قطر كدا) ..

والظروف تخدمه , تقاربه مع حماس , وقبوله رغما عنه التصالح مع قطر ثم بدايات التصالح مع الاتراك , كدا سبوبة الشرطى الطيب بقا مجالها مفتوح قدامه اكتر , ورزقها كويس وبتكسب بعكس السبوبه القديمه

مع اشتعال الاوضاع فى فلسطين , اشتغلت التليفونات الامريكيه بسماسرة المنطقه , السماسره اللى لهم نفوذ مباشر على فصائل غزه , وبما ان الاوضاع فى البدايه كانت ماشيه فى اتجاه ان الامور بتخرج عن سيطرة الصهاينه وماشيه فى طريق يهددهم امنيا , من هنا كترت التليفونات الامريكيه

لكن ... كرة التلج كانت اتحركت وصارت قوة دفعها الذاتيه اكبر من ان صبيان الداخل الفلسطينى يوقفوها بضغوط من السماسره الاقليميين الداعمين بأوامر من امريكا ..

فضلا عن ان الداعمين دول ضمنهم ايران واللى بتدفع فى اتجاه استمرار التصعيد علشات تحسن من موقفها التفاوضى مع الامريكان فى فيينا بخصوص العوده للاتفاق النووى

وغير كل دا , التصعيد فى خارج غزه واخد منحنى عفوى لا مركزى وبالتالى فهو شبه خارج اصلا عن سيطرة الفصائل اللى متركب لها لجام وبردعه دى ...
ومع الوقت وغباء الاستراتيجيه العسكريه لفصائل غزه بدأت الامور تاخد منحنى مختلف لصالح الصهاينه (فى اتجاه غزه)

فأصبح الوضع حاليا يتمثل فى استنزاف ضخم لقدرات حماس وباقى الفصائل نتيجة ان ظهر ان الجانب الصهيونى كان يمتلك بالفعل تفاصيل دقيقه جدا عن شبكة انفاق الفصائل ومراكز القياده تحت الارض ومخازن السلاح ,

ودا على ما يبدو مكانش معمول حسابه من جانب الفصائل اللى ظنت انها هاتجبر الصهاينه على طلب الهدنه فى يومين او تلاته من خلال القصف المكثف على الداخل الاسرائيلى

وأصبح الوضع حاليا ان الفصايل بتوافق على اى مقترح دولى للهدنه , بينما بيرفضه الجانب الصهيونى بصلف ويقول انه لسه امامه كام يوم (يخلص فيهم شغله ف غزه) !!!

نرجع بقا للسماسره الاقليميين , طبعا بجانب خدمة الاسياد فى واشنطن , ف من الضرورى ضرب عصفورين بحجر واستغلال الاحداث فى تلميع قيادات الانظمه دى ... فخرج السلطان رجب كعادته يعيش علينا الدور ويهاجم بايدن ونتنياهو , رغم ان نظامه رابع اكبر مصدر عالمى للكيان , دا على سبيل المثال لا الحصر

وعندنا هنا فى شمال افريقيا حاكم تانى رغم عداوته القديمه لاردوغان الا انه بيحاول يقلده , لكن بما انه جديد فى شغلانة (القواده) ف الطبخه فكست منه والدعايا خرجت عبيطه ومضحكه زى ما احنا شايفين كدا النهارده مثلا فى برنامجى الشيطان اللعين والعجوز الشمطاء اللى قبله .. عارفينهم ؟ 😉

يعنى تلاقى مثلا الاسكريبت معمول ألف كلمه , تلاقى كلمة (السيسى) منهم بتاع 700 كلمه , و 90% من المضمون عن حلاوة الريس وعروبة الريس وثقل الريس وخوفه عالفلسطينيين , بينما تلاقى أصل القضيه نفسه لا يشكل اقل من 10% من مضمون الاسكريبت الظباطى دا 😂

فخلاص , طالما معرفناش ناخد اللقطه ونتفوق على منافسينا الاقليميين ونجيب احنا اتفاق الهدنه اللى كان مطلوب مننا فى اول الصراع ... ننصب بقا على شعوبنا شويه , بدل ما نطلع من الشغلانه زلّيطى ملّيطى كدا ...

وبالمره نعمل سبوبة كام مشروع مقاولات فى غزه نشغل بيهم لودرات الجيش اللى قربت تصدى , واهو بالمره الاخ محسن ممتاز يدخل القطاع ويعمل فيه حبة شغل عالسريع كدا جايز ينفع فى المستقبل ...
آدى القصه .. بس كدا 😊

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد