عايزة اكتب عن حاجة حساسة شوية بالنسبة لي كنت ما بحب اتكلم عنها لحدي ما لقيت انو انا ما بعاني منها براي منها و كتير من الناس بعانوا منها ان شاء الله اقدر اساعد زول بالثريد د و لو بنسبة بسيطة .
عايزة احكي عن قصة شفائي النفسي و تجربتي مع المرض النفسي .
عايزة احكي عن قصة شفائي النفسي و تجربتي مع المرض النفسي .
الموضوع بدا من 2017 كانت بتمر بي مشاكل كتيرة ابتدت بانو الفترة ديك اختي الاكبر من اتخرجت من الجامعة ورجعت لأهلي في السعودية الفترة ديك انا حسيت اني وحيدة و ماف زول حوليني كنت مشتاقة لاهلي شديد
بعدها مريت بكمية كبيرة شديد من المشاكل , في البيت كان في الف مشكلة , و في الجامعة كان في الف مشكلة , و حتى حياتي العاطفية كانت ما مستقرة , و فوق دا كلو انا انسانة كتومة مستحيل احكي او افضفض حتى لأقرب الناس لي.
طريقة تعاملي مع كل المشاكل في الفترة ديك كان عن طريق الافلام و المسلسلات و الهرب منها , ما كنت بمشي الجامعة ما برد على المسجات البرسلوها لي الناس ولا حتى المكالمات كنت بتجنب طلعات صحباتي و اصحابي حتى الاعراس بتاعت اخوان و اخوات اصحابي و صحباتي ما كنت بمشيها .
في 2018 لاحظت لنفسي اني ما طبيعية و تعاملي مع الحياة اتغير للأسوء و حاولت اساعد نفسي , مع ضغط الجامعة م كنت بقدر امشي لدكتور عديل ف فتشت عن دكتور ممكن اتواصل معاهو اونلاين و فعلا لقيت بس بعد فترة للاسف الدكتورة بدت تطنشني و ما ترد علي.
لحدي ما جات الثورة و حرفيا كانت مهرب بالنسبة لي انا كان مخي قافل ما بفكر في شي بطلع الصباح بجي راجعة اخر الليل بنام و بصحى تاني اطلع و هكذا , بحكم اني كنت طالبة طب كنت شايلة شنطتي بتاعت الاسعافات الاولية السنة كلها في ضهري كنت بتعامل مع كمية بتاعت دم و اصابات كتيرة بالنسبة لي
دا غير الموت الكان حاصل و القمع و الظلم الكنا بنشوفو كلها حاجات كانت بتحصل و ما كنت بتعامل مع مشاعري في الوقت داك نهائي , لحدي ما جا الاعتصام و كنا بنشوف الموت بطريقة غريبة ارخص حاجة كانت ارواحنا الناس نايمة في امان فجأة تصحى بضرب نار و دم حولينك و الناس بتقع
تكون قاعد في امان الله و بتتونس و بتضحك تلقى قناص موجه سلاحو عليك فكرة انو سلاح يتوجه علي كانت فكرة مخيفة شديد بالنسبة لي و للاسف حتى خوفي ما اتعاملت معاهو.
المهم لحدي 2019 شهر 8 حصلت مشكلة ابسط من بسيطة و كانت بالنسبة لي القشة التي قسمت ظهر البعير
المهم لحدي 2019 شهر 8 حصلت مشكلة ابسط من بسيطة و كانت بالنسبة لي القشة التي قسمت ظهر البعير
اول حل اتعاملت بيهو مع المشكلة اني انهي حياتي للأسف , الحمدلله عندي اهل فاهمين و طوالي ساقوني لدكتورة نفسية اثناء مقابلتي للدكتورة النفسية انا كنت م بتجاوب معاها و بس بعاين ليها و هي بتتكلم و اثناء مقابلتي للدكتورة حاولت انتحر للمرحة التانية حولتني لدكتورة تانية
و اتشخصت بتشخيص م اقتنعت بيهو ولا حتى دكتورتي الاولى اقتنعت بيهو و ما اخدت علاج الدكتورة اقترحت علي اني اجمد السنة و انقطع من السوشل ميديا و فعلا د الحصل , كنت ما بنوم نهاااائي مهما حاولت , لاحظت اني لما اقرا سورة البقرة بليل بنام كويس , فجربت العلاج الروحي بديت بالتأمل م نفع
اختي كانت بتحفظ قرآن في دار جنبنا و اقترحت اني انزل معاها , نزلت الدار و بديت احفظ قرآن ف البداية كنت مستغربة من فكرة اني احفظ قرآن كيف و انا زولة صلواتي ف تلتة و م محجبة و كلي عيوب يعني الله يسترني بس , لحدي ما بديت احفظ سورة يوسف و الشرح مع الاستاذة و البنات و الحلقة
احساس جميل بالسلام النفسي لدرجة ايام الحجر و انا منقطعة من السوشل ميديا و الناس , كنت ما خايفة ولا حتى متوترة ولا حتى زهجانة زهج ساي الفترة ديك حرقت الورق الكتبتو قبل احاول انتحر و هنا عرفت اني بقيت كويسة الحمد لله , الدرس المستفاد من المعط د
اتعاملوا مع مشاعركم و عبروا عنها ان شاء الله لو عن طريقة الكتابة او حتى انكم تفضفضوا لغريب , اي زول بأذيكم باي طريقة ما تتعاملوا معاهو و ابعدوا منو او كلموهو انو مضايقكم , فتشوا عن حاجة بتحبوها و اغرقوا فيها اي يا جماعة اغرقوا في الحاجات و حبوها , حبوا نفسكم انتوا جميلين و
مريحين بكل عيوبكم و كل اختلافاتكم , حبوا من جوا قلبكم و ما تخافوا من شي و مهما الحياة اتقفلت في وشكم ما تهربوا بالانتحار الحياة دي جميلة جدا و فيها ناس جميلين افقدوا الناس الحولينكم يا جماعة لو حسيتوا انهم متغيرين ما تلوموهم حتى لو عشان بتحبوهم لأنو كده حتزيدوا من حالتهم بسبب
شعورهم بالذنب و شعورهم انهم مقصرين, مشوا لدكتور لو حسيتوا انكم ما كويسين صحتكم النفسية مهم بنفس قدر صحتكم الجسدية.
حابة اشكر كل الناس الحوليني الواقفت معاي و الواقفة معاي للأن انا بحبكم جدا و ربنا يحفظكم لي .
حابة اشكر كل الناس الحوليني الواقفت معاي و الواقفة معاي للأن انا بحبكم جدا و ربنا يحفظكم لي .
جاري تحميل الاقتراحات...