أول حاجة عملتها لما دخلت الجامعة إني استقليت ماديا عن أهلي. و لما فشلت في أول سنة في الجامعة قررت إني هسيب البيت (بعج النقاش معاهم و موافقتهم) و أخدت شقة في مدينة تانية (إللي فيها الجامعة).
القرار مكانش سهل بس استفدت منه كتير جدا. بدأت بشقة ايجارها بسيط جدا في مكان مش آوي لمجرد إني أوفر فلوس لأن كان دخلي وقتها مش أوي و كنت بصرف الفلوس بحرص علشان أقدر أكمل الشهر. و مكانش عندي أي مشكلة إني أشتغل في أي حاجة حلال لو مضطر و مش معايا فلوس و عمري تقريبا ما استلفت من حد.
بعدها الحمد لله تدريجي دخلي بدأ يزيد و نقلت لمكان أحسن و بقيت بشتغل فريلانس و بدي كورسات برمجة بعد ما مستوايا اتحسن. بعدها أختي لما دخلت الجامعة جت عاشت معايا و اتحملت مصاريفها هي كمان بعد النقاش مع أهلي و إقناعهم بالعافية (لأن حسب كلامهم مش مضطر لده و بحمل نفسي فوق طاقتي)
بعدها الحمد لله قبل ما أتخرج كان دخلي بقي كويس جدا و بقيت قادر أسافر و استمتع بحاجات آكتر مكانش معايا فلوس ليها قبل كده و جربت حاجات كتير مكانتش متاحة في بداية التجربة لأن الدخل كان يادوب معيشني.
التجربة دي فرقت معايا كتير جدا جدا و خلتني أخد قرارات كتير في حياتي بسهولة و إني سهل اواجه حاجات كتير أو أخد أي قرار من غير ما أكون تابع لأي حد.
لما قابلت زوجتي و كنت لسة متخرج من الجامعة بقالي مدة بسيطة و قررت الارتباط بيها و بعده الجواز. أنا الوحيد إللي كنت صاحب القرار ده لأني تحملت تكاليف الجواز بالكامل بدون ما احتاج مساعدة من أهلي و تحملت مسؤولية قراري.
الحياة مش وردية و عديت بفترات مكانش معايا فلوس أكل لأخر ليومين قدام و كنت برفض حتي أقول لأهلي. و أوقات كنت بتحط في ضغوط مش طبيعي خصوصا الفترة بين الخطوبة و الجواز لأني كنت بشتغل كتير في آكتر من حاجة تجيب دخل علشان مصاريف الجواز للأسف مش بسيطة.
بقارن نفسي دلوقت و الحاجات إللي الحمد متاحة ليا و أقدر أعملها و نفسي من 10 سنين و أنا كنت بصرف حتي تفكيري عنها علشان عارف إنها شبه مستحيلة. الحمد لله علي نعمه التي لا تعد ولا تحصي.
من المواقف الظريقة برضه إللي فاكرها كويس إني اختلفت مع والدي في اجازة تانية ثانوي و روحت إشتغلت شهر عامل في مصنع GLC بتاع الدهانات علشان ما اضطرش أخد منه فلوس و كل يوم بقي منتظر إني هيتراجع و ما اتحملش الشغل و لما ده محصلش حلف عليا ما أروح تاني لأني كنت برجع مبهدل و اداني فلوس😅
جاري تحميل الاقتراحات...