الجمعة ٧ مايو !! وصلت القرية بعد جُهد جهيد . المبلغ الذي مع ٥٨٣ ريال تعادل ٧ الاف بيسو كان علي أن انطلق من دافاو الى مانيلا وفي مانيلا كان لابد من اجراء فحص كورونا . حجزت ليلتين في هوستل الغرفة عبارة عن زنزانة متر ونصف في ٣ متر . دفعت مبلغ ١٨٠٠ بيسو أجرة ليلتين ودفعت تأمين
التأمين مسترد ١٢٠٠ بيسو . صار باقي معاي فقط ٤ الاف بيسو . خرجت المغرب من الهوستيل ورحت مطعم قلت افطر واتعشى واتسحر ثلاثه في واحد لأن الليله مافي اي شي تسويه وارجع انام في الزنزانه لبكره . في الأكل لا تمزح معاي وخصوصا اذا جوعان ما افكر في الاقتصاد ولا الوضع المالي 😂 لا تمزح اقولك
فرمت صحن برياني و جاني شعور غثيث انك لسا جوعان ومشتهي تاكل وجالس اقول لنفسي حتندم لو اكلت لأن شايل المراره وحتصيبني تخمه قلت انتظر صديقي يجي وبعدها ناكل 😂 جا حبيبي ابوسامح وجلسنا نسولف وطلبنا بطاطس وفلافل واضرب ياعم وانت تسولف لحد ما كبس علي النوم والساعه ماوصلت ١٠ في الليل
رجعت الهوستل معايا ٣٤٠٠ بيسو تقريبا وهذي اللي راح اسوي فيها فحص كورونا واخذ تاكسي للقرية . طبعا مررره ماتكفي لما وصلت الهوستل الباب مغلق بسلاسل انا انصدمت فتحو لي الباب ودخلت طلعت فوق اريح وبعد ساعه جاتني شرقه قلت ياولد انزل اشتري مويه ودخن سجاره قبل النوم . نزلت وكانت الصدمه
لقيت خال نيجيري جالس وحاط مروحه اكتشفت بعدين انه طالب جامعه يدرس طب . طالع فيني وقال Lockdown ممنوع تطلع يكلمني وكأنه رئيس الفلبين وكأني الإبن العاق اللي ما يسمع الكلام 😂 قلت فيه بقاله داخل الهوستل ؟ قال لا . قلت اموت من العطش مثلاً ؟ رجع للجوال ويكلم اتصال فيديو : im here baby
الآن في هذي اللحظة الشهقة اختفت صار عندي مشكلة اني ادخن قبل انام : تنويه كاموستي الدخان مضر بالصحه وانتبه تدخن واذا تدخن وقف دخان مايصلح . مسكت معاي ولفيت الهوستل بالكامل مالقيت مكان مفتوح لا بلكونه ولا سطح ورجعت الزنزانة قلت تعوذ من ابليس ونام وللاسف ولعت السيجاره في الزنزانة
احب اتبع النظام ولا احب اخالف لكن حدوني على الردى 😂 قلت لو دوتيرتي يجي اليوم ما يهمني . الواحد ضايق صدره ووراي يوم حافل بكره دخنت وجلست اقلب في الجوال الى ماجاني النوم ونمت وهات ياكاموستا أحلام مضاربات وطوابير في مستشفيات وكل ما وصلني الدور في الحلم امسك طابور جديد 😂
نايم وكأني نايم في الشارع . صحيت الساعه ٨ الصباح بدون توقيت او منبه وقلت امكن الرياجيل من بدري . اخذت دش وغيرت ملابسي وطبقت الشناط على أساس مستحيل أجلس ليله ثانيه في الزنزانه حتى لو تضيع اجرة ليله ما يهم بس ما راح ارجع لشنطتي الا عشان اخذها وامشي للقرية .
وصفولي عيادة قريبه ، احتاج اقطع الخط للجهة الثانية وامشي مسافة واحصلها طبعا هذا اللي فهمته من الاستقبال لكن مشكلتي افكر وقت الازمات بشكل معقد حتى أكسب الوقت . قلت اركب تاكسي حيكلفني ٧٠ بيسو اكشف المنطقه سريع و اذا ما حصلتهم كلمت التاكسي يشوفلي مكان رخيص وينزلني وياليت ما فكرت 😂
لما وصلت قدام العياده ما شفتها وكلمت التاكسي ولف يمين طوالي ودخل مسافة طويلة وسط الحي ونزلني عند مستشفى وحاسبته ٧٠ بيسو وكلمتهم سالتهم اذا عندهم فحص كورونا عن طريق تحليل الدم لانه ارخص . قالي موجود ٢٨٠٠ بيسو قيمة التحليل ١٥٠٠ بيسو استشاره 😓 جلست اطالع فيه وعقلي يفكر بال ٧٠ بيسو
خرجت من المستشفى ورجعت مشي للشارع اللي وصفوه لي . 😂 امشي واضحك على تصرفي البايخ مع نفسي اكتشفت ان التاكسي دخل مسافة طويله وانا راجع مشي من نفس الشارع 😂 ياخي من القهر قاعد اضحك على الحركة الغبيه اللي سويتها تدفع فلوس عشان ياخذك مكان ولما توصل ترجع مشي نفس المسافة 😂
نهاية الشارع بوجهي حصلت العياده لو ماركبت التاكسي كنت حصلتها بسهوله جدًا. المهم دخلت لقيت ممرضات يفتحون النفس وترتيب ونظافة وعندهم كل التحليلات اللي تبغاها . سالتها قلت ياملاك الرحمه الجميل بكم فحص الدم قالت ١١٠٠ بيسو والنتيجة بعد ٣٠ دقيقه قلت اعطيني واحد سفري . عبيت بياناتي
ودفعت الفلوس قالت خذ الورقه هذي وانتظر ينادون اسمك . طبعا انا الوحيد الموجود بعد ما قالت ينادون اسمك واحد واقف بعد ٥ ثواني نادى اسمي 😂 قتلني فكيت ضحك وانا متبهذل وقال تعال معايا . سولفت معاه طلع اشتغل في تبوك في ٢٠٠٨ و ضبطني بالتحليل وصرنا اصحاب وخرجت من عندهم تحليلي معايا
٣٤٠٠ ناقص ١١٠٠ بيسو ناقص ٧٠ بيسو 😂 صار باقي معاي ٢٢٣٠ بيسو والهوستل عنده تامين ١٢٠٠ بيسو صار كل ما املكه ٣٤٠٠ بيسو . اجرة الذهاب للقرية تكلف ٣٠٠٠ بيسو طبعا اقدر اطلع باص واوصل ما تكلفني ٤٠٠ بيسو لكن معاي شنطتين والمواصلات مع كورونا لازم تبعد عنها فما فيه حل الا سياره خاصه
وقف ليش ما معاك فلوس ؟ بطاقتين صراف كلها نسيتها في القريه من يوم سافرت دافاو وماشي على تحويلات اكترونية وما فيه امكانية احد يروح ويسحب من الصراف ويودع في محفظتي قلت لازم ارتب اموري على المبلغ الموجود معاي . وفعلا اتفقت مع تاكسي واعطيته ٣٢٠٠ بيسو وطلعت من الهوستل
حسابي في السناب اذا حاب تتابع حياة كاموستا في الفلبين snapchat.com احيانا انزل شغلات حلوه ممكن تفيدك ❤️
جاري تحميل الاقتراحات...