المفهوم الشائع ان لو حصل طلاق في الغرب الست بتاخد نص ثروة جوزها ده مفهوم خاطئ. اللي بيحصل ان لو هي عاملة اي مدخرات او املاك الاتنين تحصلوا عليها بعد تاريخ الزواج بيتم تقسيمها بالنص. الزوج مثلاً لو جايب شقة او بيت قبل الزواج زي ما بيحصل عندنا فده بيكون برة التقسيمة
لو الزوجة مثلاً دخلها كان اعلى وعندها مدخرات اعلى الزوج هو اللي بياخد مش الزوجة. الطرف اللي دخله اعلى هو اللي بيصرف على الاطفال او بينقسم مصروفات الاطفال عليهم بالنص. لو مدة الزواج قصيرة غالباً ما بيكونش الزوجين لحقوا يمتلكوا حاجة اصلاً.
في اغلب الاسر المتوسطة البيت هو الملك الوحيد والبيت مثلاً بيبقى عليه اقساط 25-35 سنة فلو حصل طلاق بعد 5 سنين البيت بيتباع وباقي ثمنه بيتسدد للبنك الاول والباقي بيتقسم بين الزوجين فمحدش هيبقى مليونير بعد تسوية زي دي
طيب لو الزوجة غير عاملة او الفرق بين دخلها ودخل زوجها كبير جداً (واحدة عادية تزوجت ثري)؟ في الحالة دي المحكمة بتلزم الزوج يدفع spousal support للزوجة بعد الطلاق ودي بتبقى نسبة بتحددها المحكمة من دخله شهرياً. المحكمة بتعتبر ان الزوجة ضحت بمستقبلها المهني بسبب مسؤوليات الزواج
وان بمجرد زواجهم في بينهم التزام انهم يساندوا بعض. النسبة دي بتتوقف على عدة عوامل زي مثلاً مدة الزواج (اللي دعمته وفتحت بيته وربت عياله 25 سنة غير اللي بقالها 3 سنين). مستوى دخل الزوج بعد الطلاق. تاريخ علاقتهم اثناء الزواج. التضحيات. سن الزوجة عند الطلاق وفرصها في الحياة الخ
لو الزوجة صغيرة في السن بتبقى النفقة دي مؤقتة واحياناً مشروطة بأنها تستقل مادياً بعد عدد من السنين. تكمل دراستها. تدخل سوق العمل. تتعلم مهارة جديدة. وممكن تبقى النفقة مؤقتة بجدول زمني بتتشال منها نسبة معينة لصالح الزوج كل فترة. الهدف مساعدة لغاية ماتقف على رجليها (الفضل بينكم)
ده غير طبعاً الاعانة اللي الحكومة بتقدمها في الحالات اللي زي دي وخصوصاً. كل الكلام السابق يحق للزوج لو هو الطرف اللي دخله اقل او معدوم. قضايا الطلاق بتاخد وقت فأغلب الناس بتحاول توصل لتسوية مادية ده لو في حاجة يتم تسويتها وفي وسطاء للتسويات دي وبيكون الهدف ان اقل عدد يوصل للقضاء
فالموضوع يعني مش granted هتطلق وتاخد نص فلوسه وتجري. لا مش كدة. ده لو جاب لها هدية قيمة بعد الزواج زي مجوهرات او عربية كله بيدخل في التسوية بس هي الناس بتحاول تبقى لطيفة مع بعض
فاللي بيقولك الفلوس تتقسم 50% 50% بعد الطلاق عندنا اقوله ما ينفعش الا لو قبلت العريس بدون شقة او مهر او شبكة. يبدأوا حياتهم بطولهم وعلى قد دخلهم زي ما بيحصل هنا
لازم نصلح الاول منظومة الزواج قبل ما نصلح منظومة الطلاق ونحدد احنا عايزين اية.. شرعي ولا مدني؟
جاري تحميل الاقتراحات...