ثريد عن كيف بدأت بالكتابه 📈🖊
كنت في رابع إبتدائي وكان كل اللي أعرفه أجتهد بدراستي وأجيب درجات حلوه ترضيني 👧🏼 ويكرموني بمجلس الأمهات ..✅ مجلس الأمهات للي مايعرفه حفل يُقام لأمهات الطالبات وتكرم فيه الطالبه المميزه وأمها كان أكشن فضيع وحدث مهم بالنسبه لي ..يتبع
اليوم اللي يُقام فيه حفل الأمهات مافي دراسه فقط التكريم لمدة ساعه ونطلع 🏄🏻♀️ وقتها كان عمي يوصلنا لحفل التكريم وبحكم إنه ساعه ونخلص والبيت بعيد جلس ينتظرنا بالسياره قدام المدرسه 🚗🏢 وتم الحفل وطلعت وأنا أحس إني مستلمه جائزة الأوسكار وركبنا السياره انا وأمي الحبيبه …يتبع
وبارك لنا عمي بس قال دقايق اخلص اللي بيدي سألته ايش اللي معك شتسوي وكان منهمك جداً ومعه قلم ومرررركز قال هذي كلمات متقاطعه وشرح لي فكرة حلها كان قارئ شغوف بالقراءه ويومياً لازم يجيب جريده ومن كثر حبه للموضوع يقراها بالسياره لزوم التركيز والخصوصيه👀..يتبع
عمي كان معروف بحيه للقراءه وأنا حبيت جداً فكرة الكلمات المتقاطعه مجموعة حروف لمن لايعرفها واسئله الإجابه تطلعها من الحروف مثلاً من هو ولي العهد السعودي؟ 🤔 أنت مطلوب منك تحصّل حروف إسم محمد بن سلمان توصلهم ببعض بدون إنقطاع او ميلان تكون على إستقامه وحده…يتبع
صرت اوصيه كل يوم لاتحل الكلمات المتقاطعه انتظرني بحل معك كان يقرأ واذا خلص يناديني أحل حماسي مليووون إذا لقيت الإجابه قبله وبعد سنه بديت أقرأ بشكل يومي وماتفوتني زوايا الروائي القدير غازي القصيبي رحمه الله وعدد من الكتاب السعوديين ..يتبع
استمتع جداً بقراءة حول العالم للكتاب السعودي فهد عامر الأحمدي كونه يتكلم عن دول ماشفتها هنا اشتغل خيالي وصرت احاول اكتب واقطع الورق وادور القاب🤣🤣 الألقاب ماراح اقولها عشان ماابي طقطقه وهكذا صرت اعبي دفتر …يتبع
دفتر لما ابدأ اكتب فيه أتخيل غازي القصيبي والأحمدي مستضيفيني بمكتبهم من كثر ماانا مستغرررقه جداً بالخيال .. طبعاً بعد ماعرفت المقارنه ظالمه بين القصيبي والأحمدي وجميعهم كتاب مبدعين في مجالهم .. انا هنا استمريت أكتب بدفتري وآخذه الوضعيه في البدايه كانت خربشات…يتبع
اشتريت كتب غازي القصيبي والأحمدي واستمريت أكتب لنفسي أتذكر إني كتبت نص لعصفور كان بنافذة غرفتي 😂😂😂😂 والمضحك جداً إني زعلت من كثر مايقولون الناس الناس عشان الناس اذا جو الناس إذا راحوا الناس تحسبوني سكتت لاااا ياحبيبيني صكيتهم بنص أسمه " يعيشون بأقنعة الإخفاء"ههههههههههههههه🤣
في ثالث متوسط كان أول نص جاد لي وفكرت أنشره واتواصل مع الشرق الأوسط عشان يصير لي زاويه زي غازي القصيبي والأحمدي ههههههههههههههههههه وكتبت النص وارسلت عمي لمكتب جريدة الشرق الأوسط النص كتبته بلقب من القاب الطيبين وقتها 🤣🤣🤣🤣 يتبع
والمفاجأه النص واافقت على نشره جريدة الشرق الأوسط الحلم تحقق🤚🏻📈😎 وأنا الحين صديقة القصيبي والأحمدي 😂بخيالي طبعاً بس بشررط الشرق الأوسط عشان ينشرون لازم إسم حقيقي وليس لقب ينشرون بلقب بس لابد معلوماتي الحقيقه تكون عندهم …يتبع
هنا طبعاً رفضوا اهلي كلهم الموضوع طبعاً لو كنت بوعيي الحالي نشرت واللي يصير يصير لكن مثل مايقال "لكل زمن دوله ورجال" .. وبعدها صرت اكتب بالمنتديات وبدفاتري الخاصه وبين صديقاتي واكتب لهم رسايل لمعلماتهم واستمريت اكتب بين اوراقي لنفسي وللمقربين مني..يتبع
وبعد المنتديات كتبت في السوشيال ميديا وفي كتابة المحتوى وكتبت قصص قصيره وابيات شعريه بالفصحى كوني شغوفه جداً بالأدب الفصيح … اتمنى تكونوا استمتعوا شخصياً اكتب وأضحك ممكن لأني عشت الأحداث بواقعي واتذكر تماماً كيف كان خيالي🤣🖊
@Lowlip2 يسعدني إطّلاعك
جاري تحميل الاقتراحات...