الحمد لله الذي أحيانا بعد ما أماتنا.
ده التوصيف اللي اقدر اقوله للي حصلي من أول اسبوع في رمضان بسبب كورونا.
أنا عادة شخص ملتزم ومليش في الخروج وفي التجمعات والعزومات، مرة وحده بس ماخدتش إحتياطاتي وزهقت ودي كانت سبب الإصابة، انا شخص رياضي ومش بعاني من اي امراض مزمنة

وكتله جسمي عضلية، ده ممنعش عني السخونة لدرجة الهذيان، صعوبة التنفس، الترجيع والم المعدة،الهمدان وعدم القدرة على الحركة، فقدت السيطرة على كل وظائف جسمي، لدرجة أني كنت بلاقي صعوبة اقلب نفسي لما ضهري يوجعني من النومة،
انتظار المجهول صعب ومُحطم للأعصاب بشكل لا يمكن تخيله.

تأجيل الخطط وصعوبة العمل والخوف من كونك مصدر خطر على اللي حواليك أمر بيدمر الحالة النفسية، ده وانا شباب ورياضي ما بالكم بأبوك او امك او شخص عنده امراض مزمنة، حرام عليك تكون سبب إنهم يشوفوا العذاب اللي أنا شوفته ولسه لحد دلوقت مش عارف تاثيره وقف ولا ليه توابع

كل اللي اقدر انصح بيه حضراتكم إنكم تقعدوا قدر المستطاع في البيت؛ تاخدوا التطعيم؛ تلبسوا الكمامة في حالة خروجكم من البيت؛ وتلتزموا بالتباعد.
الوضع في طريقة للخروج عن السيطرة والمطلوب فقط الالتزام بالاجراء لحد الصيف؛ يمكن وقتها الموجة تخف شوية.
ومنفقدش حد عزيز علينا

ارجوكم ابعدوا عن أي وحده حامل
مفيش وحده حامل اتصابت معايا وخرجت من العناية تاني، كلهم توفاهم الله، اكبر وحده فيهم ٢٦ سنة، لحد دلوقت بعاني من صداع غير محتمل على فترات وكحة شديدة مزعجة جدا، ولسه محتاج وقت كمان، شكرا لكل حد لاحظ غيابي وسأل وإن شاء الله ارد على الرسايل قريبا