بمناسبة بقا ان كل الناس بدأت تكشف عن امراضها النفسية بسبب خلي بالك من زيزي .ف انا قررت لأول مرة أواجه نفسي بالحقيقة واتكلم عن حاجة بمر بيها بقالي سنين كتير ومحدش يعرف عنها حاجة وكنت بخاف حتي اني اقولها بيني وبين نفسي.
انا طول عمري بعيط بسبب وبدون سبب.. مبتبسطش حتي لما بكون وسط ناس بحبها بقول انا هروح وابقا لوحدي وفالمستقبل هيمشوا وهبقا لوحدي ف اتبسط ليه اصلا؟ طول الوقت بفكر بسلبية ومعنديش شغف ولا احلام.. حتي فثانوية عامة كنت عايزة انجح عشان افرحهم بس مكنش في كلية بحبها اوي وهموت لو مدخلتهاش
بخاف من المستقبل جدا وبحس اني عايزة اهرب من دماغي ومن تفكيري طول الوقت. بقعد اقول انا هعمل ايه لو حد من اللي بحبهم مشي او حصله حاجة..انا هعمل ايه لو اتخرجت وفضلت مليش لزمة بردو وقاعدة وخلاص.. انا هعمل ايه لو بقيت لوحدي.. مكنتش بنام من التفكير حرفيا وبقا عندي ارق وكسل طول الوقت
واوقات تانية ممكن انام يومين مصحاش غير ساعتين فيهم مثلا. مبقتش بحب اعمل حاجة ولا اكلم حد ولا اسأل على حد وطول الوقت تفكير وخوف من حاجات مجهولة وبس لدرجة ان في ناس كتير بقت تشوفني سلبية فعلا وكئيبة طول الوقت
بقيت ابعد انا عن الناس اللي بحبهم اصلا وبقول ابعد انا احسن ما فالمستقبل هم يبعدوا عني واتعب اكتر.. من سنة تقريبا شكيت ان اللي انا فيه ده مش طبيعي واكيد مفيش حد بيفكر في كل السلبيات دي الا لو عنده حاجة نفسية.
وقابلت فعلا بالصدفة من سنة واحدة اعرفها قريبتها اخصائية نفسية وادتني رقمها واتكلمت معاها وشرحتلها اللي عندي موبايل عشان كنت خايفة اواجه..وقالتلي ان عندي حاجة اسمها كرونوفوبيا واني اكمل معاها واروحلها وتبدأ تديني مواعيد sessions نتكلم فيها عن كل حاجة بس كالعادة خفت ومكملتش
قريت عنها كتير وبدأت افهمهاواقول لنفسي لا ايه الهبل ده انتي كويسة عادي مفيش حاجة لحد الفترة دي لما شفت قصص ناس كتير بسبب المسلسل بدأت اقتنع اني اواجه نفسي واحاول اتغلب عاللي عندي واكون احسن ونفسي بجد ده يحصل عشان حاسة ان كتر التفكير والخوف والاكتئاب اللي عندي ممكن يخلوني اموت..
جاري تحميل الاقتراحات...