١- السنة اللي فاتت، فيه شاب مصري لقوا جثته متحللة في حاوية نقل بضايع بحرية وصلت لشواطيء دولة الباراجواي في شرق أمريكا اللاتينية، وكانت جاية من صربيا، مع جثث 6 شباب آخرين من جنسيات مختلفة.. الطب الشرعي في الباراجواي قال إنهم غالبا مهاجرين غير شرعيين كانوا بيحاولوا يدخلوا أوروبا...
٢- لكن عصابات التهريب خدعتهم ورمتهم في الحاوية اللي داخلة المحيط ومش هترجع.. الشرطة الباراجواية لقوا جنب الجثث بقايا أغلفة وجبات أكل خفيفة، ودا دليل على إن رحلتهم كانت المفروض قصيرة ومكنش معاهم أي حمولة سفر أو حاجة تقول إنهم رايحين آخر الدنيا في رحلة استمرت ٣ شهور جوا المحيط..
٣- أغلب المواقع العربية للأسف مكتبتش عن الواقعة، لكن الصحف اللاتينية طبعاً كتبت عنها، المؤلم كمان إن الحاوية مرت في رحلتها على مصر وتوقفت فيها كمان عدة أيام، يعني الشاب المصري ممكن يكون كان بيطلع في الروح وهوا بيعدي من على شط بلده، وفي الآخر اندفن بعيد عن أهله بآلاف الكيلومترات..
٤- اندفن في مقابر محدش هيزوره فيها ليوم الدين! قصة زي دي وغيرها من البلاوي اللي الواحد سمعها عن الشباب المصري اللي رمته الظروف، تكسر القلب والله وتحزن على حال الشباب، وتلعن ألف مرة اللي كان سبب في بهدلته البهدلة دي كلها.. اللي يعدي ع الكلام ده، ياريت يقرأ الفاتحة على روحه ورحهم.
جاري تحميل الاقتراحات...