أعتقد أكبر مشكلة عانت منها ومازالت هذه المنطقة ما بعد الاستعمار إنها لم تأخذ من الغرب وحداثته التطور التقني إلي بجد مفيش فيه "اختراع للعجلة" وبدلاً من ذلك تخيلت أن التقدم سيحدث عبر الأفكار والإيديولوجيات سواء يمين أو يسار دون إدراك إنها نشأت كرد فعل على واقع اجتماعي مغاير لينا!
بمعنى الأفكار والأيديولوجيات الغربية مش هي إلي أدت لتطور المجتمع بقدر ما كانت نتاج تفاعلات وصراعات وسياقات تاريخية ودينية واجتماعية تخص هذه المجتمعات وأنتجت بالنهاية أفكار جينا إحنا في بيئة مختلفة وأخذناها وتخيلنا إننا قادرين نبدأ من حيث أنتهى الآخرون ونتقدم عبرها بمعزل عن واقعنا
أعظم اجتهاداتنا كانت اللعب بالمصطلحات - على سبيل المثال بدل ما نقول "ديكتاتورية البروليتاريا" فطلعنا بمصطلح "تحالف قوى الشعب العامل" وبدل ما نقول سوق حر طلعنا بمصطلح "الانفتاح" وعشان نؤكد أسبقيتنا مثلاً فقلنا "الشورى" هي "الديمقراطية" وعظمة الإسلام إنه معملش نظام حكم، وهكذا ترقيع
من ضمن موجة "إستيراد" الأفكار تخيل البعض إن الأزهر ده نظير "الكنيسة" في القرون الوسطى وأن "التنوير" هيحصل أول ما نسحب الفيشه منه إلي فعليًا ملوش دور ولا سلطة وبعدها الدينامو هيشتغل أوتوماتيك وننور كلنا والمرأة تاخد حقوقها تمامًا زي ما حصل بالغرب ونرجع لأيام القاهرة أحسن من باريس
السؤال: هل فعلاً "إستيراد" الأفكار إلي كانت نتاج مجتمعات مختلفة جذريًا عنا هي الحل ولا إننا نطور واقعنا عبر فهمه والتعامل معاه؟ هل كانت جرعات "التنوير" والتحولات يمين ويسار في صالحنا ولا كانت نكبة علينا وخلقت واقع مشوه بدلاً من تطوره بشكل طبيعي فنتيجة الاستعجال ديما الطبخة بتبوظ؟
هل نحن بحاجة لنسف الإسلام وده كفيل بتطور المجتمع، ده طبعًا لو حد عنده قدرة، ولا "العلمانية" هي الحل، ولا الضحك على الشعوب بأنظمة دينية بيد سلطة قوية خارج نطاق "الإسلاميين" ولا العودة للتقاليد الدينية وتطويرها بشكل تلقائي بحكم ضرورات الحياة - أي عودة الإسلام لما قبل 22 مارس 1928؟!
هل حقوق المرأة في الغرب انتجت مجتمع صحي ولا له آثار جانبية تفوق مكاسب "حقوقها" وهل الحقوق دي حصلت عليها نتيجة "صحوة ضمير" ذكورية أو "نضال" للمرأة أم واقع حربين عالميتين بالحقيقية كانت حرب أهلية أوروبية، شطبت أجيال من الشباب الرجال فوجد المجتمع إن قوته العاملة غالبيتها نسائية؟
قبل ما نُشع تنوير ونكهرب نفسنا والآخرين قد يكون من المفيد ناخد نفسنا كده ونفكر بشويش!
جاري تحميل الاقتراحات...