رتبها

#سبيس_تاريخ_السودان محاولة لتعريف الناس بالتاريخ اللي هو جزء من #تعرف_على_السودان و خلال الثريد دا حأحاول ألخص ليكم النقاط الأتكلموا عنها :
@JabooMujtaba | @The_Tasetian | @TEHARQA
و هو محاولة لتبسيط تاريخ السودان للكُل منذ العصور القديمة حتى الآن ف #يلا_ثريد ⬇️

في البداية السؤال المهم ليه نحن لازم نعرف تاريخنا؟
الاجابة ببساطة انو دراسة التاريخ بتخلينا نعرف هويتنا كويس وأصولنا السودانية ودا بيخلينا نرتبط أكتر بوطننا و بيزيد من الانتماء ليهو لأننا عندنا تاريخ عظيم لما نعرفه حنعتز بالسودان أكتر وأكتر

الحاجة التانية انو نحن لما نعرف تاريخنا حنعرف اجدادنا عملوا شنو وكيف نستفيد من اخطائهم لأن التّاريخ من أهم العناصر الّتي يستند عليها أي مجتمع في تطوّره أو انحطاطه ولأن تاريخ اجدادنا كان حاضر في أحد الأيام لازم نستفيد منه ونطور الجيد و نتجنب الأخطاء

ما هو الضرر البيقع اذا ما عرفت تاريخك؟
عدم معرفة التاريخ بيخلق اجيال بدون هوية مهزوزة ما عارفة هي منو في وسط عالم معتز ومهتم بتاريخه وبيعظمه وبيستفيد منه , وعدم معرفة التاريخ بتخلي الاجيال دي ما عندها اي ولاء للسودان ومن ثم ما عندها رغبة تطوير او بناء لعدم احساسهم بالانتماء

بتخلق عملاء وناس منتفعين وناس ما عندهم همّ تطوير و بناء هذا الوطن لأنه ببساطة ما بيعتبر الارض دي فيها جذوره وما عارف ان جده في يوم من الايام كان ملك عظيم , ما بيكون عنده تمسك بالاخلاق والقيم الرفيعة الخلاها ليهو اجداده وكانت سبب في شهرتهم بين الأمم

بيخلق أجيال أنانية بتفسد وتسرق وتهدم الوطن لأنهم ببساطة شديدة ما عندهم شي للوطن وبتخلي كل واحد همه انه يطلع يعيش في وطن شعوب أخرى ويترك أرض الوطن وراه لأنه (ما عنده ليه شي ) هو ما عارف تاريخه وما حاسي بالانتماء و حيكون غريب في أي مكان تاني وجواه حلقة مفقودة دائما

عايزة اوريكم انو من خلال #سبيس_تاريخ_السودان حيكون في تعريف بالتاريخ بتدرج متسلسل من العصر الحجري لغاية الحاضر بأسلوب يتفهم للكل بدون تعقيد يعني اي زول حيفهمه

يلا نجي للسودان وتاريخه :
السودان يعتبر من أقدم الأراضي التي عاش فيها الانسان ووجدت اثار قديمة من ازمان سحيقة دليل على وجود الانسان منذ العصور الحجرية والعصر الحجري بيسموه كدة لأن الانسان كان يستخدم الحجارة ويصنع منها ادواته البيعمل بيها نشاطاته زي الصيد مثلا

وكان في تطور للأدوات في العصور الحجرية يعني في البداية بنلقاها كبيرة وغير مشذبة وشوية شوية الانسان طور فيها وخلى في انصال حادة وادوات مسننة ومقابض حسب الاستخدام ووجدت آثار في مناطق مختلفة زي الخرطوم والشاهيناب شمال امدرمان وخورابوعنجة وشمال السودان في مواقع مختلفة

وهنا كلام عن انسان سنجة

وفي مواقع أخرى زي السقاي والسروراب وعدة مواقع حول مدينة شندي والبطانة ومواقع اخرى كتيرة كلها مواقع وجدت بها اثار للإنسان في العصر الحجري بتصنيفاته التاريخية المختلفة وفي مواقع خضعت لدراسة متعمقة لأنهم وجدوا آثار كتيرة زي موقع الشاهيناب

وقسم العلماء الاثار دي باسماء زي المجموعة (أ) و(ب) ...(x) حسب اشكال الفخار و طريقة الدفن وكدة وفي مسميات تانية كمان لأشكال الحضارة دي لكن المتفق عليه انو الحضارات نشأت في السودان منذ الحصر الحجري وممكن اذا حبيتو الموضوع أفصل أكتر في العصر الحجري في ثريد تاني