انا اخدت لقاح استرازينكا يوم 13/4 ومن وقتها وانا فى كوارث معرفش اخرتها هتبقى ايه، فى الثريد ده هحكى تجربتى بالتفصيل من اول ما اخدت اللقاح لحد اللحظة دى
انا قدمت على اللقاح على موقع وزارة الصحة عادى ولانى قدمت مهن طبية فالرسالة فى خلال ٢٤ ساعة كانت جاتلى بمكان وميعاد التطعيم وروحت فعلا واخدت اللقاح الى كان متاح هناك والى كان استرازينكا ولحد هنا الدنيا تمام، الكلام ده كان يوم 13/4 زى ماقولت
طبعا انا كنت عارفة من قبل ما اخد اللقاح ان استرازينكا بتبقى اعراضه قوية شوية بس كلها بتنحصر فى سخونية وهمدان وتكسير فى الجسم وانه يومين والموضوع هيعدى وكنت مهيأة نفسى على كده، بس الحقيقة انى محصليش اى عرض من دول واول يوم عدى بسلام
المشكلة بدأت تانى يوم المغرب بمغص فجأة غير محتمل وغثيان وقئ مش بيقف، حاولت اخد ادوية تسكن الالم او توقف القئ بس كان الموضوع بيزيد للاسف فنزلنا المستشفى، انا وقتها نازلة وانا حرفيا مش قادرة اتحرك ولا افرد ضهرى من الوجع
علقت محاليل واخدت ادوية كلها تخص المعدة عشان تسكن الالم( الى انا لسه لحد متعافيتش منه بالكامل ومعرفتش سببه حتى) والدكتور وقتها طلب تحليل d dimer لانه شك انه يكون حصل اى تجلطات نتيجة للقاح( والحمد لله انه شك)
تانى يوم عملت التحليل وفعلا طلع عالى نسبته كان 1.2 وهحط صورة التحليل برده، الدكاترة كلهم اتفقو انى لازم ابدأ اخد ادوية سيولة واكرر التحليل تانى كمان خمس ايام عشان نتاكد انه مبيزيدش، اخدت Rivarospirin 10mg مرتين فى اليوم وبعد ٥ ايام عيدت التحليل
عشان اتفاجئ ان الd dimer زاد اكتر من خمس اضعاف وبقى نسبته 6.4 ودى طبعا نسبة عالية جدا ومعناها ان risk الجلطات عالى والله اعلم لو مكنتش عملت التحليل من الاول وباخد ادوية السيولة كان هيحصل ايه، ودول التحليلين
انا حاليا باخد ادوية سيولة قوية مرتين فى اليوم مسببالى bleeding عنيف لدرجة ان الهيموجلبين بتاعى نزل من 10.5 ل 8 فى اقل من اسبوع! وطبعا ولا هينفع اوقف ادوية السيولة عشان مزودش risk الجلطات ولا هينفع اخد ادوية توقف النزيف لانى هبقى كده بعاكس مفعول ادوية السيولة
والهيموجلبين لو فضل ينزل بالمعدل ده انا هدخل فى قصص نقل دم. ده بجانب ان الدكاترة طالبين اشاعات بالصبغة على كذا منطقة عشان نتاكد ان مفيش اى تجلطات فى الشرايين الى معرفناش نطمن عليها من التحاليل، الدنيا كلها فى يوم وليلة كل اتشقلبت ومفيش اى سبب لكل ده للاسف غير انى اخدت اللقاح.
هل انا غلطت انى اخدت اللقاح؟ ده انا كنت ماشية بوعى فى كل الناس الى خايفة حواليا واقولهم ان لازم ياخدوه وان هو المخرج الوحيد من الى احنا فيه! دلوقتى هآمن على اى حد قريب منى ياخده ازاى بعد الى حاصلى ده؟
طب احنا المفروض دلوقتى بنتعامل على انهى اساس؟ انه احنا وحظنا؟ خد التطعيم بس انت ونصيبك بقى فى الى هيحصلك بعدها؟ طب ليه بيتقالنا انه آمن لما هى كده وان كل واحد واستجابة جسمه؟ معرفش الحقيقة مين مفروض يرد على الاسئلة دى او يعرف حتى سبب الى بيحصلى من يوم ما اخدت اللقاح
بس انا حسيت انى المفروض احكى الى حصلى عشان على الاقل لو حد هياخد استرازينكا يعمل تحليل ال d dimer ويتابع نفسه بعدها عشان ميحصلش لا قدر الله اى حاجة مفاجأة.
ياريت لو حد يعرف دكتور امراض دم كويس اتابع معاه لانى بقالى عشر ايام عمال اخبط مابين دكاترة باطنة لجراحة واعتقد الموضوع بقى بره عنهم دلوقتى، فلو حد يقولى على دكتور امراض دم كويس اكون متشكرة جدا
طيب ياجماعة انا اليومين الى فاتو متكلمتش او قولت اى تطورات لان كنا لسه تايهيين ومفيش حاجة اكيدة فكنت مستنية اعمل الاشاعات والتحاليل عشان كل حاجة تكون وضحت ويكون التشخيص شبه اتعرف
اول واهم حاجة ان الحمد لله انا محصليش اى تجلطات نتيجة وd dimer العالى ده كانت له اسباب تانية للاسف محدش من الدكاترة الى روحتلهم فى الاول فكر فيهم وكله اول حاجة فكر فيها هى التجلطات وبدأو معايا ادوية سيولة وده كان غلط جدا وهو الى سببلى النزيف زى ما كتير من الدكاترة هنا قالو
انا روحت لدكتور امراض دم ومناعة وعملت اشاعة وضحت ان مفيش اى تجلطات فى منطقة البطن الى حصل فيها الالم الشديد بعد اللقاح وتشخيص الدكتور لحد الان كالتالى:
انا عندى مرض مناعى اسمه Mediterranean fever او حمى البحر الابيض المتوسط
انا عندى مرض مناعى اسمه Mediterranean fever او حمى البحر الابيض المتوسط
ده مرض بيجى على شكل attacks وللاسف متشخصتش قبل كده رغم ان حصلى ال attack دى كذا مرة، ال attack دى ممكن تحصل فى اى وقت ولاسباب كتير بس المرادى الى حفز حدوثها هو اللقاح لان اللقاح بطبيعته بيحفز جهاز المناعة، فحصل inflammation جامد نتيجة لرد الفعل ده وده الى رفع الd dimer بالشكل ده
وده برده كان سبب الالم الشديد الى حصلى، انا عملت التحليل الخاص بحمى البحر المتوسط عشان التشخيص يتاكد بس هو بياخد شهر تقريبا على ما النتيجة تبان بس هو لحد الان التشخيص الاقرب للمنطق نتيجة للhistory بتاعى واعراض تانية
الخلاصة ان اه اللقاح كان له دخل فى الى حصلى بس ده لانى حالة خاصة ولو كنت متشخصة بالمرض المناعى من قبل كده مكنتش هاخد اللقاح اصلا وده الى الدكتور قالهولى، اللقاح آمن لحد كبير طالما الشخص معندوش اى حالة مناعية، لكن غير كده فهو آمن ونفعه اكبر بكتير من اى ضرر ليه
كل القصص الى دخلت فيها والنزيف الى حصلى والرعب الى عيشته كان بسبب تشخيص غلط وmanagement خاطئ من كل الدكاترة الى روحتلهم الى هما كانو اكتر من خمس دكاترة ودكاترة كبار للاسف، مينفعش باى شكل حد يتوصفله ادوية سيولة قبل ما الجلطة تتشاف باشعة وده الى فهمته متأخر
فى الاخر وزى ما كتير من الدكاترة هنا قالو برده انا كنت حالة فردية، حظى سيئ بس فى الاخر عدت على خير وانا الحمد لله بتحسن، انا حبيت اوضح تطورات الموضوع هنا زى ماحكيت من الاول عشان مبقاش سبب انى خوفت حد ياخد اللقاح بدون داعى
واخيرا شكرا لكل حد اهتم وكل حد بعتلى يطمن عليا وكل دكتور حاول يفيدنى باى معلومة او بترشيح لدكتور، وبجد مش عارفة اشكركم ازاى على كمية الدعوات الى بتوصلنى من يوميها، حقيقى شكرا♥️
جاري تحميل الاقتراحات...