صاحي في رمضان نفسك هفّاك على كنافة بالمانجا. كتبت لصاحبك علىWhatsApp انت بتجيبها منين فقالك اقتراح. دخلت فيسبوك لقيت اعلان عنها، دخلت جوجل لقيت اعلان، بتلعب لعبة على موبايلك طلعلك اعلان،ويوتيوب، فتحت انستجرام لقيت الانفلونسر الكراش بتاعتك بتاكلها. طب حصل ازاي؟ تعالوا نشوف 😁
في صيف 1994، اخترع المبرمج Lou Montulli واحد من أهم مفاهيم الإنترنت وهي الـ Cookies (بالعربي ملف تعريف الارتباط). وده عبارة عن ملف صغير متخزن على جهازك بيتتبع وبيسجل بيانات عن استخدامك لموقع بتتصفحه من خلال الـ Browser. وبالمناسبة Lou له اسهامات كبيرة في برمجة الـ Web Browsers.
الـ Cookie بدأ بأنه ملف مرتبط بكل موقع بتخشه، كل موقع بتتصفحه بيرمي ملف عندك بيسجل فيه مثلا دخلته امتى ومن فين وتصفحت أيه وأيه اللي عملت Click عليه ولو اشتريت حاجة أيه هي وكل البيانات المتعلقة بدخولك بحيث لما تزوره تاني كل البيانات دي تساعد أنه يحسن من تجربتك. فكرة بسيطة بريئة ..
تخيل موضوع الـ Cookie كأنك بقيت زبون عند قهوة كل ما بتزورها، القهوجي خلاص عارف طلبك ويقوم مزعق وعندك واحد شاي بالنعناع. طبعا القهوجي بيقعد يدردش معاك، بيعرف انت مين وبتحب أيه والباشا جي منين ورايح فين بس انت بتثق فيه لأنك شايفه قدامك ولو الشاي حلو غالبا الدردشة هتحلو!
طب تعالى نتخيل أن صاحب عربية فول جنب القهوة عايز يجيب زباين فهيروح للقهوجي يقوله أي حد تحس من معرفتك بيه أنه سالك قول له عليا وكل زبون هيجيلي من عندك هديك عليه نسبة اعلانات. القهوجي شايفك زبون حلو كده بتصرف 20 جنيه فممكن تجيب سكة مع ساندويتش طعمية من عربية الفول والعملية تسلك.
التويتة اللي فاتت دي بتشرح ازاي جوجل بتستخدام الـ Cookies في الاعلانات. كل موقع بينزل Cookies عندك وجوجل نفسها بتنزل Cookies عندك بتقدر بيها تعرف أنت بتزور انهي مواقع وتفهم بتحب أيه وبتشتري أيه وعايش فين وبالتالي تديك الاعلانات المناسبة مع الحفظ على بياناتك الشخصية طبقا للقانون
نرجع للقهوجي، أحنا اتفقنا أن العلاقة ما بينك وبين القهوة علاقة خاصة انت بتروح تشرب الشاي وتاكل الطعمية وتدردش وتفك عن نفسك وتمشي.لحد ما في مرة دخلت القهوة لقيت 3 قعدوا معاك مابيتكلموش طلبت طلبك وابتسمتلهم ومشيت..بعدها بيومين رحت تحلق لقيت الحلاق بيقولك: تحب اجيبلك ساندويتش طعميه؟
بتبص على اللي بيحلق جنبك لقيت واحد من اللي كانوا قاعدين معاك على القهوة آخر مرة. ايه اللي جابه هنا ده؟ ده ماشي ورايا ولا أيه؟ وأيه اللي عرّف الحلاق اني عايز آكل طعمية. اكيد في حد بيراقب تحركاتي بيعمل Tracking. كده انت بدأت تفهم أن القهوجي بيشارك بياناتك مع طرف تالت 3rd Party.
النوع الأخطر من الـ Cookies هو ما يطلق عليه 3rd Party Cookies. ودي عبارة عن ملفات بتتبع انت تصفحك وتجربتك على الانترنت بشكل عام في كل المواقع وساعات الـ Apps أيضا. أنت حاليا لما بتخش أي موقع بيطلب منك أنك توافق على الـ Cookies بشكل عام لكافة الأغراض المختلفة.
الـ 3rd Party Cookie مش مسئولية الموقع اللي انت داخل عليه وأنت مش بتبقى عارف مين اللي بيتابعك والطرف التالت اللي بيتابع كل تصفحاتك على الانترنت ممكن يبقا وكالة Agency بتجمع بيانات مختلفة عنك عشان تبيعها للمعلنين. ساعات ممكن يبقا مدخل للاختراق لما مدى تتبعك يتعدى الحدود!
من ناحية تانية جوجل اللي هي أكتر معلن ثقة على الانترنت والناس كلها بتشارك بياناتها معاها بدأت تشعر أن الـ 3rd Party Cookies بتجمع بيانات أعمق وأدق عن المستخدمين وبتحقق مكاسب هايلة للشركات اللي بتبيع البيانات وبتمثل خطورة، فبدأت في استراتيجية لوقف التعامل مع الـ 3rd Party Cookies
استراتيجية جوجل لوقف الـ 3rd Party Cookies كانت بالاعلان عن Google FLoC Federated Learning of Cohorts "النظام الموحد لتعلّم التصنيف" وده أسلوب جديد بيلغي قدرة المواقع على استخدام الـ 3rd Party Cookies وبيجعل جوجل هي المدخل الوحيد لجمع البيانات وتصنيفها عن المستخدمين.
أي مستخدم على Chrome هيتم تصنيفه طبقا لتجربته شبكة الانترنت بشكل كامل من خلال جوجل مع وقف تفاعل الـ 3rd Party Cookies بمعنى عدم قدرة اطراف ثالثة على جمع بيانات المستخدمين وبيعها للمعلنين. أي معلن Publisher أو شركة خدمات اعلانية Adtechطرف تالت هيتسمحله جمع بياناتك فقط من خلال جوجل
هاشتاج #NoFloc اتعمل أولا عشان جوجل قررت تعمل ده من غير ما ترجع للمستخدم، يعني انت لو بتستخدم Chrome دلوقتي ممكن يبقا شغال عندك. ثانيا ده بيكسر في اقتصاد الاعلانات المستقر بقاله سنين، ده غير أن حالة احتكار جمع البيانات عن المستخدمين دي اكيد هتفيد جوجل قبل ما تفيد أي معلن آخر.
ولو رجعنا للقهوة،فلو اعتبرنا ان القهوة هي جوجل وكانت في الأول بتسيب الناس تقعد معاك علطرابيزة تراقبك وتفضل بعدها ماشية وراك وتعمل سبوبة اعلانات على حس اللي بتعمله في الدنيا ورايح فين وجي منين فدلوقتي القهوجي كبر أوي وزباينه كترت وبقى عنده القدرة يراقبك بنفسه وياكل السبوبة كلها.
ولو في نصيحة يعني بعد كل الكلام ده، امسحوا الـ Cookies كل ما تقدروا، حافظوا على بياناتكم الشخصية بقدر الامكان وتصفحوا الانترنت بمسئولية 😁
جاري تحميل الاقتراحات...