رتبها

سلسلة فقط بعنوان رحلات الأقصى:

في الطريق للقدس قد ما بكون شعور الفرحة غامر، بكون شعور الغصّة يوازيه تماماً
ألم وحرقة على الأرض المسلوبه على تهاون المسلمين والتخاذل، على تحكم اليهود بكل حركة ممكن نعملها واحنا بالمسجد الأقصى، لما تطلع لكل المعطيات اللي حوليك بتحس بدنا سنين ضوئية لنتحرر، لكن الأمل بالله أكبر

على رغم الصيام ومشقة الطريق والحرّ، بس بتحس حالك رويان وشبعان بس تدخل المسجد، لدرجه مضينا ٢٤ ساعه بقليل من الأكل والشرب يعني وما حسينا بجوع سبحان الله!

طبعاً ناهيكم عن شعور الاطمئنان والراحة والمشي بساحات الأقصى والهوا البارد اللي بردّ الروح! فعلاً روي الظمأ وابتلت العروق بعد هالسنتين ♥️

عُرِج بالرسول صلى الله عليه وسلم في عام الحزن من المسجد الأقصى للسماء، مع إنه ربنا عزوجلّ كان بامكانه يعرج فيه من المسجد الحرام للسماء مباشرة، وكأن مجيء الرسول للأقصى فيه المستراح والمواساة وجبر الخاطر وتخفيف الأحزان عنه وتلاشيها!
وهذا حقاً ما يشعر به الإنسان عند وصوله أول عتبة🥺

وطبعاً نصف جمال الرحلة في من يصحبكَ بها، ألطف صُحبة بعد هالغياب إسراء المشاكسة 😁 @Esaakh7
رغم اللقاءات الكثيرة في نابلس، لكن اللقاء في الأقصى يختلف كلياً، له رونق خاص والله 🥺♥️

يارب لا تجعله آخر عهدنا بمسجدنا..
يارب ارزقنا زيارته شهور وأعوام مديدة يارب
وارزقنا أن نكون سبب في التحرير والنصر والتمكين يا أكرم الأكرمين ")
٨.رمضان.١٤٤٢.

عُدنا والعودُ أحمدُ:
انطلقنا يوم الأربعاء من فتحة أخرى غير الفتحة رحنا منها أول مرة (الفتحة = تهريب) والفتحة الثانية هاي كانت عصيبة وتمرمطنا أي تبهدلنا فيها للأسف .. أول بهدلة هي انتظار ما يقارب ساعه لحتى دورية اليهود تغادر المكان ونقدر نهرب للجهة الأخرى اللي فيها الباصات ..

غادرت الدورية، وبلشنا نركض للجهة الأخرى وفجأة رجعت الدورية كمان مرّة، ورجعنا مرّة أخرى لمكاننا وضلينا ننتظر لحتى يرحوا، وراحوا وركضنا للباصات وتمت المهمة بنجاح بعد ما يقارب ساعتين، ونضيف كمان انتظار ساعة لمشاكل تنسيق الباصات وما شابه

وبعد ٥ ساعات على الطريق ( مسافة الطريق+ ساعات الانتظار) وصلنا قبل أذان المغرب بساعه واحنا انطلقنا بعد صلاة الظهر 💔
كانت لحظة رؤية قبة الصخرة واحنا بالباص كالماء الزلال على ظمأ والله 🥺🥺

عند وصولنا على أعتاب المسجد، تركت إمي واركض بدي أوصل بأسرع وقت، بووم عند باب الأسباط وقفني الجندي اللعين وفتش الشنتة وبلش يسأل الاسألة البايخة لكن ما طولت معه ومرقت بحمدلله، وإلى مصلى باب الرحمة نلحق صلاة العصر.

صلينا جماعة المغرب والعشاء فقط 💔 وطبعاً بعد صلاة التراويح مباشرة وقت الترويحة وأبواب الأقصى تبدأ تغلق.
مجموع ما امضيناه بالمسجد فقط ٤ ساعات ") وأنا التي كنتُ انتظر هذه الرحلة على جمر كي أعوض ما فاتني الرحلة الماضية وأقضى وقت أكثر وأزور كل الاماكن وأتجول بكل الساحات، لكن للأسف "(

طوال الليلة التي تسبق الرحلة أخطط ماذا سأفعل مع الأصدقاء الذين سألتقيهم هناك، هذا أول لقاء يجمعني بهم والأقصى!
نزور كل مَعلم،ندعي كثيراً،نفطر، ثم نبدأ بالصلاة ونأخذ الكثير من الصور، لكن لم يحدث لضيق الوقت وتأخرنا💔
أردتُ جمع الكثير من الذكريات مع الرفقاء الأغلى في المكان الأغلى")

انتهت الرحلة وركبنا الباص للعودة إلى مدينتا، كان شعور القهر والسخط على الاحتلال يفوق شعور السرور!
تخيّل تمضي ٨ ساعات ذهاباً وإياباً كي تقضي ٤ ساعات فقط بالأقصى! والله شعور مؤلم 💔💔

عزاؤنا أن كل شوكة يشاكها المؤمن يؤجر عليها، عزاؤنا أن كل مشقة مرت وكل شعور بالذل والقهر هو بأجره ان شاء الله،عزاؤنا أننا بأرض رباطٍ وجهاد! أسال الله أن يتقبّل منّا وأن لا يحرمنا لهفة شدّ الرحال هذه ولذتّها، وأن يستخدمنا لنصرة دينه ومسجده أبداً ما حيينّا، هو حسبنا ونعم الوكيل♥️

عُدنا والعودُ أحمدُ 🥺
كل مرة بروح فيها على الأقصى بشعر وكأني أول مرة بروح بحياتي، مشاعر الغصة والقهر نفسها وكل مرة تزداد، كيف مسجدنا بنقدرش ندخله براحتنا! بنلف مليون لفة وبنتفتش وبنتوقف ع الابواب وممنوع ندخل ونروح أي مكان إلا برضاهم وهم وكلابهم ومستوطنيهم بتسردحوا وبتمردحوا😭

بتقطع من القهر وانا بشوفهم ماخذين راحتهم وبعملوا اللي بدهم ياه واحنا مقيدين حرفياً وكل خطوة بنعملها متوقفة عليهم وعلى أوامرهم! شعور ذل لا يُوصف الله يذلهم ويزلزل الأرض تحت أقدامهم ويجي اليوم اللي ندعس عليهم فيه يا الله يا كريم.
-
هاي الصورة وهم موقفينا عند الأبواب.

قد ما الواحد يروح ع الأقصى بتضل لسا في أماكن كتير مش شايفها، وكل مرة بكتشف مكان جديد.
أنا مبارح أول مرة بشوف مكتبة الأطفال هاي! هاي جزء من مكتبة الأقصى القديمة وفيها صالتين كبار لكتب وألعاب الأطفال وكانت مليانة وبتجنن 🥺

كمان أول مرة بروح على المتحف! مليان شغلات في المتحف كنت أسمع عنها بس أول مرة بشوفها رغم إني كل سنة بطلع أكثر من مرة ع الأقصى بس ولا مرة صحلّي أدخل عليه ومبارح دخلت الحمدلله 🤩

كمان أول مرة بدخل على المكتبة الختنية، بتجنن يا الله كل كتب الدنيا فيها 😭 وفيها اجهزة كمبيوتر وفيها مكان مخصص للدروس وفيها كل اشي حرفياً، يعني كل ما يلزم طالب العلم موجود فيها، نفسه الواحد ينام هناك ويختم الكتب هناك 😭

وفش بعد وقت الغروب هناك! الوقت الأحب والأنقى والأجمل والأكثر روحانية 🥺
-
الرحلات برمضان أجمل بكثير من الأيام العادية لانه الأقصى بكون عمران اما هالأيام فاضي وهذا مُحزن💔.
-
هالرحلة ناقصة رفقاء الأقصى اللي بنحبهم وبنحب رفقتهم ودعواتنا مع بعض بالساحات وصلاتنا وتلاوتنا مع بعض🥺

رغم هيك بضل الأقصى صفاء كل كدر وجلاء كل هم وابتهاج اروحنا والله، ربنا يرزقنا زيارته دائماً وييسر لنا سبل الوصول طول ما احنا بنقدر، بخاف من فكرة انه ممكن تيجي أيام ما نقدر نروح هناك فعلاً! سواء لظروفنا الشخصية او ظروفنا الاحتلالية ربنا ما يفرجينا هالأيام يارب💔.
13.1.2022.

دق دق ، رحلة جديدة الحمدلله 🤍
من كمية الجمال في الرحلة هاي والآكشن والأفلام اللي صارت مش عارفة من وين أبلش، بس يلا بنقول بسم الله ونبدأ 🤸🏻‍♀️

أهم حدث بالرحلة طبعاً إنه أول مرة بطلع مع ثائر والرحلة أصلاً علشان ختمة الإجازة بالقراءات العشرة، رغم إني ما كنت مع ثائر برحلة القراءات اللي أخذت منه ٣ سنين، بس ال ٨ شهور اللي كنت متواجدة فيها، شفت وعرفت قديش الاشي صعب وبده وقت وجهد وتركيز عالي جداً غير السفر لقلقيلية طبعاً..

وقديش فعلاً يوم الختمة رح يكون عظيم بعد تعب ال ٣ سنين، وكنت هاكلة هم كيف بدي أحضر لانه الختمة بالمسجد القبلي والمسجد القلبي غالباً بكون للرجال فقط، لكن تيسرت وتسللت إلى الموقع بسلام الحمدلله 😌🤍

نرجع شوي لبداية الرحلة وفعاليات الباص اللي كانت عبارة عن : تسميع ومراجعة لثائر مع إني لا أفقه بالقراءات اشي بس مشيت الوضع 😂 + أناشيد الشباب + تدريب كريم لفقرة معلومات عن الأقصى ، وطبعاً أول ما حكى مالا نعرفه لا نملكه تذكرت اسراء دغري 😂👌🏼 @Esraakh7_

الباص هالمرة كان أكثر من نصه شباب، ومن ضمنهم اخواني وصحابهم وصحاب ثائر، وقت الدخول طبعا كلنا متوترين علشانهم وندعي والحمدلله إنهم كلهم دخولوا كلهم وفي منهم أول مرة بيجي يا حرام لانه طبعا الشباب ممنوعين واي شب بنمسك ممكن يرجعوا او يعتقل او يحتجز يعني فيها نسبة مخاطرة، بس اجت سليمة

وجلسة مصلى باب الرحمة الحنونة ولما كنّا نقرأ بالاجازة كانت من أبهج وألطف الأوقات وأحبها 🤍🤍🤍🤍.
وكل الجلسات المُحببة، النسكافيه فيها ركن اساسي حتى بالقدس 😂🤍.

كالعادة الوقت هناك بمر بلمحة بصر، والله الواحد ما بلحق يعمل كل اللي بنفسه وما بشبع حقيقي ما بشبع، صلينا المغرب والعشا جمع واجا وقت الترويحة وهون بلش مسلسل الأفلام 😅

أول اشي تأخر الباص علينا تقريبا ساعة ونص وضلينا بالشوارع بالبرد واحنا نستنى، هذا الانتظار أثار ريبة لدى الشرطة الاسرائيلية وبلش الفليم التاني..

بعد ما اجا الباص وطلعنا، الشرطة ما خلتنا نمشي الا لما تشوف كل هويات الركاب، وهون بلش الخوف لانه لو شافوا هويات الشباب رح يوخذوهم كلهم فش مجال، فصرنا ندور على هويات النساء والبنات والشباب اللي اعمارهم صغيرة ١٦ و ١٧ علشان نغطي على باقي الشباب وينفذوا بسلام ..

والشرطة مش مقتنعة طبعاً انه الهويات اللي معهم هم فقط اللي بالباص وضايل لسا، وهو اجا دور شباب القدس الفخمين والله انهم رجال مواقف فعلاً الله يرضى عنهم، كانوا هم اللي بتفاوضوا مع الشرطة علشان يمشونا وعلشان يعدي اليوم بسلام والشباب يروحوا سالمين ..

والحمدلله طلعوا بنتيجة فيها أقل الضرر يعني بعد انتظار ساعتين كمان اضافة للساعة ونص الاولى، وقرروا ينقلونا على حاجز العيزيرية وبعدها بمشونا، وهذا ما حدث بعد ما رحنا على العيزرية ضلينا نستنى كمان باص جديد لأنه الاول تخالف والباص الجديد استغرق ساعتين لحتى يجي يوصلنا على جنين 🥲

وطول هذا الوقت شباب القدس ما قصروا فعلاً، وفرولنا مكان نقعد فيه لحتى يجي الباص الجديد+ وسائل تدفئة+ ضيافة وشاي وقهوة وتحلاي+ لدرجة بس وصل الباص ركبوا معنا لحتى وصلنا جنين ورجعوا على بيوتهم على القدس مرة تانية 🥺
الله يجعله كله في ميزان حسناتهم يارب

نبذة عن الركض والمطاردة بالبرد وانا هون خلص تعبت وثائر قال يعني من باب التشجيع ان هذا مش تعب ستنا عائشة كانت تنزل مع النبي على المعركة 😅😂🤍🤍🤍🤍.
كل ذرة تعب ومشقة كان فيها لذة والله مش مبالغة 🥺.

يوم من العمر، كما كل أيام الأقصى، ربنا لا يحرمنا ولا يبعدنا ويتقبل منا يارب ويجعلنا سبب ولو صغير في الفتح والتحرير ويحيينا لوقت ما تكون مفاتيح الأقصى بايدينا يارب يا قدير ياعظيم، وعسى أن يكون قريباً🤍
١٠.رجب.١٤٤٣.
11.2.2022 🤍.