ثريد عن تجربتي النهاردة في التطعيم بمصل استرازنيكا في مواجهة الكورونا 😎
أولاً: أنا مسجلة بقالي أكثر من شهرين وكل شوية أتابع الموقع ومفيش جديد... مش عارفة ايه السبب الي خلاني النهاردة الصبح أقرر أفتح الموقع تاني عشان أتفاجئ أني المفروض آخد اللقاح النهاردة!!!
انا قلت اصلا يوم 16/4 ده امتى اكتشفت انه النهاردة فتحت موبايلي لقيت رسالة منهم بتاريخ الساعة 6 الا ربع الصبح... اصلا احتمالية اني أشوف الرسالة دي كانت ضعيفة 2
وبعدين قررت اتحرك مباشرة على المكان الي طلبوا مني أروحه وبما أن النهاردة الجمعة فالدنيا رايقة الحمدلله 3
وصلت الدنيا منظمة جدًا اخدت رقم وانتظرت، في تباعد اجتماعي والناس ملتزمة بالكمامة بس الدكتور الي بيسجل البيانات مكانش لابساه 4
الدكتور المختص بتسجيل البيانات بيكشف على بطاقتك ويطلع الرقم المسجل لكل شخص ويدونها في بطاقة الي فيها تفاصيل اللقاح والموعد والجرعة التانية وكل التفاصيل دي وبيبتدي يتناقش معاك عن حالتك الصحية 5
لما عرف اني معنديش الحمدلله أمراض مزمنة قالي أسترازنيكا ... أنا مكنتش مرحبة عشان سمعت عن أعرضه الجانبية لكنه أكد على فعاليته وأنه الأفضل والمعتمد كمان في حالة السفر وده شئ مهم بالنسبة لي 6
خرجت وبعد شوية دخلت غرفة تانية في مسؤولة بتتكلم تاني وتسأل بالتفصيل عن التاريخ المرضي واي اعراض أو إصابات للكورونا أو دور برد وبتديك ورقة تعليمات بتقراها كويس تخص موضوع التطعيم وبتمضي على نسختين منها هما 7
اخيرا بتدخل على غرقة اللقاح بيسالوك للمرة الثالثة ويأكدوا أن استرازنيكا آمن ومكان التطعيم بيكون في أعلى الذراع الشمال حقنة عادية مش مؤلمة يعني 8
لما خلصت بيطلبوا منك تنتظر على الأقل ربع ساعة قبل التحرك وبيبلغوك بموعد الجرعة الثانية الي هيا في حالة اللقاح البريطاني 3 شهور والصيني 3 أسابيع 9
رجعت للدكتور الأول الي سجلت عنده البيانات وسألته شوية أسئلة عن الأعراض الجانبية فقال ألم في الذراع ووارد ارتفاع درجة الحرارة وتكسير للجسم بليل وناخد له 2 بنادول مرتين وقالي ده حصل معايا لما أخدته 10
آخر حاجة بقى طلبت منهم نفس الاستمارة بالانجليزي وتعتمد منهم بختم في حالة السفر وافقوا ومكنش عندهم مشكلة وكتبنا البيانات ما عدا الختم لأنه بعد موعد الجرعة التانية وده شئ عظيم عشان لو محتاجين اثبات في حالة السفر خارج مصر واسم اللقاح كتبه على الاستمارة 11
الموضوع كان منظم ومش مرهق ومجهود كويس جدًا ... أنا كويسة الحمدلله وأتمنى ميحصلش أعراض جانبية لكن في نفس الوقت مينفعش تبلغ الناس في رسالة الساعة 6 الصبح تقول فيها تعالوا النهاردة!!! أيعقل #تمت
جاري تحميل الاقتراحات...