زول زعلان من تردي الخدمات.. تناقشو بحساب بسيط متردية ليه والدنيا ما تكية والأشياء ما بتحصل بالسحر ولا بالغناء ولا بالهتاف يقعد يشتمك! حتفضل تنحدر أكتر لمن تعمل الحاجة الصاح. الابتزاز بكلام عن الإنسانية لو كان بدوّر التوربينات؛ ثلثين السكان الما عندهم كهرباء كان بكون عندهم.
مفهوم وقت الضيق الناس بتقول أي كلام. لكن تكون دي طريقة التفكير فدا مؤشر ما كويس.
وفي مجموعة مفتكرة التردي دا حصل بسبب الثورة وبشتموها لتفريغ غضبهم. مع إنو واضح المنحنى كان ماشي منحدر لدرجة منعوا الناس سحب قروشها من البنوك ومسألة زمن تصل النقطة الحالية وتتجاوزها للاسوأ منها برضو.
+
+
الدولة منهارة إدارياً ومفلسة وعشان تموّل الحد الأدنى البخليها شغالة بتقوم بدا بسرقة قروشنا بالطباعة. دا عشان يتغير الناس لازم تاخد وقفة جادة وصريحة وتشوف الخلل وين. هل الحكومة سعت تعمل دا؟ لأ للأسف. مافي شفافية كافية في أي حاجة ومعلومات أساسية عشان النقاش مثمِر بتم دسدستها.
+
+
ودا فاتح الباب للمزايدات المتلبسة توب الإنسانية والناس تعبت؛ وبالتالي الخدمات مفترض تتوفر بكفاءة 100% بتكلفة شبه مجانية كمان. الناس حتتعب أكتر طالما المزايدات شعبوية وفي ترقب المهدي المنتظر يجيب معاهو كم تريليون دولار يعيشنا ملوك!
+
+
ممكن تعمل روحك فكِه وساخر وبتاع كوميديا وتشتم زي ما عايز (ومعظمهم سمجين أكتر من ممثل سمج جداً بس ما عايز أقول إسمو في السخانة دي). دا ما حيغير من الحقائق الصلبة البتتقاس بأرقام واضحة.
+
+
الحكومة السجمانة دي قعدت ولا جات حكومة على راسها السيد كمال كرار ذات علمو اللدني وبصاتو الكهربائية لعلاج مشكلة المواصلات؛ الواقع حيفضل ياهو طالما بتلف وبتدور حول نفسك ومنتظر فرج السماء.
+
+
عشان كده نطلب من الأحزاب السياسية -والأصلا بتتكون عشان تصل السلطة- تحدثنا عن سياسات واضحة لكل الأشياء. من كهرباء لمويه لبنى تحتية لطرق لصحة لتعليم لغيرو. السياسات دي كلام واضح كيف حتودينا من النقطة دي لتقطة تانية. سياسي بقول ليك الخدمة الفلانية مفترض تكون مجانية يوريني حيمول كيف.
حتى يبقى عندنا ظل.. نتبع وصفة شيخنا الطيب صالح!
جاري تحميل الاقتراحات...