ثريد : تجربتي مع الصلاة
في فترة من فترات حياتي تحديدا في بداية مراهقتي كنت الاحظ ان صلاتي لا تمت للصلاة بصلة مجرد ركوع وسجود بدون اي خشوع وفوق كذا كنت اصليها في اقل من دقيقة
فلما لاحظت انه الوضع تمادى قلت خلاص انا بصير اصلي بخشوع ، وكأي مراهق في بداية عمره وش كان مفهوم الخشوع عندي ؟ اركع واسجد بشويش وابد صليت المغرب والعشاء ذاك اليوم بسلو موشن
بس اكتشفت ان الحركة ما تشتغل ! قعدت افكر مع نفسي انه مستحيل هذي هي الصلاة اللي كان يقول عنها النبي ﷺ ارحنا بها يا بلال ! انا حاليا اذا دخل وقت الصلاة اشيل همها واتثاقلها !! فقعدت أتسائل طيب كيف أخشع في صلاتي ؟
وفعلا قعدت أبحث وأسأل ابغى اعرف كيف اقدر اصلي نفس ما كان يصلي الصحابة ؟ وبحثت وسمعت كلام مشايخ كثير بس للاسف ما لقيت اي إجابة اقنعتني لين طحت على مقطع لأحمد الشقيري
يقول الشقيري لو جبت لك وزن حديد كبير وقلت لك شيله ما بتقدر من اول مره بس لما تدرب عضلاتك بتقدر ، كذلك القلب هو عضلة بالتالي يحتاج تدريب فلا تتوقع انك مجرد ما تكبّر للصلاة بتخشع وانت اساسا علاقتك بربك خلال يومك مقتصرة على ذي الثلاثين ثانية اللي تصلي فيها
فأول شي جاء في بالي لما شفت المقطع انه راح يقول عشان تكون لك علاقة مع الله خلال يومك لازم تقرا قرآن و تتصدق و تستغفر الخ ... بس العجيب انه ابدا ما كان هذا اللي قاله الشقيري !
الشقيري كان يقول راقب الله في تفاصيل يومك التافهة اللي في روتينك اليومي مثل علاقتك مع اهلك ، ردة فعلك لما امك تطلب منك شي ، انتبه لألفاظك اللي تطلع منك خلال اليوم ..
مجرد ما تبدا تفكر بس في انك تراقب روتينك اليومي انت كذا سويت الخطوة الاولى بعد كذا الخطوة الثانية والثالثة والرابعة على الله عز وجل لانه قال ( من تقرّب إليّ شبراً تقرّبت إليه ذراعا )
المهم انها شدتني الاجابة وشفتها بسيطة فقررت أطبقها وفعلا صرت كل ما اجي لسيئة تافهة اسويها في يومي العادي اقول بتركها عشان اذا جاء وقت الصلاة اكون خاشع و هنا جاء دور الخطوة الثانية والثالثة والرابعة اللي قلت لكم ان الله تكفل فيها
قعدت يومين اراقب تصرفاتي برا الصلاة ولما يجي وقت الصلاة الاحظ انه صلاتي فعلا قاعد تتغير وكمية الراحة النفسية اللي كنت احس فيها لا توصف لدرجة انه اتفه شي اسويه في يومي يسعدني مررره وحتى اللي حولي كانوا يلاحظون الشي ذا وصرت مع الوقت حريص اصلي الضحى و الوتر لدرجة اني ..
اذا انسدحت على فراشي اخر الليل وانا دايخ نوم اتذكر اني ما صليت الوتر واقوم اتوضى واصلي و اتفاجئ انه يمر علي وقت طويل بدون ما انتبه ! عرفت انه هذا هو التعلق اللي كان يخلي الصحابة يقومون الليل لين تطلع عليهم الشمس ! عرفت انهم وصلوا مرحلة عظييييمة فيه
وقبل فترة سمعت صالح المغامسي يقول لو جلست مع شخص في اخر عمره وسوا كل شي في حياته وسألته عن أكثر فترة في حياته كان مرتاح ومبسوط فيها راح تلاحظ انه بيختار فترة كان قريب فيها من الله وانا أقدر اقول انه هذيك الشهرين كانت أجمل شهرين عشتها في حياتي
ختاما .. الله يجزى أحمد الشقيري خير اللي أعطى مراهق إجابة غيّرت حياته
إنتهى الثريد ♥️.
إنتهى الثريد ♥️.
جاري تحميل الاقتراحات...