رتبها

من جديد نعود إليكم بثريد جديد وجولة جديدة داخل شوارع العقل البشري بنحاول من خلالها نفهم البتاع اللي مسوحنا ده شغال ازاي
على بركة الله نبدأ الثريد :D
النهاردة هنتكلم عن حاجة ذكرناها كتير المرات اللي فاتت ألا وهي المرونة النفسية "psychological flexibility"

و لأن بضدها تتضح الأشياء، فا احنا محتاجين الأول نفهم ازاي بنتبرمج من صغرنا على انعدام او جمود المرونة النفسية جوانا، او ما يسمى ال "psychological inflexibility"
علماء النفس عرّفوا ال psychological inflexibility بأنها "هيمنة وسيطرة الأفكار السلبية/المشاعر المؤلمة/..

/المعتقدات المعطِّلة على تفكير الإنسان بطريقة تمنعه عن القيام بأفعال بناءة تساعده على تحقيق أهدافه و انه يعيش حياة ثرية ذات معنى"
وقالوا ان جمود المرونة النفسية ده هو أساس اي معاناة نفسية بيمر بيها الإنسان بدايةً من الضغوط اليومية وصولاً إلى الاضطرابات النفسية...

طب البتاعة دي بتتكون جوانا ازاي؟
علماء النفس من مدرسة العلاج بالقبول والإلتزام حطوا نموذج سداسي سمّوه الThe psychological inflexibility hexagon بيشمل المحاور الستة المكونة لانعدام المرونة النفسية واللي النهاردة هنتعرف على كل محور منهم عن قرب عشان نفهمه وبالتالي نفهم منشأ ..

منشأ كل اللخبطة و الكلكعة اللي بتتكون جوة الإنسان وبتكبر جواه مع العمر
تعالوا بقى نمسك واحدة واحدة من المحاور الستة اللي في الصورة دول نفصصها عشان نفهمها
أولاً- الانغماس الإدراكي "Cognitive fusion" :
مصطلح Cognition أو "إدراك" يشمل كل ما يقوم العقل البشري بإنتاجه من أفكار..

أفكار/معتقدات/تخيلات/توقعات/صور ذهنية/ذكريات/مشاعر ... الخ
و مصطلح fusion معناه التصاق/التحام/تداخل
لكن قبل ما ندخل في شرح ال cognitive fusion خلينا نلعب لعبة،
تخيل عزيزي القارئ انك ماسك في إيدك لمونة حلوة كده صفرا و فريش، تخيل انك بتلمسها بصوابعك وبتحس ملمس قشرتها..

قشرتها الخارجية الناعمة والتعرجات الصغيرة اللي فيها، تخيل انك بتقربها من مناخيرك وبتشم ريحة قشرتها، وبعدين بتجيب سكينة وتقطع اللمونة نصين، وبتاخد نص لمونة منهم وبتقربها من بؤك وتعصرها و تحس بطعم اللمون على لسانك...
يا ترى إيه اللي حصل وانت بتقرا السطور اللي فاتت؟

في الأغلب انت شوفت في خيالك فعلاً صورة لمونة، شوفت شكلها ولونها وشوفت نفسك وانت بتقطعها، جايز تكون حسيت بملمسها كأنك ماسكها بجد، جايز تكون شميت ريحة لمون بجد، جايز كمان يكون ريقك جري وانت بتتخيل طعمها، ممكن يكون كل ده حصل رغم ان في الحقيقة مفيش اي لمون هنا ..

مفيش غير شوية كلمات وسطور، لكن اللي حصل ان وعيك و جسمك اتعاملوا مع الكلمات دي كأنها حقايق موجودة وملموسة على أرض الواقع
اللي حصل في المثال اللي فات ان عقلك عمل fusion او ربط بين شوية كلمات وسطور + إدراكك الشخصي للكلمات والسطور دي لدرجة ان جسمك بدأ يتفاعل مع أفكارك عن اللمون ..

وكأنه موجود فعلياً برغم ان ده مش حقيقي
ال cognitive fusion هو حالة عقلنا بيربط فيها (الأشياء او الأحداث) + (بأفكار او خبرات او تصورات معينة)، فا لما نيجي نمر بالشيء او الحدث ده تاني بنشوفه ونتعامل معاه وفقاً لتصوراتنا المسبقة عنه مش وفقاً لحقيقة الحدث ده، يعني ايه؟

تخيل ان أول مرة كنت تسوق فيها عربية لسوء حظك عملت حادثة، عقلك هنا هيربط السواقة بخبرتك المؤلمة اللي حصلتلك بسبب السواقة، وبالتالي لو بعد كده حد عرض عليك تسوق عربية احتمال ضربات قلبك تزيد او تتخنق او تتوتر و ترفض تماماً الفكرة، برغم ان كل الناس اللي تعرفهم بيسوقوا عادي

من غير ما يحصلهم حاجة، هنا عقلك عمل fusion بين السواقة + الخبرة المؤلمة اللي مريت بيها، ده بيورينا قد ايه ال cognitive fusion بيمنعنا من رؤية الأشياء/الأحداث على حقيقتها، لأننا بنكون واقعين تحت تأثير أفكارنا المسبقة عن الأشياء/الأحداث دي، و قيس على مثال السواقة ده حاجات كتير بقى

طفل مدرس الماث بتاعه قاله انه غبي فا كبر وهو بيكره الماث و لو شاف اي أرقام يحس انه اغبى إنسان في العالم، بنت ارتبطت بشخص خانها فا بقت تهرب من/تتعامل بعنف مع اي شخص يحاول يتقرب منها، طالب دخل امتحان مادة معينة معرفش يحل اي حاجة فا بقى عنده عقدة من المادة دي وكل ما ييجي يذاكرها

يتوتر ولو اتخيل الامتحان يجيله panic attack.. و و و..
في حالة ال cognitive fusion الإنسان بيكون مصدق أفكاره، منصاع ليها، و واقع تحت تأثيرها بحيث انها :
- بتستحوذ على كامل تفكيره و انتباهه (وبالتالي ميقدرش يشوف الواقع على حقيقته ولكنه بيشوفه من منظور أفكاره و خبراته الشخصية

فا بيكون حكمه على الأمور في اغلب الاحيان خاطيء)
- بتتحكم في تصرفاته و سلوكياته واللي في الأغلب بتكون غير فعالة وغير مفيدة لصاحبها لأنها اتبنت على طريقة إدراكه للحدث مش على حقيقة الحدث
طب تعالى عزيزي القارئ نجرب حاجة مع بعض، عايزاك تبص دلوقتي لإيديك الاتنين من ناحية الكف ..

و تتخيل ان إيديك دي هي أفكارك ،
قرب كفوف إيديك من بعض كأنك فاتح صفحتين كتاب
متكملش قراية غير لما تعمل كده انا شايفاك :D
دلوقتي عايزاك ترفع إيديك وهما على الوضع ده ببطء و ثبات ناحية وشك، و إفضل قربهم من وشك لحد ما يغطوا وشك بالكامل و عينيك، دلوقتي عايزاك تاخد دقيقة تبص فيها..

تبص فيها على العالم حواليك من خلال الفراغات الصغيرة اللي بين صوابع إيديك، و تلاحظ قد إيه الوضع ده مأثر على رؤيتك للعالم الخارجي ،
و كمان مخليك مش قادر تبص كويس على إيديك نفسها (واللي هي هنا = أفكارك) عشان تقيّمها إذا كانت صح ولا غلط وهل تصديقك ليها هيفيدك ولا هيضرك ..

طب تخيل لو قررت تقوم من مكانك و تتحرك لمدة يوم كامل وانت بنفس الوضع ده، إيديك مغطية وشك و عينك ويادوب قادر تشوف وتتعامل من خلال الفراغات الصغيرة اللي بين صوابعك، طيب لمدة اسبوع، شهر، يا ترى الوضع ده ممكن يحجّم رؤيتك للحياة من حواليك لحد فين؟
يا ترى ممكن يحجّم/يضلّل تصرفاتك و ..

و ردود أفعالك لحد فين؟
يا ترى إيه كمية الحاجات اللي ممكن تفوتك ومتعرفش تشوفها او تستمتع بوجودها بسبب الوضع ده؟
ده بالظبط اللي بيحصل في حالة cognitive fusion ، الإنسان بيكون مُقيّد و معمي عن الواقع بأفكاره وبالتالي بيفقد جزء كبير من اتصاله بالحياة الحقيقية اللي موجودة برة دماغه

و بدل ما يتصرف و يعيش وفقاً للواقع بتاعه و يسوق حياته بنفسه فا يوصل في النهاية للي هو عايزه و مختاره لنفسه، بيسيب أفكاره هي اللي تسوقه وكأنه في وضع ال autopilot فا يلاقي نفسه ماشي في طرق لا هي من اختياره ولا هو ده اللي كان عايزه من حياته
طيب هو ال cognitive fusion ده بيحصل ليه؟

لأن الإنسان من بداية عمره بيتعلم ربط الأشياء ببعضها في عقله، الطفل اول مرة يشوف فيها تفاحة مثلاً و يلاقي مامته بتأكلهاله بيربط في عقله التفاحة بالأكل، ولما يكبر شوية بيبدأ يربطها في عقله بأن طعمها لذيذ فا تتحول من مجرد أكلة إلى مصدر للمتعة، بعد شوية لما يعمل تصرف كويس ..

ومامته تكافؤه بتفاحاية هيبدأ يربطها في دماغه بالمكافأة وهكذا، دي طبيعة العقل البشري، إنه طول الوقت بيربط الأشياء و الأحداث والمشاعر ببعض، وكل ما بنكبر كل ما شبكة الترابطات دي بتكبر و تتعقد اكتر، و لأن وظيفة العقل الأساسية هي حماية الإنسان، بتكون اغلب الارتباطات دي للأسف سلبية

كنوع من ال survival mechanisms ، وهنا بتكمن خطورة ال Cognitive fusion
طيب هل ال cognitive fusion ده له حل ولا خلاص اللي اتلزق اتلزق واللي اتربط في بعضه اتربط ومش هنعرف نفكه تاني؟
علماء النفس لما حطوا نموذج الpsychological inflexibility hexagon، حطوا قدامه نموذج سداسي آخر ..

هو كمان بيتكون من ست محاور كل واحد منهم هو علاج مشكلة من مشاكل النموذج الأول و سموه the psychological flexibility hexagon أو The acceptance and commitment model hexaflex
و ده هنتكلم عنه بالتفصيل بعد ما نفهم مراحل تكوين الpsychological inflexibility جوانا عشان الرؤية تكون أوضح

طيب إيه هي باقي محاور الpsychological inflexibility الخمسة ؟
ده عزيزي القارئ هيكون موضوع الثريدس الجاية ان شاء الله، و لحد الوقت ده اتمنالك أوقات لطيفة و هادية بأكبر قدر من الرؤى الواضحة و أقل fusions و confusions ممكنة ❤
ليلتكم رايقة.

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد