رتبها

ثريد عن #الحمية و طريقتي في الريجيم
السلام عليكم ....
هذا الثريد سيكون تفاعلي، يعني ما راح يكون ثريد كامل مباشرة مرة وحدة ينزل، بس راح انزل تغريدة وره تغريدة ملتصقة حتى يصير تشويق بالقراءة وما تكون مجرد ثريد كامل ممل يعني ...
الحمية من خبرتي الخاصة ... والقاعدة الاولى شتقول ؟

لا تعمل حميتي مباشرة، ولا تخاطر باللي ممكن ما تتقبله، نعم اني طبيب وعندي خبرة بالسعرات وكذا، بس دير بالك ان تطبق كلامي بحذافيره لأن ممكن انه جسمك غير جسمي ...
لعد اللي راح اتكلمه هو علم وخبرة معاً
حتى نفهم شلون ننقص وزنا بادراك
و ان نتفادى مشاكل الوزن وسوالفه
تمام ؟

بالبداية خلي نخلي نقاط رئيسية :
1- انت وزنك بيه هواي عناصر من لحم وشحم وعظام واهم شي ماء !
2 - انت وزنك لازم على الاقل تعرف شنو الوزن المثالي واللي هو طولك - 100 اذا رجل او - 105 اذا امراة ... يعني اذا رجل طوله 175 سم يعني لازم وزنه يصير 75 على اقل تقدير ... وهذا المثالي!
تمام؟

3- السعرة الحرارية او الكيلو كالوري شنو يعني ؟ يعني وحدة طاقة ... مثل القياسات الها وحدات والكهرباء تقاس بوحدات فولتية امبيرية وقدرة وكذا والاحجام لتر على مكعب على على براحتك ... يعني هي السعرة معناها وحدة طاقة ...
زين هسه تقولي شكد نحتاج طاقة باليوم ؟
اقول هاي بيها حساب عادي!

الحساب يعتمد على عوامل كثيرة منها طولك ووزنك الحالي وعمرك وجنسك ومدى نشاطك اليومي ... فخلي نقول بين 25 الى 30 سعرة لكل كيلوغرام ... يعني اذا وزني 90 معناها احتاج الى 2250 سعرة الى 2700 سعرة كحد اقصى ... واذا تناولت معدل يومي غذاء 2700 سعرة لا راح انقص ولا ازيد غم واحد ! اوكي ؟؟؟

4- هسه شلون انزل وزن ؟ وشلون اتعامل ويه فسلجة الجسم ... هنا اللعب العلمي والمرتب وراح تعرف جسمك زين ... تعال وياي
انت هسه بعد ما جسمك اتعود على سعرات عالية وبدا وزنك يزداد .. شنو يزداد؟ عفية عليك...الشحم ديزداد...شلون يزداد ؟ عفية لأن الاكل مالتك الزايد عن حاجتك يتحول الى شحم !

زين يتحول الى شحم، شلون اقدر اقلل وزني لعد؟
شوف اخوية العزيز ... اذا ما تركز على هذه القاعدة الثانية وهي :
عليك بحساب سعراتك
سعراتك احسبها
لا تنسى يوميا تحسب سعراتك
يعني اي شي تاكله من ريوك الى عشا الى قبل ما تنام اكتب وصير وسواسي بحساب السعرات ....
هسه تجي تسألني شلون؟

تقدر تحمل تطبيق مثل fatsecret وهذا ممتاز، وحتى تقدر تغير اللغة الى العربية وحتى المكان الى مصر او السعودية وتشوف المشتركين كذلك وهو بيه تقويم يومي بحساب سعراتك مال الريوك والغدا والعشا والنمايم السناك ... تبحث عن الطعام وتكتب اسمه وتشوف شكد انت ماكل وشكد سعراته ... شويه جهد !

مثلا هذا يوم ٢٥ شباط الماضي... شكو شي اكلته دونته وكذلك الرياضة... وحتى تسوي قياسات خاصة بمقدار سعراتك اليومية ونشاطك... شويه جهد تعرف شلون تستخدمه... امورك تستعدل... تمام؟

هسه عرفت تستخدم التطبيق؟
اذا ما عرفت، حاول تعرف ... او تسوي حساب عقلك ميزانك ... تقدر مثلا اكلك اليومي تقطعه للنص ... اذا تاكل ماعون تمن يصير نص و خبزه تصير نص وكذا .... بس مع هذا كله حسابات غير منطقية لأن تظل انت صاعد فوك المسموح ... ويظل وزنك يزداد .... احسب سعراتك ! !

تعال ليجاي ... عرفت تحسب سعراتك وتخليها جوا المسموح ... بس يا ترى شكد تخليها جوا المسموح ؟
خلي في بالك اذا انت مثلا تحتاج يوميا 2500 سعرة حتى تبقى على وزنك ... وكمت تاكل 2000 سعرة بس خلال يومك ... يعني اكو 500 سعرة تخليها على صفحة واذا تضربها في 7 ايام هاي تطلع شكد 3500 سعرة ++

وتضيف اسبوع اخر هم 3500 سعرة ... يعني صارن 7000 سعرة وانطيها يوم لاخ والمجموع يوصل قرابة 7500 ... فاذا قدرت تحفظ 7700 سعرة من جراء اكلك اليومي مال 2000 سعرة اقل بـ 500 سعرة من المسموح الك ... مبروووووك نقصت كيلو غرام واحد ....
كل 7700 سعرة تنقص شكد ؟ = 1 كيلو غرام !

بس عبالك هي هيجي بسرعة؟
لا صديقي ... هذني 7700 سعرة اللي فقدتها لازم تفهم فد شغلة ... انه تحول جسمك من بناء الى هدم ... شلون ؟
اول ايام من الحمية من 500 سعرة مالتك ... احسب اربعة ايام راح تروح منها 2000 سعرة وهذه من مخزون السكر المعقد بالكبد والعضلات اللي اسمه كلايكوجين !!!!

بعد الاربعة ايام ... وتضيف عشرة ايام خلي نقول 11 يوم وراح تخسر كيلو كالاسد ... ووراها يتحول جسمك من خامس يوم هااااا الى هدم لأن ما كاعد يحقق الطاقة من الاكل اللي هي اقل 500 فيقوم ياخذها من الشحم ... يعني اول شي كلايكوجين بعدين شحم ... بالاخير ياخذ بروتين من العضلات ... وهاي صعبة!

هسه لو فرضنا انك تاكل 1500 سعرة باليوم بس ... يعني راح تختصر الاسبوعين الى اسبوع وتنزل كيلو غرام واحد ... يعني اربعة كيلو غرام بالشهر ... هاااا شكد حلو الحساب .... بس شلون ؟ احسب سعراتك يا صديقي .... احسب سعراتك ....
زين اشجعك ... واخليك تنقص نص كيلو لاخ ويه الكيلو شلون ؟؟؟

امشي ساعة وحدة ... راح تضيف اقل شي 200 سعرة تحترك ... فوك الالف اللي الجسم يسحبها من الشحم من اصل انت 2500 قلنا يعني تاكل بس 1500 و 1000 تنسحب من الجسم وتضيف عليها 200 ... تصير 1200 يعني بـ 6 ايام تخسر كيلو ... يعني 5 كيلوات بالشهر ... واذا صارت ساعتين مشي ؟ شكد تصير ؟؟؟

زين اذا تاكل بس 1500 سعرة ... واذا اكلت 1250 سعرة شلون ؟؟؟
المشكلة الاكل كله سعرات ... كومة .... اتخيل كرصة الخبز بيها 475 سعرة حرارية وانت يومك تاكل اربع كرص خبز ... بالعافية حققت سعرات يومك بس خبز ! !
اهنا اللعبة اختيار الطعام وشلون تحسب السعرات ... ترى سهلة بس تحتاج صبر !

فمال اجي اقولك اكل بيضتين الصبح على 170 سعرة وكلاص حليب على 110 سعرة يعني هسه 280 سعرة وماكو شي اسمه سكر او شكر (بدله ببدائل السكر الغير مصنعة ـ عن نفسي احب التروبيكانا قليلة السعرات) ويعني تطلع بريوك بدون خبز بس بيضتين وحليب بـ 300 سعرة ... يبقى الغدا شييييل منه الخبز والتمن ! !

والعشا كذلك سويه بس زلاطة بدون اضافات دهنية وخرابيط ... واحسب سعراتك بالتطبيق ... واذا تشتري شي معلب اقرأ شكد بيه سعرات ... لازم تعرف تحسب السعرات للـ serving الوحدة ... واشكد الوزن الصافي مال المنتوج ... مثلا لانشون 200 غم بيه 380 سعرة هذه العلبة الصغيرة ... اتخيل ! ! يعني ! !

اكو هواي انظمة غذائية مثل الكيتو والفيتو والمدري شنو ... ما اهتم بيهن بصراحة لأن صاير بيهن مشاكل ... بس الحمية بسعرات اقل مو كلش كلش ما تاكل ... عن نفسي باول حمية قوية قبل 8 سنوات اول شهرين معدل سعراتي اليومي كان 975 سعرة ومشي بالقليل 5 كيلو يوميا!
هاي كلش منهكة .. لا تسوونها

هاي صورة من اول اسابيع ذيج الحمية بديسمبر 2012 وامتدت ستة اشهر وشلون كنت مرتب ومراقب كلشي ... السعرات الحرارية اللي اكلها / السعرات المحروقة بالرياضة / السعرات المتبقية او balance .....

اني اتحمل ومتعود على سعرات قليلة وخصوصا اول اسبوع بعدين ارجع على 1500 حدي اليومي مع الشغل او المشي او الجيم ... وفد سالفة ... فدوة حمل تطبيق عدد الخطوات Pedometer وكون هذا اللي لونه على احمر الاصلي الممتاز ههههه حتى يحسب الخطوات بصورة صحيحة او حتى مال السامسونغ او الايفون ! ليش؟

لأن انت راح تقرا شكد سعرات مخلصها بالمشي وهاي كلش مهمة بالحساب مع شكد مقلل من المسموح بيه اللي قلنا فد 2500 ... وانت تاكل فد 1500 واتصور انت ماشي ومحقق 500 سعرة...يعني انت حارك بذاك اليوم 1500 واضربها في عشرة ايام يعني 15 الف يعني كيلوين واذا بشهر معناها شكد ؟ بالقليل 5 كيلوات !

هذا يومي... ماكل ١٣٧٧ سعرة وحارك بالجيم قرابة ١٥٠٠ والمشي فد ٦٢٠ يعني بس حارك صافي ٢١٠٠ سعرة + ١٠٠٠ من قلة الاكل= يعني خلي نقول ٣٠٠٠ سعرة اجمالية يعني وقسمها على ٩=٣٣٣ غرام شحم وخلي اقول ٢٥٠ غرام شحم.. يعني كل أربعة أيام انزل كيلو المفروض..
بس لأن دوام عندي ومو كل يوم جيم 😣

هسه وصلت الفكرة؟ احسب سعراتك وراقبها...
اكو طريقة اسمها زك زاك... يعني يوم تقلل ٥٠٠ ويوم ٧٥٠ وبهاي الحالة تخلي الجسم يتفاعل وياك وما يصير توقف بنزول الوزن لأن يصير بعد ما تنزل فد عشر كيلوات يوكف وشما تسوي ما ينزل.. لازم تغير وتبدي تمارين ورياضة.. اخدع جسمك أو حتى اكل اكله دسمه!

بس حتى تخدع عقلك، ومع هذا يقال وجبة دسمة أسبوعيا ما بيها ضرر عليك... ما دام انت بطور الهدم...
الووو لا تنسى رجاءا عليك بالماي... كركع ماي، صير رگة واشرب ماي كومة لا تقصر على نفسك... لأن بطور الهدم الدهون تتحول إلى كيتون وهذا حتى يطلع يحتاج ماي... شويه كيمياء معقدة ترى!

راح تشوف ادرارك بعد الأسبوع الأول بمرحلة الهدم حتى بيه كيتون عبالك بيك سكر يا ستار، لا لا أو عبالك انت في جفاف لا لا.... الكيتون مصدر طاقة لأن الدهون من تتحرر تصير منها كيتون.... وانت لا تنسى تحتاج سكريات طبيعية علمود تبقى مستوى السكر طبيعي علمود دماغك.... لا تكوم تهلوس!

اهم شي تواظب على شرب الماء والحركة ووزنك يقل تدريجيا أفضل من الكيتو والفينو وكذا....
لا تنسى عليك بالبروتين... احسب نص غم بروتين بكد جسمك... يعني اذا ١٠٠ تحتاج بالقليل القليل ٥٠ غرام بروتين علمود الأيض والنمو... تمام ؟
اترخص ونكمل بعدين... محبات

خلي نكمل.. صباح الخير
اكو شكم ملاحظة مهمة حول موضوع الحمية :
💡 لمن تحسب وزنك - احسب وزنك الصبح بعد ما تروح للحمام وتفرغ تكرم الحاجتين وتكون بعدها بأقل ملابس ممكنة - كلشي محسوب وزن.. اتفقنا؟
💡 ثاني يوم راح تفرغ بطنك عادي بس ممكن تصير بطنك قبض أو تطلع بكمية أقل بسبب قلة الطعام!

لذلك عليك بالاغذية اللي تسهل البطن، مرات يقولون الياف بس هم الألياف تسوي قبوضية عندي، اللالنكي زين او حتى شراب مسهل آمن تأخذه من الصيدلية اذا قبضت بطنك فد أكثر من ٣ ايام... بس مو معناها اذا بطنك قبض وغازات ما تطلع وتقيؤ وهاي ما صايرة - هنا تضطر تروح للطبيب - هاي مو بسبب الحمية!

إذا تحب تقرأ هذا المنشور اللي كتبته قبل ٣ سنوات بـ ٢٠١٧ في إحدى حمياتي - اول شهر من هذه الحمية بذيج السنة (هواي مسوي حميات) وتشوف تأكيدات كلامي السابق.....
وراح نسولف بعد