الصبر و فن الدفاع
—
شوف الـ Thread
—
شوف الـ Thread
- واحد من التكتيكات اللي استخدمها محمد علي كلاي ، هو اسلوب الدفاع ، محمد علي كان بيركن على الحبل و يحمي وشه و يكشف بطنه عشان المنافس يركز على بطنه و مع اخر الجولات بعد ما الملاكم اللي قدامه طاقته تخلص يقوم محمد علي بلكمات سريعه جداً يكسب الماتش
- التكتيك الشهير اللي استخدمه مارشيلو ليبي مدرب منتخب ايطاليا في كاس العالم ٢٠٠٦ اللي فازت بيه ايطاليا ، و هو الدفاع الصلب و التحول السريع بهجمات مرتدة سريعه للدغ المنافس ، المنتخبات المنافسه كانت بتبادر بالهجوم المكثف بسبب الطعم اللي عمله منتخب ايطاليا
- ميزة استخدام تكتيك الدفاع في الحياة انها بتخليك تتجنب معارك كتير مش ليك ولا انت جاهز تخوضها اصلا ، المعارك اللي موجودة في كل يوم بتمر بيه مش حل صح انك تواجهها كلها لان ده هيخليك تخسر الكتير
- معارك الحياة المستمرة و المتواصله بتستنفذ طاقة الانسان لو واجهها كلها ، لان مش صح انك تهاجم و تواجه المشاكل اللي في حياتك عشان كل ده هيجي على حسابك أنت ، لكن الصح انك تختار المعارك و الوقت المناسب اللي تهاجم فيه و المعارك اللي تستنفذ فيها طاقتك
- أهم عنصر لازم يتوفر في استخدام تكتيك الدفاع هو الصبر ، كل ما كنت صبور أكتر و هادي اكتر ، كل ما ثقتك في نفسك هتزيد مع الوقت و تختار القرارات الصح بنسبة أعلى ، و لو فيه منافس قدامك كل ما كنت اهدى و صابر مع مرور الوقت هيتوتر مجهوده هيخلص اسرع
- تكتيك الدفاع بيقولك ان كل ما اللي قدامك بيتحرك ، ده معناه انك المتحكم في اللعبه ، لان كل ما اللي قدامك بيتحرك مع الوقت و مع صبرك هيتوتر و بالتالي هيكشف اوراقه فأنت هتكتشف ثغرات تقدر تفوز بيها و تهاجم منها منافسك او المشاكل اللي بتواجهها
- يمكن اكتر مثال مشهور في الحياة العملية لاستخدام تكتيك الدفاع هو لما حد ينتقدك و يشتمك و انت تحتفظ بهدوءك أكتر و تلتزم الصمت ، فصمتك يستفزه اكتر فيزود هجومه و يشتمك اكتر و يتجاوز حدوده اكتر ، فيبدأ يجيب اخره لحد ما يقع لوحده و من نفسه قدام الناس و يكتشفوا انه هجاص
- اشهر مثال لده هو مرتضى منصور و الاهلي ، مرتضى لما كان بينتقد الخطيب و الساعات و الهدايا و الكلام ده ، الاهلي سكت و مردش ، مرتضى لبس الطعم و زود هجومه و شتم عاب ، لحد ما مجلس الاهلي قدم اكتر من بلاغ كانت سبب في وقوع مرتضى منصور
- في تعاملك مع المشاكل اللي في حياتك ، كل ما كنت صابر اكتر و محتفظ بهدوءك و كل ما زاد برودك ، كل ما ثباتك النفسي و قدرتك على حل المشكلة هتزيد ، سواء كنت انت اللي هتحلها او هي اللي هتخلص لوحدها ، لكن لما تتوتر ده هيخلي نسبة اتخاذك للقرارات الصح اقل
- للمرة الاخيرة ، بلاش انت اللي تروح لعدوك او انت اللي تروح للمشاكل برجليك ، سيبها تيجي لحد عندك و خليك هادي ، كل ما كنت هادي غموضك هيزيد و اللي قدامك هيظهر اوراقه تقدر من خلالها تكتشف ثغرة تكسب منها ، خليك هادي و صبور و الاهم انك تختار معاركك و الوقت المناسب للهجوم
جاري تحميل الاقتراحات...