بمناسبة السفينة الجانحة اللي تحركت الحمد لله افتكرت أيام ما كنت شغال في الترسانة البحرية في اسكندرية. اشتغلت فيها حوالي 9 سنين في بداياتها. كانت الترسانة كل سنة تصنع سفينة تجارية ضخمة وسفينتين حربيتين او واحدة صغيرة. كان يوم تدشين السفينة يوم عيد في الترسانة واسكندرية كلها.
عيد في الترسانة فرحانين بالمولود الجديد وعيد في اسكندرية لان بيتم صرف 15 يوم مكافأة في نفس اللحظة فالصرافين بيبقوا قاعدين جنب المركب تنزل من هنا ونقبض من هنا وينزل عمال اسكندرية المنشية ومحطة الرمل ييصرفوا الفلوس اللي كان 3 جنيه منها يشتروا صوف بدلة هيلد.المهم سنة 1972
قررالسادات يحضر التدشين . كانت الدنيا مظاهرات ضده في الجامعة علشانت تاخر في تحرير سيناء. طبعا اللي يهم العمال انه مادام السادات جاي يبقي المكافاة حتكون شهر لأنه رئيس الجمهورية ولازم يفرق . جاء السادات ومشي بين العمال والهتافات علي ودنه تحية ليه. التدشين بيتم ازاي ؟
المركب بتتصنع علي منحدر خرساني وسط المياه بيسموه القزق . يقفلوا أبوابه والمياه تتشفط ويتعزل عن البحر ويتم بناء السفينة عليه . السفينة اللي عليه ممسوكة من آخرها من الناحية اللي قدامنا مش ناحية المياه بعامود حديد قوي ملحوم فيها وطالع من صخرة قوية. ييجي بتاع لحام بالنار
يذوب عامود الحديد فالمركب تتزحلق علي القزق لأن تحتها شحم وتنزل البحر. طبعا بيكونوا فتحوا الأبواب اللي بتفصل القزق عن البحر لكن القزق عالي فالمياه مش واصلة للسفينة. أول ما تتزحلق تنزل المياه العمال تهلل والمراكب في البحرتسمع التهليل والصفارات فتضرب صفارات المراكب البعيدة والقريبة
كلها ترحب بالمولود الجديد . طبعا بيبقي عليها البحارة أول ماتنزل المياه يوجهوها بعيد. بس علشان دا يتم لازم يتم التدشين بفرقعة زجاجة من مياه النيل في صاري من صواري المركب. عادة بيقف المسؤول اللي حيدشن ورا المركب ماسك القزازة بإيده والقزازة مربوطة بحبل في صاري السفينة .
كل اللي عليه أول ما تتزحلق يسيب القزازة فترجع مع نزول السفينة تضرب في الصاري وتتكسر وهنا يرتفع التهليل. كدا تم التدشين بنجاح . خدت المركب بركتها من مياه النيل . المهم السادات وقف ماسك القزازة ومبتسم أوي وأول ما المركب اتزحلقت حدف القزازة ماسابهاش ترجع برد الفعل الطبيعي .
حدفها فراحت بعيد عن الصاري وما خبطتش فيه فالعمال صرخوا يييه يييه وتشاءموا لأن كدا المركب نزلت آه لكن التدشين ناقص بركة مياه النيل. واحد من العمال قفز اتعلق بالمركب وطلع عليها ومسك القزازة ضربها في الصاري كسرها والعمال زيطت الله أكبر الله أكبر والسادات مذهول من ردود الأفعال .
مشي السادات وقبضنا المكافاة الشهر والعمال وكلنا الحقيقة ميتين من الضحك . نزل العمال المنشية ومحطة الرمل خلوا اسكندرية عيد. شهر يامحترم تشتر ي بيه شبكة زي الفل وتخطب. ياريت هيئة القناة تصرف مكافأة لكل اللي شغالين فيها بعد ما عامت السفينة اللي كانت شاحطة ومعطلة الدنيا.
جاري تحميل الاقتراحات...