رتبها

"عقيدة الصدمة" طبعاً هاتسأل نفسك ايه دا..دا يامعلم عنوان كتاب للكاتبه الرائعة"نعومي كلاين"وعشان ابسطلك الفكرة هناخد كام مثال كدا.. بص يا معلم..
أحمد موظف مرتبه 1000ج في حين زمايله في شركات تانية مرتباتها 2000ج وزيادة، في يوم بقى جاب أخره وخد حبتين شجاعة وقال مبدهاش بقى ..

لازم أدخل للمدير أقوله يزودلي المرتب، المدير قاله في أسى إن الشركة بتصفي جزء كبير من الموظفين ومجلس الإدارة قرر يمشي نصهم وهو كان من الجزء اللي هيمشي آخر الشهر للأسف !.
أحمد اتصدم وسرح بخياله في حياته اللي اتقلبت 180 درجة والاقساط اللي متكومة عليه وطلبات البيت والعيال..

وخططه اللي اتهدت فوق دماغه..
وبعد دقيقة المدير كسر صمته وقاله بص يا أحمد إنت زي ابني عشان كده انا هحاول أتكلم مع المجلس ومش هتمشي، بس للأسف مرتبك هيقل وهيبقى 700 جنيه وده اللي أقدر أعمله، فصاحبنا روحه ردت فيه وابتسم.
أحمد كان داخل للمدير متعصب ومش ناوي يتنازل عن 2000 ج مرتب،

دلوقتي هيطلع من عنده مبسوط رغم إنه اتخصم منه 300 جنيه ! وده بسبب الصدمة اللي نفذها المدير عليه.
لما صاحبنا رجع البيت كانت سارة بنته قاعدة مع والدتها في ترقب مستنين حد يكلمها يقولها على نتيجة امتحاناتها، التليفون رن وهي ردت وعرفت إنها سقطت في مادة، فكرت للحظات في رد فعل أهلها ..

ووابل الإهانات والتريقة والندب اللي هتسمعه، راحت وقعت ع الارض مرة واحدة ويكأنها أغمى عليها ولما فاقت انفجرت في بكاء وانهيار عصبي مصطنع وقفلت الباب على نفسها ويكأنها دخلت في دور اكتئاب حاد.
من دقيقتين سارة كانت هتاخد وابل من التهزيق، دلوقتي أهلها بيحاولوا يفرفشوها ..

ونزلوا جابولها شاورما وبيبسي وجاتوه وقالولها تعليم إيه اللي تدمري صحتك عشانه، عادي هو إنتِ أول واحدة تشيل مادة؟ وده نتيجة الصدمة اللي طبقتها سارة على أهلها..
واحد من أعظم الكتب في التاريخ هو"عقيدة الصدمة" للرائعة "نعومي كلاين"، بتوضح فيه إن أي إنسان لما بيتعرض لصدمة ما ..

بتتكسر خطوط دفاعه ومقاومته وبيقدر يتقبل أوضاع مستحيل كان يتقبلها في الوضع الطبيعي، وعقله بيتحول لعجينة لينة تقدر تشكلها كيفما تشاء.
النظرية اتبلورت أكتر على يد عالم الاقتصاد الشهير ميلتون فريدمان اللي كان عايز يخلي الشركات الأمريكية الكبرى تتحكم بمصائر وقرارات دول كاملة،

فقال إن تأثير الصدمة نقدر نطبقه على مستوى الشعوب والمجتمعات وليس الأفراد فقط، يعني لو إنت شخص مسئول عن دولة ما وعايز تمرر سياسات اقتصادية واجتماعية مستحيل الشعب يوافق عليها في الظروف العادية وهيقاومها بشدة، فأنسب طريقة هي تعريض المجتمع لصدمة ما،تضخم اقتصادي وارتفاع ضخم في الأسعار

يخلق أزمة اقتصادية طاحنة،ثورات،انقلابات، اضطرابات،عمليات إرهابية،حروب عسكرية، ومش شرط إنت اللي تخلق الأزمة؛ لأنها ممكن تكون كارثة طبيعية من زلازل وسيول أو محاولة انقلاب فاشلة، لكن المهم تعرف تستغلها صح وتتحرك فيها بسرعة وتطبق السياسات اللي عايزها قبل رجوع المجتمع لحالته الطبيعية.

الصدمة هتخلقلك أوضاع جديدة تقدر من خلالها تهندس المجتمع وتعيد هيكلته من جديد، تقدر تخفض الإنفاق الاجتماعي وترفع الدعم عن خدمات كتير، وتحجم القطاع الحكومي وتخصخص شركات كتير، تقدر تشتري أراضي وشركات بتراب الفلوس وتهجر أهالي كتير من بيوتها، وكل ما كانت الصدمات أشد ومتتالية ..

تشغل بيها الشعب هتوفر وقت أكبر لتمرير السياسات دي، ثم"نعومي" قالت لو العملية طويلة ومؤلمة والناس مش هتقدر تستحمل لازم هنا تخلق عدو وهمي وخوف الشعب منه، بس بسرط مهم جدا، لازم يكون ملامحه غامضة وشبح هلامي محدش يقدر يحدد أبعاده أو يعرف يمسكه.
في أمثلة كتير وتفاصيل كتير ذكرتها نعومي

لكن في الفصل الأخير ذكرت أهم شيء، أن شرط نجاح عقيدة الصدمة هو غياب الوعي، لازم تخلي المجتمع مش فاهم إيه اللي بيحصل، لأن الصدمة بتخسر معظم قوتها وأغلب فاعليتها لو اتعرفت.

يعني لو أحمد كان عارف إن المدير بيحور عليه أو إن سارة بنته بتمثل أكيد .. أكيد كان هيبقى له رد فعل آخر.ّ.
#Cpd
المهندس احمد عبد المنصف
#feed_your_mind

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة