رتبها

طلبتوا حدوتة زواج مسيلمة الكذاب وسجاح بنت الحارث..هبتدي الأول إني أعرفكم مين هما مسيلمة وسجاح.. حسب وجهة نظري يعني ورأيي فيهم هما الجوز..
‼️ثرِد طويِـٓــِٓلّ أوي💁🏻‍♂️ حضروا لنفسكم مشروب على مزاجكم.. وأقعدوا رايقين شوية.. ومزمزوا في الحدوتة.. وإقروا بالراحة ما تستعجلوش دي حدوتة‼️

مسيلمة الكذاب اسمه الحقيقي مسلمة بن حبيب بن قيس بن كثير الحنفي.. زعيم قبيلة بني حنيفة في أرض اليمامة في نجد في شبه الجزيرة العربية.. من رأيي إنه كان صاحب محلات بازارات.. ومكاتب صرافة وبيتاجر في الآثار وبيسافر كتير ويلف الأسواق المشهورة في شبه الجزيرة العربية والبلاد اللي حواليها

ويعرف كام جملة كده من كل لغة بيتعامل بيهم مع الكليانتس بتوعه.. يعني بيتكلم عربي أكيد مع شوية فارسي وشوية رومي وكام جملة عبري على كام جملة صيني
ويمشي حاله.. وكان أصلاً خريج معهد عالي خدمة إجتماعية ودارس علم إجتماع بئا وإحصاء.. وأدرجي زي أي HR أراري كل اللي يهمه تخييط الزبون

وكان بيدرس آداب خغرافية إنتساب.. وماشي مع بنت من فنون تطبيقية بتشتغل رقاصة في بار مشارك فيه.. وبيحضر معاها محاضرات عشان يشقط صاحباتها في الجامعة.. فاهم.. بإختصار يعني كان صايع ونصاب وحلنجي وبيعرف يتوه الناس اللي بيتعامل معاهم وينصب عليهم.. ويمصلح وياكل على قفاهم عيش وكريپ..

من كتر صياعته إتعلم من الحواة والمشعوذين والدجالين اللي كان بيشوفهم في الأسواق والرحلات اللي بيعملها.. أو بيتعرف عليهم لما كانوا يروحوا يشتروا أو يبيعوا للبازارات بتاعته ويتعاملوا معاه.. ولقط منهم بعض حركات من اللي بيعملوها..

كان بيلعب كوتشينة ويعرف الألعاب السحرية المبهرة اللي فيها.. كان بيشرس كلاب ويبيعهم لرعاة الغنم المنتشرين في البلاد المحيطة به.. كان مفعل كمان النوتيفيكشن لأبلكيشن بيقولك.. فلما تجيله رسالة إن طريق محور القبايل واقف عشان فيه حادثة.. أو يقرا التاروت إن فيه عاصفة هتهب بالليل..

يقول للي معاه بلاش تسافروا من الطريق ده عشان فيه عوأ في السكة.. وتاني يوم الناس تعرف الأخبار عن اللي قاله.. لو صح يقولوا عليه واآاو أوييييي وجامد أخر حاجة..
أو يطلع الكلام فشنك ويتريقوا عليه ويحقرّوه..

وهو كان عنده قدرة على التبرير لكل أخطاؤه بحيث مايطّلَعش نفسه غلطان والخطأ دايماً بسبب حد تاني أو حاجة تانية {طبعاً كلنا إتكعبلنا في شخصية زي دي.. الملايكة الكيوت الطعمين دول اللي مابيغلطوش أبداً ودايماً شايفين نفسهم معاهم حق في كل تصرفاتهم وكلامهم.. وغيرهم أكيد هو اللي غلطان}

المهم وصل بيه الحال إنهم سموه "مسيلمة" بدل "مسلمة" نوع من أنواع التصغير من شأنه يعني والإستهزاء به من قبل حتى ما يتدعي النبوة.. هو كان ظاهر في بلده ومتصدر المشهد عشان ابن ناس أغنيا.. وعشان هو كمان حلنجي.. وغاوي مظاهر ومنظرة.. وبيعرف يجيب القرش من تحت العفرة..

وكان يبان من ذوي الرأي وباين عليه النعمة بسبب شغله في السياحة والتجارة في العملات والصرافة والآثار.. كتير من الكتب اللي إتكلمت عنه كانت بتقبح من شكله وتصفه بالدمامة وتقول إنه كان قبيح الوجه ودميم يعني ومصدي وقصير ومفشكل وحاجات كده.. بس بصراحة أنا مش مقتنع بالكلام ده..

عشان لو كان بالصفات دي مكانش بقى له أتباع كتير زي ما هنعرف كمان شوية.. والكلام اللي وصلنا عنه مكتوب بإيد كارهييه.. هو كان إبن حرام مالوش عازة.. بس برضو إنصافاً للمنطق هقول إن فيه بعض الكتب كانت تصفه بالشكل الحسن.. فقد كان معتدل القامة وبيلبس لبس شيك وكان أبيضاني وخدوده بتبوك دم

وده بالنسبة لي رأى مقبول.. وبالطبع لن يشفع لخبثه وسوء خُلقه.. لإن عادي يعني يكون الكداب والحرامي والنصاب شخص شكله وسيم وباين عليه إنه إبن ناس ومش وش الحاجات دي.. والمظاهر خداعة طبعاً زي ما كلنا أكيد عارفين..

يقال أيضاً إنه لما اتقتل كان عمره فوق الـ100 سنة.. بس ده كلام أنا مستبعده تماماً لإنه كلام غير منطقي بالمرة.. وهتفهموا ليه بعد شوية في الحدوتة.. "إتكوا بس ع الصبر"🤌🏻

وكان منتشر بين الناس أخبار عن نبي سيظهر في العرب يكون خاتم المرسلين ولا نبي بعده.. وكان مسيلمة يدعي النبوة قبل أن ينزل الوحي على "سيدنا محمد عليه افضل الصلاة والسلام" وتظهر رسالة الإسلام..

لإنه زي ما قولتلكم من شوية كان صايع وحلنجي ومتعلم ألعاب حواة من كتر الكباريهات والكازينوهات والأسواق اللي كان بيروحها.. مثلاً هو كان بيأثر على الناس السذج بألعاب من نوعية البيضة والقارورة..
كان بيحط بيضاية في الخل لفترة من الزمن لحد لما تطرى وتبقى مطاطية كده ويدخلها جوة إزازة..

أو كان بيعمل الطيارات الورق🪁 ويعلق فيها شخاليل وأجراس صغيرة ويلزق فيها ريش ويطيرها من فوق سطوح بيتهم بالليل عشان الناس تصحى بالليل على صوت الشخاليل والأجراس.. فيطلعوا يلاقوها بتحوم حوالين بيته.. ويقولهم إن دول كانوا ملايكة نازلين عليا بالوحي.. وناس كتير وقتها صدقته طبعاً..

كان بيعرف كمان يستفاد من إستفزاز المتابعين وشتايمهم.. فيطلع يهبد أي هبدة والناس تتكلم عنه ويتمسخروا عليه أو يستنكروا كلامه بس هو المهم عنده يفضل تحت الاضواء والناس تتكلم عنه حتى لو بيشتموه.. يطبل.. يشجب.. يفتي.. يهبد.. يتخانق مع حد ويتسافل.. المهم يطلع في التليفزيون ويتشاف..

طب أسلم إزاي ‼️
قبل وفاة الرسول صلى الله عليه وسلم وبعد فتح مكة كانت كل قبائل العرب أرسلت تبايع الرسول على الإسلام أو الجزية من غير حروب.. ومن أواخر القبائل قبيلة اليمامة اللي منها مسيلمة.. وكان هو من ضمن وفد مكون من عشر رجال من وجهاء ومفوهين وأعيان وسادات قبيلة اليمامة..

وهو كان عارف إن رسول الله صلى الله عليه وسلم كان دايماً يكرر فيما معناه إنه إذا سافر بعضكم في طريق فإن خادم القوم أكرمهم/أحسنهم/أفضلهم/خيِّرِهم/ أعلاهم قدراً / وهكذا..

الرسول كان يقصد بتكرار هذا الكلام كثيراً.. في كل مرة يسمع إن في حد بيخدم حد في سكة سفر أو في غربة.. كنوع من أنواع التشجيع على التعاون وتخفيف أعباء السفر عن الناس.. يعني لو مجموعة رجالة طالعين رحلة واحد يطبخ والتاني يعمل الشاي والتالت يسوق والرابع يشيل معدات الكامبينج وكده يعني.

فلما مسيلمة راح مع تسعة رجالة من قومه لمبايعة رسول الله محمد عليه افضل الصلاة والسلام.. و وصلوا للمدينة قال لباقي الرجالة اللي معاه روحوا إنتوا وأنا هستنى هنا أحرس الشنط والركايب وأجرش العربية وأغيرلها زيت ومية وأستناكم لحد ما ترجعوا من عند النبي ونرجع كلنا سوا على قبيلتنا

بس ضروري.. ضروري جداً يا رجالة لو النبي محمد سألكم عني ما جيتش معاكم ليه.. قولوا إني واقف أحرس الشنط وأخدم ع العربية وأحرسها عشان عيال الحارة ما يخربشوش الصاج..

فعلاً الرجالة وصلوا للرسول عليه افضل الصلاة والسلام وكان قد بلغه إنهم كانوا 10 عند وصولهم للمدينة ولكنهم 9 فقط أمامه.. فسألهم عن العاشر فقالوا إنه يحرس أمتعتنا ويجهز لنا ما يعيننا على رحلة عودتنا.. فقال الرسول صلى الله عليه وسلم خادم الناس أفضلهم فهو أفضلكم.. وبايعوه ورحلوا.

ولما وصلوا لمسيلمة سألهم ماذا قال محمداً حينما سألكم عني.. قالوا إنه قال إنك أفضلنا..
فصرخ بصوت عالي من فرط الفرحة وقال عليا النعمة الزميل النبي محمد ده بيفهم.. وبقت رسمي أهو..أهو..
وأنا واد خلاصة لاصة ومية مية.. وعم الكل كل في الحتة ديا.. ما تيجي يا ساڨو..يا ساڨو..يا ساآاڨو..

و قعد يرّغي كتير في النقطة دي.. ويأڨورها.. ويستقطعها من سياقها.. وينفخ فيها لحد ما عمل رغاوي كتير.. وفقاقيع بتطير حواليه في كل حتة يروحها ويقعد يرغي فيها.. وكل ما يتظفلط في حد يحكيهاله ويقول: محمد رسول قريش قال إن أنا أحسن واحد في الناس اللي قدامك دي كلها..

مسيلمة ده كان شايف النبوة من منظور مختلف تماماً.. كان شايفها مهنة مثلاً أو حرفة أو مكانة إجتماعية أو حتى وظيفة ثابتة مثلاً في أعلى السلم الإداري للمجتمع.. وإن طبيعي يكون فيه نبي لكل إقليم.. ويتعمل المهرجان السنوي للأنبياء..

ومن طموحه تأسيس المعهد العالي للنبوة والرسالة ويتخرج منه أنبياء تحت التدريب يخدموا في الأماكن النائية.. ولما ينجحوا في الإمتياز يتثبت نبي قرية ولا نبي مدينة.. حسب ما يجيله جواب التكليف من الهيئة العليا لشئون الأنبياء و المرسلين..

أو حتى يشتغل نبي free lancer
يعني نبي على باب الله حرفياً.. ويشتغل لحسابه أو لحساب الإسبونسرز حسب ميزانية الدعوة النبوية بئا وتوجهاتها والإعلانات المدفوعة.. وله فيها نسبة طبعاً‼️

دي كانت الفكرة الثورية اللي بدأت تظهر في عهد مسيلمة الكذاب.. ومكانش هو لوحده اللي ظهر بالأفكار دي.. بالعكس.. ده كان فيه ناس كتير لكن أشهرهم مسيلمة وسجاح..

ممكن بسبب إنهم كانوا إنفلونسرز جامدين ووراهم سبونسرز براندات عالية وعندهم متابعين كتير لحساباتهم عالسوشيال ميديا.. وبيعملوا داي يوز ببلاش في أي فندق يروحوه.. وكانوا بيفرقوا كروت شحن.. ودقايق مجانية.. وأزايز زيت وإكياس سكر وأعواد سواك.. ولهم حملات نبوية منظمة بعناية..

المهم فضل مسيلمة يعمل ألعاب الحواة والسحرة والمشعوذين ويستغل جهل الناس ويتحدث معهم بالسجع والقافية ويستفزهم للحديث عنه حتى ولو تهكماً ويسعى دوماً أن يقترن إسمه في جملة واحدة مع "رسول الله" وأن يوضع في مقارنة معه حتى وإن كان متأكداً أنه سيخسر المقارنة ويسبه الناس ويسخرون منه..

كل ده مش مهم.. اللي فارق معاه بس.. إن الناس تجيب سيرته وسيرة النبي محمد"عليه الصلاة والسلام" وتقارن مابينهم.. وتنتشر المقارنات دي في أحاديث الناس.. ويبقى عادي على ودان الناس إنهم يسمعوا الإسمين مع بعض.. والإتنين يتقال عليهم أنبيا وهداة للضالين وأصحاب معجزات..

فكان لما ينزل على الرسول محمد "عليه الصلاة والسلام" سورة من القرآن.. ويتحدث عنها الناس أمام مسيلمة يقول: قلود أوي رسول قريش ده.. أنا أمبارح نزل عليا الوحي بسورة زيها.. وأحسن منها..

فمثلاً نزلت على "الرسول محمد صل الله عليه وسلم" سورة الفيل
(بسم الله الرحمن الرحيم..أَلَم تَرَ كَیفَ فَعَلَ رَبُّكَ بِأَصحَـٰبِ ٱلفِیلِ۝أَلَم یَجعَل كَیدَهُم فی تَضلِیلࣲ۝وَأَرسَلَ عَلَیهِم طَیرًا أَبَابِیلَ۝ تَرمِیهِم بِحِجَارَةࣲ مِّن سِجِّیلࣲ۝فَجَعَلَهُم كَعَصفࣲ مَّأۡكُولِۭ).

وسمع الناس بتتكلم عن السورة دي.. وتربط أحداثها بحملة أبرهة الأشرم لهدم الكعبة وما حل بجيشه والفيل وطير الأبابيل وكل هذه الأحداث..
الصورم نأح عليه وقال: ياسلام وإنتوا يعني مبهورين أوي بالسورة دي.. طب ما أنا كمان نزل عليا سورة عن فيل تاني من بلاد السند مش من بلاد أبرهة..

بسم"روحمن اليمامة"👉🏼إسمه
وَالْفِيلْ.. يا عيني ع الفيل.. وَمَا أَدْرَاكَ مَا الْفِيلْ.. لَهُ زَلُّومٌ وذيل.. بيشخلل الشخاليل.. ويبقلل البقاليل.. وبيرقص ويميل.. وأنا وإنت يا جميل.. قدامنا الليل طويل.. إتلهي على عينك يا سئيل.. يا رذيل.. يابو دم تقيل"
صدق أبو ثمامة الحنفي👉🏼كُنيته

القصد إنه كان كلام سخيف عموماً ولا يرتقي حتى لأقوال الشعراء.. وكانت لغته ركيكة وكلامه ضعيف و غير ذي معنى..
كأن يقول في معارضته لسورة الكوثر إنه نزل عليه سورة أفضل منها و يتلو شيئاً من هذا القبيل : 👇🏻

إن أعطيناك التذاكر.. ومسكناك المباخر.. فأنقر على المزاهر.. ورا الأوسطا سماهر.. ومسخر المساخر.. ومحدش فاكر..
كان بيهرتل أي كلام مرصوص له سجع حتى لو مالوش معنى.. المهم يكون كلام خفيف والناس تغنيه وتحفظه وتسف عليه ويكرروه.. ماشي يعني بمبدأ "إديني في الهايف وانا أحبك يا مسيلمة"

روى عن عمرو بن العاص قبل إسلامه إن مسيلمة إتفزلك بسورة قدامه وقال إنها وحي نزل عليه عن حوار بين أرنب وخروف
الأرنب قال: يا خروف يا خروف يابو لية وصوف، قرونك ملولوة وعينك مش بتشوف
فرد عليه الخروف وقال: يا أرنوب يا أرنوب يا عجوز يا كركوب، مافيكش غير ودان وصدر، والباقي مش محسوب.

وسأله مسيلمة: هاه ‼️ إيه رأيك بئا في الوحي بتاعي يا عمورة 😃
فرد عليه عمرو بن العاص وقاله :
إنت كداب يابو صلاح.

ولا كان بيهمه التهزيق.. ولا إن الناس تشوفه سخيف.. المهم يفضلوا يتكلموا عنه ويقارنوا بينه وبين رسول الله صلى الله وسلم.. وهو يبرر وكسته وخيبته كل مرة بإنه يرمي أي خطأ على غيره.. أو على أي حاجة مالهاش علاقة بالموضوع.. ويتهم الناس إنهم مستواهم العقلي أقل بكتير من إنهم يفهموا كلامه

أعراض شبيه يعني بأعراض جنون العظمة وشعوره إنه أحسن واحد في اللي حواليه وكل الرجالة بتغير منه ويحسدوه.. ونفسهم يبقوا زيه.. وينولوا _الموغاد_ ويبقى كل لبسهم بدل وبليزرات زيه..
التاريخ أكد إن "الرسول صلى الله عليه وسلم" ما اهتمش بمسيلمة ده كتير ولا بالسخافات اللي بينشرها وتجاهله

لحد لما مسيلمة بعت رسالة للنبي محمد عليه افضل الصلاة والسلام يستفزه على الرد وكتب له فيها..
"بسم روحمن اليمامة"
من مسيلمة رسول الله على اليمامة إلى محمد رسول الله على قريش : ألا إنى أوتيت الأمر معك فلك نصف الأرض ولي نصفها ولكن بنو عبد المطلب قومُ يظلمون ولا يحكمون بعدالة»

وأرسل الرسالة مع عشر رجالة من أتباعه.. فلما قرأها "الرسول صلى الله عليه وسلم" سألهم لو كانوا موافقين على الكلام اللي في الرسالة دي؟ ..
قالوا أيوة مؤمنين به ونتبع عقيدته كمان وعلى قلبنا زي النوتيلا بالحلاوة الطحينية..

فقال الرسول صلى الله عليه وسلم فيما معناه لو لم تكونوا رسل حاملين رسالة كنت أمرت بقتلكم.. وكتب رسالة لمسيلمة وأعطاها لهم وأمرهم بالرحيل.. وكانت رسالة الرسول صلى الله عليه وسلم كالآتي 👇🏻

بسم الله الرحمن الرحيم
من محمد رسول الله، إلى مسيلمة الكذاب، السلام على من أتبع الهدى، أما بعد،
﴿إِنَّ الأَرضَ لِلَّهِ يُورِثُهَا مَن يَشَاءُ مِن عِبَادِهِ وَالعَاقِبَةُ لِلْمُتَّقِينَ﴾
وختمها *محمد رسول الله*
بس كده.. وما ركزش معاه كتير.. وتوفى الرسول بعد ذلك بفترة وجيزة..

لكن مسيلمة بقى إعتبرها سبق صحفي إعلامي ما حصلش.. وخلاها حديث البرامج التوكشوز.. وبدأ يربط كلام بين رسالته و وفاة الرسول وأحقيته بالنبوة وخلافته في النبوة.. وصور الرسالة اللي بعتها وبروزها وحطها في بازاراته ومكاتب الصرافة بتاعته ومحلاته.. وطبعها إمساكيات رمضان كمان..

و وزعها قدام الجوامع عشان الكل يشوف إنه بعت رسالة لمحمد وعمله منشن على صفحته.. مش فارق معاه الشتيمة لكن المهم جاله رد على كلامه وبقى اسمه واسم *النبي صلى الله عليه وسلم* يتحطوا في جملة واحدة.. والناس تقول لبعضها..
"مسيلمة بعت رسالة ومنشن لمحمد"
ومحمد عمل ريبلاي ومنشن لمسيلمة"

يجيله مثلاً أخبار إن الرسول صلى الله عليه وسلم تَفَلَ في بئر جافة فامتلأت ببركته ماءاً يكفي الناس المتواجدين حولها وأنعامهم..
يروح قايل يا سلام! و دي معجزة يعني.. طب دي حاجة بسيطة خالص وأعرف أعملها أنا كمان.. ويروح يتف في بير فيها مية قليلة.. ربنا يكسفه قدام الناس والبير تنشف.

يسمع إن "الرسول عليه أفضل الصلاة والسلام" بل إيده بريقه ومسح عين شخص عنده رمد وعين الشخص ده خفت..
يروح هو كمان يقول: دنا معنديش أكتر من التفافة ومش هستخسرها فيكم يعني يا جماعة.. ويعمل كده مع شخص عينه مطروفة مثلاً.. ويتف فيها ويدعكهاله يقوم الشخص يتعمي خالص أو عينه تتبظظ..

أحداث كتير كده لكن برضو كان أدارجي ونصاب وحلنجي ودايماً عنده مبررات ويقول إن السبب مثلاً إن القرية كان فيها امرأة حائض‼️ فيتعارض ذلك مع إجراءات تنفيذ المعجزة.. وده مش ذنبي أنا يا عالم يا قراميط يا أنجاس ويزعق فيهم أو يهددهم إنه هيدعي عليهم باللعنات..

والعرب بطبعهم يخشون من يُلقي عليهم باللعنات والدعوات بالهلاك ويتمني لهم الحجيم والموت وعذاب القبر.. ويتجنبون التصادم معه والجدال في أقواله.. وقد يستبدلون اسمه بقولهم مثلاً
"بسم الله الرحمن الرحيم"

كان كمان منزل أمر على أتباعه إن الراجل يتجوز ويحق له جماع النساء حتى ينجب صبياً ذكر.. فلا يحق للرجل الجماع مرة أخرى.. إلا إذا مات إبنه الذكر.. فتحل له النساء بعد موت إبنه الذكر هذا حتى ينجب ذكراً آخر.. وهكذا..
الله 😱 طب وما ذنب الستات‼️

الستات بقى تتعامل في المتداري كده مع رجالة مش متجوزين من غير ما تحمل منهم ولا ينكشف أمرها.. عشان لو حملت لازم ترمي الطفل لأبوه اللي هو "شاب مش متجوز" فهيلبس مصيبة طبعاً..

فلو البيبي مكتوب له إن أمه ما ينكشفش أمرها لحد ما يتولد يعني وطلع البيبي بنوتة.. فطبيعي إنه هيدفنها ويخلص منها.. ولو البيبي ولد.. هيبيعه طبعاً في أي حتة غير اليمامة..
"ما تسألوش تاني ولاد الحرام جم منين" ‼️

أعتقد رؤيتي الشخصية للقانون اللي فرضه مسيلمة ده.. إنه كان يقصد يخلي الرجالة اللي وراه ماعندهمش ضرورة يسيبوه وينزلوا أجازات لزوجاتهم..

ماهو اللي واقفين يحموه دول وعاملين حواليه خطوط دفاع وبيفخموه وعايش عليهم دور النبي.. هيبقى حرام عليهم يسيبوه ويرجعوا لبيوتهم لو مخلفين صبيان وكانت الغالبية أكيد مخلفين صبيان.. يبقى لازمته إيه يرجعوا بيوتهم؟ هيعملوا أيه يعني في البيت إذا كان ما ينفعش يعملوا سيكو سيكو مع نسوانهم‼️

كلام من تأليفه👇🏻
"لما رأيت وجوههم حسنت وأبشارهم صفت وأيديهم طفلت، قلت لهم: لا النساء تأتون ولا الخمر تشربون ولكنكم معشر أبرار تصومون فسبحان الله إذا جاءت الحياة كيف تحيون وإلى ملك السماء كيف ترقون فلو أنها حبة خردلة لقام عليها شهيد يعلم ما في الصدور ولأكثر الناس فيها الثبور."

وبعد وفاة الرسول صلى الله عليه وسلم.. استفحل أمر مسيلمة وزاد عدد الفولورز بسبب كل الدعاية اللي بتعملها حملته النبوية والبرامج اللي بتتكلم عنه والجرايد اللي بتحكي أخباره، وتنشر فتاويه وهبداته الفلسفية.. وروياته الأخْرىٰٓ"بتسكين الخاء" .. والناس اللي بتطلع تطبل له وتحكي عن كراماته.

ولما استقرت الخلافة في يد سيدنا أبو بكر الصديق أمر بمحاربة كل رؤوس الفتنة والمرتدين وقاطعي الذكاة ومدعي النبوة وكانوا كثيرين وقتها وفي كل مكان حوله تقريباً.. وأمر الخليفة أبو بكر.. القائد خالد بن الوليد بتحضير حملة عسكرية ضخمة لإبادتهم..

في فترة التجهيزات دي كانت فيه جبهة حرب مفتوحة بين مسيلمة الكذاب ومعه أتباعه من بني حنيفة واليمامة من جهة وبين ثمامة بن أثال الحنفي وأتباعه من باقي بني حنيفة من جهة أخرى.

وهو"ثمامة بن أثال" أول معتمر في الإسلام وكان يتودد له رسول الله ويحثه على الإسلام عندما كان أسيراً في قريش وفك أسره.. وعندما أسلم.. علمه الرسول "عليه أفضل الصوات وأتم التسليم" شعائر العمرة.. فكان ثمامة هذا هو أول معتمر في الإسلام.. وصاحب أول حصار إقتصادي من المسلمين على الكفار.

و كان ثمامة بن أثال من أقارب مسيلمة الكذاب.. ولكنه كان يرفض ما يزعمه وكانت بينهم حرب إستنزاف دعمها عكرمة بن أبي جهل وجنود من المسلمين لإضعاف جيش مسيلمة الكذاب وإنهاكه حتى يصل جيش خالد بن الوليد ليكسر شوكته ويقضي عليه..

في هذه الأثناء ظهرت أيضاً سجاح بن الحارث التميمية من بني تغلب.. وكانت شابة من مواليد الموصل في العراق..من أب أصوله عربية من بني تميم وأمها من أصول عراقية وأخوالها تمتد أصولهم لبلاد فارس.. وتنتمي للعقيدة النصرانية كأغلبية أهل العراق حينئذٍ..

وكان من ضمن أقاربها لأبوها.. الأمير مالك بن نويرة من أمراء بني تميم ..وكان من المرتدين الذين قتلهم بلال بن رباح في حروب الردة وأثار موته جدلاً كبيراً وصار خبر قتله قضية رأى عام.. إلى وقتنا هذا.

المهم إن سجاح بنت الحارث التميمية أمها من بني تغلب في بلاد الرافدين.. وما أدراك ما بلاد الرافدين.. يعني مكتبة بغداد.. وكتب قديمة بئا.. والعقيدة المسيحية كانت مسيطرة هناك.. وكانت المدن تدين بالولاء لملوك الروم.. وبعض المدن تدين بالولاء لملوك الفرس..

والبنت كانت خريجة مدارس ليسيه الحرية بنات لتعليم فنون السيطرة الناعمة.. وبتتكلم لغات.. و دودة كتب.. وعارفة حكايات وروايات وأساطير.. ومحضرة دراسات عليا في مقارنة الأديان كلها ما سابتش دين إلا وقرأت عنه.. سواء كان دين سماوي بئا ولا تركواز ولا لبني لا حتى بيبي بلو..

وكانت مفوهة وتجادل بالحجة والبراهين..
ومُطّلِعَة على كتب التاريخ والفلسفات القديمة.. وكانت بنت ناس ميسورين الحال ومبسوطين.. بنت ناس أغنيا يعني..
من اللي بناتهم راكبين عربية ميني كوپر أو دايهاتسو تيريوس.. وكانت جميلة وذات حسن وأنوثة.. وكانت مشهورة في قومها بإسم" شجاعة"

ولكن عُرف عنها أيضاً خصال مثل الكذب "فيقولون: فلان أكذب من سجاح"
أو "فلان يسجح في كلامه إشارةً للكذب" وعرف عنها السفسطة وتغيير سرد الوقائع حسب هواها.. وعرف عنها الحنث بالعهود.. والخذلان.. والطمع.. وإيثار النفس والأنانية.. والجري نص الجدعنة.. ومصلحجية.. وحربوئة.. وغلاوية.. وبراوية

وكانت مؤمنة بمشروع النبوة إنه درجة عالية من الأستاذية أو وظيفة مرموقة يستحقها الموهوب بصفات النبوة والزعامة.. اللي يعرف يخاطب جمهوره.. لتحقيق أهدافه التنموية أياً كانت*‼️
وليس بالضرورة من يختاره الله ويصطفيه لهذا الشأن..

*‼️سواء كانت تلك الأهداف (ثورية/إصلاحية/سياسية/إقتصادية/إجتماعية/مادية/ معنوية/مهلبية/مشمشية/ عباسية خانكة عباسية عباسية عباسياآاه..
عباسية يا أبلة!! عباسية يا أمورة!! عباسية يا باشا!! إطلع ياسطا.. كله رايح‼️)

هي كانت شايفة نفسها تستحق الدرجة دي.. وكانت فاهمة إن العقليات اللي حواليها مش هتتحرك وراها غير لو أقنعتهم إنها لها قدسية سماوية.. فأدعت النبوة..

وكانت أفكارها تلك تميل لإعادة النظر في قوانين الجزية وطرح بعض الأفكار لتوزيع الثروات.. وكانت تميل أيضاً لنشر أفكار كانت عادية خارج نطاق بلاد العرب.. وتسعى لتمكين المرأة من المناصب القيادية والزعامة دون تفريق بينها وبين الرجال.. وكان ذلك سبب رئيسي لحقد الكثير من الرجال عليها..

ومع ذلك قدرت تجمع أربعين ألف رجل من أتباعها.. وحلفائها وكونت بيهم حملة عسكرية.. وتوجهت للسيطرة على المدينة و مكة لتنشيئ مقر النبوة لها هناك..

في طريقها للمدينة راحت لقرايبها في بني تميم.. وكثير منهم إتبعوها وتحالفوا معها.. لكن هناك الكثير لم يوافقوا على دعوتها.. وكان من الذين إتبعوها مالك بن نويرة اللي حب يستفاد منها ومن جيشها في إنه يصفي حساباته القديمة مع القبائل اللي بتنازعه في أراضيه والبيزنس اللي بيشتغل فيه..

رغم إنها عملت معاهدة مع أمراء بني تميم إنهم ما يحاربوش بعض حتى لو مش مؤمنين بدعوتها ولا مشتركين في حملتها النبوية..

لكن مالك بن نويرة اللئيم لعب بدماغها وخلاها تقرر تحارب الناس اللي مرضيوش يبايعوها.. وطمعها إن ده هيعلي صيتها ويزود مناطق نفوذها ويرفع رايتها وكلمتها في العالي بين القبايل.. ويخليها تحصل على مكتسبات كتير في مجال نشر العقيدة اللي هي بتحاول تنشرها لو واجهت مثلاً مسيلمة وغلبته..

وفعلاً سخنت الجيش اللي معاها وقالت ما ينفعش يكون فيه إتنين أنبياء في بلد واحدة يالا نواجه مسيلمة ونعمل معاه مناظرة واللي يكسب فينا يبقى هو النبي الوحيد والتاني يتبعه هو وقومه..

فالناس اللي معاها خافوا وإرتعدوا بسبب الدعاية اللي وصلالهم عن مسيلمة وكل الفشر والأكاذيب المنتشرة عن كراماته.. اللي من سنين حريص إن سخافاته وحركات الحواة والدجالين اللي بيعملها تفضل سيرتها على ألسنة الناس ويتناقلوها في أحاديثهم حتى ولو مزاحاً أو على سبيل التعجب والإستنكار‼️

فلما شافتهم خايفين.. حمستهم لمواجهة قبائل الرباب لأنها قبائل غير محصنة وسهل الإستيلاء عليها بمواجهات عسكرية مباغتة.. ودخلوا بالفعل مواجهات حربية مع قبائل الرباب ونهبوها وزودت بكده حماس الرجالة وطمعتهم في إستمرار المواجهات العسكرية وشبعت حملتها النبوية بالغنائم..

وقررت تستعجلهم عشان تستغل حماسهم وعطشهم للمزيد من الدماء والغنائم إنهم يروحوا يهاجموا مسيلمة في عقر داره ويرغموه على المناظرة..
ولو كسبها يتبعوه وهي أولهم.. ولو هي اللي كسبت المناظرة يتبعها هو وقومه..

قبل ما تستكمل رحلتها للمدينة ومكة بقى وترسخ قواعد إمبراطوريتها المثالية اللي كانت بتحلم بيها.. فأعدت الجيش وكتبت رسالة لمسيلمة وبعتتها مع رسول وقالتله إسبقني بالرسالة دي وإديها لمسيلمة في إيده وإحنا هنحصلك في الطريق..

فوصلت الرسالة لمسيلمة وسمع أخبار حملتها ولقاها كاتبة:
من سجاح نبية الله إلى مسيلمة الحنفي.. طبعاً إنت عارف وأنا عارفة إن ما ينفعش يظهر اتنين أنبياء في بلد واحدة.. فأنا جايالك يا حلو برجالة تاكل الزلط.. إما تثبتلي إنك النبي بجد فأتبعك أنا وقومي..

أو أثبتلك إن أنا النبية بحق وكعبي عالي عليك إنت واللي يتشددلك.. وتتبعني إنت وأهلك من غير ما تملُصوا مني..
أو لو رفضت المناظرة بيننا وكسكست وجيبت ورا.. رجالتي هيقنعوك بطريقتهم بئا من فينا النبي! تشاو بامبينو"
وختمت الرسالة بالختم بتاعها
"سجاحيحو العسولة نبية الله والأجر علالله"

طبعاً مسيلمة آرح وفاهم إنه ما ينفعش يفتح جبهتين حرب عليه في الظروف دي.. صحيح رجالته بتدافع بإستماتة بسبب غسيل المخ اللي هو عامله لهم.. ومحرك فيهم النخوة والنزعة القبائلية.. لكن لو اتفتحت جبهة تانية فيها أربعين ألف مقاتل.. هيتفشخ بين الجبهتين حرفياً..

وكمان فاهم إن سجاح كسبانة في أي حالة.. لإنها لو ناظرته وغلبته و ده وارد جداً لإن سجاح دي لسانها يتفاتله بلاد وعارفة القرد مخبي إبنه فين.. وكمان عارفة كان مخبيه ليه.. ومش بس كده أبصلوطلي.. دي عارفة كمان كان مخبيه من مين؟!
فهتغلبه هتغلبه ده إحتمال أكيد..

أو مجرد إنها تتحط معاه في جملة واحدة يخليه متهدد إنها تكسب نفس شهرته "واضح إنهم نفس الدماغ.. زي بعض يعني ومبروم على مبروم ما يبرومش"

فطلب من كبارات أهله إجتماع عاجل عشان يشورهم في الأمر.. لقاهم كلهم خرفان مش فاهمين حاجة.. وبيقولوا كلام يودي في ستين داهية.. وبيتعرض المؤتمر السري في القناة الفضائية للقبيلة.. وحاجة هوزوء كده و في منتهى البواخة يعني..

طبعاً مسيلمة ما كانش بيفرق معاه مين أتباعه أصلاً.. هل هم ذوي رأى ومكانة ولا مجرد خرفان بتمأمأ.. هو كان يهمه عدد الفولورز وبس.. مش فارق معاه إذا كانوا لجان ولا حسابات خرفان.. لكن كان بيحب أوي يتباهى بعدد المتابعين.. حتى لو كانوا متابعينه عشان يشتموه بس..

وكان يستفزهم كل فترة بأي هبد أو بالمعايدات في كل مناسبة حتى لو مالوش فيها.. وبيقولوهم جمعة مباركة.. مع إنه ما بيصليش الجمعة أصلاً.. فطبيعي يعني يلاقي ساعة الزنقة دي إن معظم اللي حواليه خرفان لا بيفهموا ولا بيعرفوا ياخدوا رأى في أي مسألة.. خصوصًا لو لها علاقة بالسياسة والحرب..

راجل عجوز جاله وقال يا مسيلمة يا نبي الله إني ناصحُك.. إنت عارف أنا مين مشكده؟!
قاله أيوة فاكرك يا حاج.. انت كنت بتجيبلي شيبسي لما كنت بتيجي تزورنا زمان وأنا صغير.. وتديني عيدية في العيد وأمي تاخدها مني بعد ما انت تمشي.. أيوة فاكرك انت الراجل الطيب اللي ساكن في بيتنا القديم..

قاله صح يا حبيبي.. ما شاء الله عليك.. كبرت أهو وبقيت نبي ملو هدومه.. عشان كده أنا بئا هنصحك نصيحة أب لإبنه..
لو عملت بنصيحتي فلحت وملكت الأمر بيدك..

قاله البت سجاح دي شوكتها جامدة ومش هتقدر عليها بدماغك غير لو جيبتها تحت منك وبقيت إنت راجلها.. وتمسك عليها ذلة.. وتجريها وراك عشان تستر عليها وتتجوزها.. أو تدفعلها مصاريف العملية..

رد مسيلمة.. طب إزاي بس يا حجيجة!! وهي مناخيرها في السما ومستقوية بالرجالة اللي معاها.. وقرايبها عضمة ناشفة.. وكمان دماغها واعية وفاهمة ومش سهل خالص تتجاب سكة..
رد الشيخ العجوز وقال: اسمع مني بس الكلام اللي فيه الزتونة..

إنت تبعد عن بيتك ما تخليهاش تدخله عليك.. عشان لو غلبتك فيه هتبقى حطت عليك في دارك.. و دي تبقى فضيحة كبيرة..
إنت بكرة تروح تنصب خيمة محترمة في مداخل المدينة.. وتفرش الخيمة دي بالحرير والدانتل والقماش القطيفة الناعم ده عشان النسوان بتحب الأقمشة القطيفة والحراير والكشمير..

وجيب ستاير من اللي فيها لولي دي.. ونجف كريستال.. وأباليك.. وبلتكنات ستان فيها شراشيب بتلمع كده وبروبروء.. وخداديات كتير من اللي عليها ترتر دي.. وشِلت ياما عشان البنات بتحب المخدات أوي..

هات كمان مباخر نحاس وحط فيها بخور حلو مفحفح كده.. وكل أنواع البرفانات الحلوة بئا مش هوصيك..هاه.. الماركات العالية.. والمسك والعمبر والعود.. وما تسترخصش وتجيب أصنص شادية.. ورشرش وبخ من العطور الغالية دي في كل حتة في الخيمة وعلى كل المفارش والستاير والسقف كمان..

وحط ورد كتير.. الستات عاوزة ورد يا مسيلمة.. إديها ورد ما ترحمهاش.. إفرش لها الخيمة كلها ورد.. وهات دباديب كتير.. عشان البنات بتعشق الدباديب وبتحيح لما بتشوفها وتقول للي جابها آوه إنت كيوت أوي إزاي كده.. وحط ع السرير أوراق ورد وبنفسج وفل.. وإرسم بيهم شكل هارط❤️..

وإعمل الفوط والبشاكير على شكل بجعتين ولا وزتين 🦢 🦢 زي بتوع الهاوس كيبينج ما بيعملوا في الفنادق يعني.. اسمع مني الحاجات دي بتفرح الستات وتخليهم يفكوا التكشيرة ويظقططوا.. وخلي الخيمة مقفلة كويس ما يطلعش منها حاجة.. ولا يدخلها ناموس ولا دبان..

وحط في الخيمة چاكوزي بمية دافية.. والإضاءة خليها اللمض اللي بتعمل ألوان كتير هادية وفرايحي كده.. أيوة اللي بتتغير أوتوماتيك دي.. مع مزيكا حلوة بئا على ذوقها..
والكراسي خليها الـBean-Bag عشان بتخلي وضعية القعدة مرحرحة وفي اللذيذ كده.. مع كام إزازة بيرة مشبرين..

إخلق لها جو رومانسي يعني يا مسيلمة يا بني.. وحط في ركن الخيمة منقد مع حتتين فحم.. وإرميلك فيه نص وقية حشيش وسيب الخيمة مقفولة.. وماتدخلش حد معاها.. وإختلي بيها عشان تتناظروا..وتتكلموا يعني على رواقة.. ومع حبة هيئ على حبة ميئ.. مع نقرة طبلة وهزة رق.. هتلاقيها قامت إتحزمت ورقصت..

الجو ده يا حبيبي هيخليها تفك معاك وجسمها يرتخي وتتمايع.. وهيحرك مشاعر أنوثتها ويملاها ليونة ومياصة.. وتتعامل ساعتها إنت وشطارتك..
ولما تلاقيها وصلت للحالة ديه وتجيبها سكة.. وتظبط أدائك.. ومتاعها يبقى متاعك.. بعدها هتأمن شرها.. وتحطها تحت طوعك وكلمتك تمشي عليها يا أبن الحنفي..

"وأعلم يا بني أن إستعمال الطيب للرجال والنساء يعين على النكاح.. فإذا إستنشقت المرأة رائحة الطيب على
الرجل إنحلت إنحلالا شديداً.. ومالت إليه.. وتمنت قربه.. كما يحدث ذلك للرجل أيضاً إذا إستنشق رائحة الطيب على المرأة.. وربما أُستعان على وصال المرأة وحثها على الغرام.. برائحة الطيب"

رد مسيلمة وقال: إشطة عليك يا حجيجة يا كُبارة يابو التفانين.. يللي فاهم الكوفت يا مريـّسة..
نعم الرأي رأيك.. وبدأ في التنفيذ وفعلاً في خلال يوم بليلة كان جهز الخيمة بنفس الوصف اللي قاله الشيخ العجوز..

بعدها وصلت سجاح.. وسلم عليها وإستقبلها بشياكة.. وطلب منها يتقابلوا في الخيمة على إنفراد يتناظروا ويضايفها في الضلة.. وافقت ودخلت معاه..

و بدأ يتكلم و يحكي عن مغامراته في عالم النبوة.. وهي إما مندهشة و تايهة في تفاصيل المكان بالورود والعطور والجليتري والترتر اللي بيلمع حواليها في كل حتة ده.. أو مسخسخة على روحها من الضحك على كلامه والصهلولة بتاعتها جايبة آخر المعسكر..

وقعدتهم على الشلت الـBean-Bag كانت مخلية الحوار مسخرة أساساً ومش جو مناظرة خالص.. ده جو شقط أصلاً.. وفعلاً حسها متجاوبة معاه وغمزلها وغمزتله راح قايل.. يا سجاح أنا ألفتلك سورة من وحي أفكاري للحظة الرومانسية دي تحبي تسمعيها.. قالت واآاو بجد إنت بتعرف تدخلي من ثغراتي.. ضاجعني ناو.

قام قال لها القصيدة🔞دي👇🏽
اللي مشهورة عنه :
ألا قـومـي إلى المخدعِ
فقد هيـئ لك المضجعِ
فــإن شئت فرشناكي
وإن شـئت على أربعِ
وإن شـئت كما تسجديِ
وإن شـئت كما تركعي
وإن شـئتي بثلثيهِ
وإن شئـتي به أجمعِ !
فقالت أنزلنيه به أجمعُ يا نبي الله..
"يعني كله يا وليد" 🔞

فعلاً جامعها حتى قضى منها حاجته..
و قضت هي منه حاجتها.. وقالت إنت جامد دبابة وعجبتني ياسي مسيلمة يا مَعلَمة..
وهو قالها إنتي كمان صاروخ وعجبتيني يابت يا سجاح يا ملكة النكاح..

راحت قايلة طب إيه رأيك تخطبني من أهلي ونتجوز.. قالها إشطة أوي ويبقى زيتنا في دقيقنا وتعمليلي فولو إنتي وأهلك ولو جمعنا جيوشنا سوا هناكل بيهم العرب كلهم.. ومجدعة مني هكتبلك كل الأراضي اللي كانت تابعة لقريش بإسمك وتبقى مكة والمدينة بتوعك لوحدك يا سجوحة قلبي ورزق وجالك من السما يابت

هي سرحت شوية كده وبدأت تفكر في أراضي قريش يعني مركز التجارة الأهم إقليمياً.. وممكن تستفاد من حركة التجار والسياح والحجاج وتحقق حلم حياتها.. وتعمل سلسلة الفنادق الفخمة اللي بتحلم بيها "سجاح ريچنسي".. وتبني مول كبير في مكة قصاد الكعبة وتعمله "سجاح بيوتي سنتر & Spa"

وتعمل حكومة مركزية كل المديرين فيها ستات.. وتعمل لاين موضة لملابس المرأة العاملة.. وتستفاد من حملتها النبوية في تسويقه.. فوافقت طبعاً.. والريالة كانت نازلة من بؤها مغرقة صدرها كله🤤..

وقالتله لما أخرج وأوصل أول الشارع هديك رنة بالموبايل تبقى أنت بعدها تطلع عشان محدش ياخد باله.. وهو قالها حاضر.
وإبقى رني عليا كمان لما تروحي.. قالتله ماشي يا سلومتي.. بس ما تنساش تيجي تخطبني من أهلي.. أنا هبلغهم يستنوك.. ما تتأخرش..هاه‼️

فخرجت وراحت لأهلها وسألوها عنه وإيه سبب تأخيرها كده عنده.. قالت أصله تلى عليا الوحي وأنزل عليا به.. وأنا كنت بقوله بس بقى يا وحي كفاية.. حرام عليك يا وحي مش كده.. يا وحي بلاش.. يا وحي بطل بقى.. يووٓوه.. بس أنا كسجاح إنبسطت..
ورأيت إن ما نزل عليه هو الحق فإتبعته وخطبني للزواج..

قالولها أصدّقك؟! إدالك صداق يعني..
اللي هو دفعلك مهر ولا لأ!!
قالت لأ ما أدانيش حاجة.. قالولها لأ يا سجاح ما يصحش كده.. اللي زيك مكروه إنها تتجوز من غير مهر.. دنتي جميلة ومتعلمة ومعاكي شهادات عالية ولسة بنت بنوت كمان🤫

قالت طب أعمل أيه يعني دلوقتي🤷🏻‍♀️
قالولها إبعتي أطلبي منه مهر.. فبعتت تطلب منه مهر.. فطلب منها أن ترسل إليه المتحدث الرسمي للحملة النبوية بتاعتها.. كان اسمه شبت بن ربعي الرياحي..
آه والنعمة كان اسمه كده مش بسف عليه..
هو سافف لوحده

المهم بعتتهوله.. راح مسيلمة قال له نادي في قومك إني رفعت عنكم صلاة الفجر وصلاة العشاء.. وفي رواية أخرى قيل إنه رفع عنهم صلاة العصر.. وصار هذا مهرها.. وحتى بعد مقتله بزمن ليس بقصير.. كان أهالي "بني تميم" لا يصلون العصر ويقولون هذا مهر نبيتنا ونحن أحق به..

وسابته وسافرت.. و وصلت حملة خالد وقامت معركة شديدة وقتل مسيلمة في هذه المعركة العبد "وحشي" أيوة هو نفس العبد اللي "هند بنت عتبة" دفعتله عشان يقتل سيدنا "حمزة بن عبد المطلب".. بعدما أسلم وحشي وتم عتقه من الرق..

ففرح وحشي وكان يتباهى ويقول: قتلت برُمحي أحسن الناس قبل الإسلام وعوضني الله وقتلت برُمحي أشر الناس بعد الإسلام.

أما سجاح فلما وصلت إلى بلدتها واستقرت.. إعتنقت الإسلام لتنجو من القتل.. وقيل إنه حسن إسلامها وتزوجت من صحابي.. وعاشت في هدوء وزهد ما تبقى من عمرها.. وماتت في البصرة في عهد معاوية بن أبي سفيان.
تمت.‼️
*رأيكم يهمني..🙆🏻‍♂️..شكراً مقدماً*
#حبلظة
🖋️ أحمد الشافعي.

@rattibha من فضلك

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد