رتبها

عامل دماغ حلوة وطلبت معايا أحكيلكم حدوتة
الحدوتة دي عن "هند بنت عتبة" .. مذكورة في كتب كتير وهتلاقوها على النت متوفرة في مواقع كتير بمصادرها..
لكن أنا هتكلم عنها بطريقتي ورؤيتي للأحداث☝🏻 فمحدش يجادلني كتير في مفرداتي عشان ما احرجوش وأهزقه🏹
‼️ثرِد طويِـٓــِٓلّ..لو بتزهق فل‼️

ده 👇🏽 لينك فيه معلومات كافية عن أصلها وفصلها ونسبها.. ومواقف مشهورة عنها.. ومذكور فيه كمان إشارة للحدوتة اللي هتكلم عنها
ar.wikipedia.org

ar.wikipedia.org/wiki/%D9%87%D9…

تزوجت هند في الجاهلية على إحدى الروايات من حفص بن المغيرة بن عبد الله المخزومي القرشي، وأنجبت منه ابنها أبان بن حفص.
وفي رواية أخرى أنها تزوجت الفاكه بن المغيرة بن عبد الله المخزومي ثم تطلقت منه للقصة المشهورة [الحدوتة👇🏻]
ثم خطبها سهيل بن عمرو العامري القرشي وأبي سفيان الأموي.

الحدوتة بتحكي عن هند بنت عتبة بنت الحسب والنسب وأهلها ناس أكابر وسادة على قومهم.. بنت بمقاييس عصرنا يتقال عنها كلام من نوعية مش أي حد يملى عينها.. ومحدش يقدر يزعلها.. ولها شخصية قوية وأهل عزوة وسند بصحيح ومتربية على الغالي ومتكرمة طول عمرها ماتهانتش.. والناس كلها تتمنى تخدمها..

هند كانت بنت تعتبر أيقونة في مجتمعها وأهلها.. وبتشارك في كل فعاليات قومها وبلدها.. سواء كانت أفراح عامة أو أحزان أو منتديات ثقافية أو عروض فنية بالغناء والعزف الموسيقي زي الـ Cheerleaders كده 😅 لتشجيع المتبارين "مباريات" "تشجيع النوادي الرياضية يعني بمفاهيم زماننا"
.
.
.
.
.

أو تحميس الجنود والفرسان وإثارة نخوتهم و ولائهم في حالة التعبئة العامة والتحضيرات الخاصة بالمواجهات العسكرية..
أنفولونسر وبتشارك يعني في أوبريت إخترناه.. والحلم العربي.. ومؤتمرات الشباب.. وبتعمل شوبينج أونلاين.. أو من دبي وبيروت.. وبتلبس سينيهات.. وعندها عربية رولزرويس مثلاً

وكانت عفيفة وتتفاخر بذلك دوماً.. وكان أبوها بيحبها.. ويدللها كثيراً.. ويدلعها.. وكان ذلك في زمن الجاهلية قبل الإسلام‼️ ذاك الزمن الذي انتشر عن سماته وأد البنات أو بيعهن خوفاً من الفقر والعار‼️
طبعاً دي لما هتتجوز مش هيكون أقل من بيزنس مان مالتي مليونير وأهله من أكابر القوم..

وكان جوزها ده هو الفاكه بن المغيرة بن عبد الله المخزومي القرشي.. راجل ابن حسب و عز.. كان عنده مضيّفة كبيرة "فندق لإستقبال الضيوف" زي السرايا كده يضايف فيها الناس من أهله أو من غيرهم.. كانت المضيّفة دي مفتوحة طول الوقت لأي حد عاوز يدخل يستريح شوية أو يبات أو حتى يغير جو..

المهم في يوم كان مع مراته في الفندق ده نايمين.. وهو قام خرج يقضي مشوار وساب هند نايمة في أوضتها.. في الوقت ده دخل راجل من اللي متعودين يدخلوا الفندق وكانت أوضة هند بابها تقريباً مفتوح نص ردة كده.. ولما شاف هند نايمة في الأوضة رجع خرج بسرعة ناحية باب الفندق.. في جييّت مين ‼️🤔

هو سي الأفندي الفاكه كان جاي ع المضيّفة من برة و شاف صاحبنا ده خارج يمد في خطوته من الخضة‼️.. و مراته "هند" لسة نايمة على السرير في الأوضة.. دخل بسرعة صحاها من النوم وسألها..
مين ده اللي كان هنا ولسة خارج من المضيّفة دلوقتي؟!..

قالتله ولا أعرف.. أنا كنت نايمة.. وانت اللي مصحيني أهو بنفسك.. ولولا كلامك ما كنتش عرفت إن فيه حد دخل البيت أصلاً..
قالها طب روحي عند أبوكي.. راحت لبيت أبوها..

والناس بدأت تتكلم و كل واحد يزود أو ينقص كلمة على مزاجه.. يعني الحكاية بدأت بإن حد يحكي ويقول:
الفاكه شاف فلان قدام أوضة مراته هند وهي نايمة..
واللي بعده يحكي ويقول:
الفاكه شاف فلان في أوضة مراته "هند" وهي نايمة..
واللي بعده يقول:
الفاكه شاف مراته"هند"نايمة في أوضة مع فلان..

وهكذا لحد ما بقت فضيحة بجلاجل وسيرتها بقت على لسان الناس.. وكل واحد يفتي ويتفتف بكيفه ويزود وينقص على هواه.. والعواذل يتشدقوا بنبرهم وكلامهم الماسخ.. والنسوان المنفسنة تلّـسـّن وتتك ع السين.. ويبعتوا لبعض في جروب الماميز والنيبورز.. وهاشتاجات كتير ظهرت ساعتها.. وبقت ترند‼️

أبوها زي ما قولت كان مدلعها وقالها يابنتي أحكيلي عشان أنا دماغي هتتجنن والناس هتاكل وشي بعد اللي قاله جوزك والناس حكوه عنك.. قوليلي الصراحة عشان لو جوزك صادق في كلامه هسلط عليه حد يقتله ويتقطع العار عنك‼️ أو لو مش صادق وبيدّعي الإفك هطلب منه نتحاكم عند كاهن من كهنة اليمن..

*كان فيه كاهن مشهور عنه علمه ببعض الغيبيات وعرفه الناس بحكمته وقدرات غير مألوفة*
المهم قالتله والله يا بابا محصلش ده كداب وبيألف من دماغه مش عارفة ليه🤷🏻‍♀️
أو تلاقيه ساب ودانه للناس تلعب فيها!
إنما انا بنتك حبيبتك وتربيتك ومستحيل أعمل حاجة تعيبك وتهينك وتتحسب عار عليّا وعلى أهلي..

قالها خلاص يبقى ليلة أمه سودة وهستدعيه للمحاكمة عند الكاهن اليمني.. راح أبو هند لجوزها الفاكه وقاله انت مش محترم وميصحش تقول على بنتي هند بنت الأصول والحسب والنسب والرفعة وتتهمها في شرفها بالباطل.. يا إما تثبت كلامك بالأدلة والبراهين أو نروح نتحاكم عند كاهن اليمن...

رد جوزها وقال ماشي.. يالا نتحاكم عند الكاهن اليمني ونشوف مين فينا اللي معاه الحق..
وخرج الفاكه بن المغيرة مع بعض من رجال ونساء أهله من بني مخزوم.. وخرج أبو هند مع بنته وبعض رجال ونساء أهله من بني عبد مناف.. و راحوا في أتجاه المدينة اللي فيها الكاهن..

و لما قربوا من المدينة ظهر على هند إن لونها مخطوف.. وبطنها بتكركب.. وقلقانة زي ما تكون خايفة من الفضيحة.. ومتوترة في تصرفاتها كده.. ومتغيرة ودبلانة ومسهمة زي ما تكون شايلة الهم..

أبوها قالها مش كنتي تخافي وتعملي كده وإحنا لسة في بيتنا قبل ما الناس كلها تعرف بخرجتنا ومظاهرتنا دي ويشوفوكي بالمنظر ده دلوقتي.. بعد ما وصلنا هنا وقبل ما نتعرض على الكاهن.. على الأقل لو كنتي عملتي كده في البيت كنت عرفت أتصرف وألملم الفضيحة هناك.. وأقدر أحميكي من أي غشومية..

قالتله والله يا بابا اللي أنا فيه ده مش خوف "لمكروه قُبُلي" يعني انا مش قلقانة من شر حصل من مكان عفتي.. لكن أنا متوترة كده عشان إنتوا رايحين لإنسان.. مهما قالوا عنه هيفضل إنسان..🤷🏻‍♀️ وكلامه يحتمل الخطأ أو الصواب وممكن يقول عليّا كلمة تعرني وتجرسني وتفضحني من غير ذنب إقترفته

وتخلي سيرتي على لسان الناس وتشيلوا عار حلفتلك إني ما جلبتوش وأنت حبيبي ومصدقني عشان عارف إنت مربي مين.. قالها معاكي حق.. عشان كده أنا هختبره قبل ما نطلب تحكيمه.. وجاب حباية حنطة "شعير أو قمح برى" وحطها في قضيب فرس صغير.. و ربط حرشفة القضيب عليها زي ما بتتربط صرة الدنانير كده..

و راحوا للكاهن.. اللي أكرمهم ونحر لهم الذبائح "طبعاً لإنهم سادة وصيتهم مسمع في كل حتة وحسب ونسب وبيزنس وأساطيل وكده يعني" وبعد التحية والأستقبال قالوا له إحنا جينالك في أمر مهم تحكم فيه بيننا لكن قبل ما تحكم لازم نتأكد مما يقال عن بصيرتك وقدراتك في معرفة الأمور الخفية..

قالهم إتفضلوا إختبروني‼️
قالوا: إحنا مخبيين حاجة لو عرفتها هي إيه!! وفين!! هتحكم ما بيننا.. لو ماعرفتهاش هنمشي من غير تحكيم لإن الأمر لا يحتمل الخطأ.. و دي منطقة أعراض.. وممكن تطير فيها رقاب وعراقيب.. قال: إنتوا مخبيين ثمرة في كمرة.. يعني مكّمرين ثمرة أي حاجة في أي حتة متدارية.

رد أبوها وقال: لأ يا عم.. ده كلام عايم..
أنا عاوز إجابة واضحة ومحددة..
رد الكاهن وقال حبة بر في إحليل مهر.. يعني حباية قمح/شعير برى محطوطة في حرشفة قضيب حصان صغير.. قاله صدقت.. وكده يبقى تحكم يا كبير براحتك..

وكانت هند قاعدة وسط كذا ست.. ويعدي الكاهن جنبهم.. ويمسح على راس كل ست.. ويخبط على كتفها.. ويقولّها قومي لشأنك.. لحد لما وصل لراس هند بنت عتبة.. مسح عليها وطبطب على كتفها وقال: قومي فأنتي لست رحساء* أو زانية.. وستلدين ملكاً عظيم الشأن سميه معاوية..

*كلمة رحساء* دي☝🏻 كلمة عجيبة من كلمات اللغة العربية.. من معانيها الحرفية المرأة ذات الأرداف الضعيفة الهزيلة.. أو تقال على أنثى الذئب أو حيوان "السلعوة" لإنها ضعيفة اللحم في الفخذين والردف..

ولكن من معانيها إصطلاحاً المرأة القبيحة المتشردة.. أو الهزيلة من شدة الجوع والمرض إشارةً للفقر والذل والهوان.. والرحساء تعني مجازاً أيضاً "المومس الرخيصة"
وإذا ترجمناها بالفرنسية ستخرج بمرادف Serpillière 🧹🪣
بمعنى الشرشوبة اللي بنمسح بيها البلاط‼️

المهم لما المحاكمة خلصت وسمعوا البراءة والنبؤة.. خرجوا من الخيمة أو الدار اللي فيها الكاهن.. راح جوزها "الفاكه بن المغيرة" حاول يمسك إيد مراته "هند بنت عتبة" وهما ماشيين.. راحت ناترة إيده من إيدها ‼️
وقالت كخخ كده.. ومسحت إيديها بالوايبس دلالة إن اللي لمسها شئ وسخ..

و زعقت في وشه.. وقالت: إبعد عني ويحرم عليك تلمسني تاني.. والملك اللي هولده من بطني هيكون أبن سيد سيدك.. ولو بموتي مش هيكون منك يا عرة الرجالة.. يا وِدَٰني.. يا دغف.. ياللي ماقدرتش النعمة اللي كانت في إيدك يا واطي ‼️

"وحاجات كده يعني تخيلتها في الحوار ده☝🏻 تكون تفت على وشه مثلاً.. ولا حدفته بفردة شبشب وقعت عمته من على راسه.. أي حاجة يعني ممكن تعملها ست شريفة مقهورة على كرامتها والخوض في عفتها"‼️

و قالتله أبعتلي ورقتي في بيت أبويا ومش عاوزة من وش أمك حاجة.. ولا عاوزة أشوف سحنتك تاني.. جتك القرف فيك وفي اللي يجيي من ريحتك يا معفن يابو زنون يا مبربر.. ومشيت مع أبوها..

بعد ما إتطلقت.. قالت لأبوها..
يا بابا إنت جوزتني قبل كده واحد غني وابن ناس وبتاع.. بس ما أخدتش رأيي ولا سألتني إذا كنت مرتحاله ولا لأ.. وأهو حصل منه اللي حصل.. وقهرني وكنا هنروح في داهية بسبب غباوته.. وندالته.. وطبعه العفش..

لما تيجي تجوزني تاني.. إبقى اسألني عن رأيي وخليني أعرف أنا هدخل على إيه عشان أعرف أختار.. ماهو مش كل شوية هترميني في عِصمة واحد ابن أمه ولا خيبته تقيلة وبيسلم دماغه للناس.. راعيني يعني يا حاج و خد رأيي.. في النهاية أنا بنتك مش غريبة.. وأنا اللي هتجوز مش حد تاني اللي هيشيل القرف

راح أبوها قايل لها الشعر ده 👇🏻
أتاكِ سهيل وابن حرب وفيهما
رضاً لك يا هند الهنود ومقنع
وما منهما إلا يعاش بفضله
وما منهما إلا يضر وينفع
وما منهما إلا كريم مرزأ
وما منهما إلا أغر سميدع
فدونك فاختاري فأنت بصيرةٌ
بل ولا تخدعي إن المخادع يخدع

قالتله يا بابا الكلام ده ما يأكلش عيش.. إحكيلي عنهم شوية بالتفصيل وكلمني عن طباعهم المعروفة عنهم وأخلاقهم.. عشان أعرف أختار وأحدد مين فيهم اللي يناسبني.. وينفع كمان يناسبك ويبقى بينكم مصاهرة أنا اللي هكون رباطها..

فبدأ يذكر سهيل بن عمرو، فقال: أما أحدهما ففي سطةٍ _سطوة ونفوذ_ من العشيرة وثروة من العيش، إن تابعته تابعك_تاكلي بعقله بقلاوة بكلمتين مدح_ ، وإن مِلت عنه حط إليكِ_ ولو عرفتيه مقامك واتعززتي عليه تجيبيه راكع تحت رجليكي_
وتحكمين عليه في أهله وماله.. _واضحة يعني_🤷🏻‍♂️

وأما الآخر فموسع عليه منظور إليه، في الحسب والحسيب، والرأي الأريب_دماغه بنت أروبة_
مدره أرومته_ معدنه حر والزعامة والوجاهة في شجرة عائلته من جذورها لفروعها_.. وعز عشيرته، شديد الغيرة،
كثير الطيرة_ تشاؤمي بس حدئ ونظرته للأمور حاجة كدة زي شوبنهاور مع عم ضياء مضروبين في خلاط_..

لا ينام على ضعة_ مش هفأ وما بيسيبش حقه ونزيه في تصرفاته مش وضيع_..
..ولا يرفع عصاه عن أهله_ حِمش بئا وما بيرضاش بالحال المايل_..

*فقالت: يا أبت، الأول سيد مضياع للحرة، فما عست أن تلين بعد إبائها، وتصنع تحت جناحه، إذا تابعها بعلها فأشرت، وخافها أهلها فأمنت، فساءت عند ذلك حالها، وقبح عند ذلك دلالها، فإن جاءت بولد أحمقت، وإن أنجبت فعن خطأ ما أنجبت، فاطو ذكر هذا عني ولا تسمه لي*

بمعنى☝🏻يا بابا الأولاني ده شكله كده دلوعة أمه وتلاقيه عيل سيس وطري وهيضيع هيبتي وأتمرمط في بيت أهله.. أو هضطر أخليه في طوعي وأبقى شرانية وأخليه يخاف مني هو وأهله وأعيش في توتر وقلق من غدرهم ومكرهم.. وحياتي تبقى زفت وأسترجل فيها بقى وأنوثتي ودلالي هيكونوا مكروهين ومالهومش لازمة

ولو خلفت منه حتة عيل هيطلع إبني تافه زي أبوه.. وأبقى أم العبيط.. ولو خلفت كتير منه هتبقى خيبتي تقيلة أنا وعيالي المواكيس.. لأ ما تجيبليش سيرة اللي ما يتسماش ده..

وأما الآخر فبعل الفتاة الخريدة، الحرة العفيفة" _ يعني ده واد مُز.. وحلم لأي بنت بنوت متربية وبنت ناس_
وإني للتي لا أريب له عشيرة فتغيره_ يعني أنا مش بكر صحيح بس أنا بنت أصول وهعرف أخليه يثق فيا ومايغيرش بزيادة.. عشان أنا بنت طول عمري جامدة وأنا مش بتاعة الكلام ده.. يا بابا

..ومش هقل من قيمته..
.. ولا تصيبه بذعر فتضيره _وحلوة أهو وأمورة زي مانت شايف، وراسي كمان توزن بلد يا بابا بقى، ست فاهمة يعني مش هخضه ولا هخليه يقرف ويزعل ويعاقب_
.. وإني لأخلاق مثل هذا للموافقة_الجدع ده عاجبني يعني يا حاج_،
فزوجنيه.. فزوجها من أبي سفيان..
فولدت له معاوية.
تمت‼️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد