لو واحد قالك تعالى نعبي الهوا في ازاير ونبيعه غالبا هتضحك، مين اللي هيشتري هوا في ازازة مابتقدملوش قيمة أو خدمة بس لو عملنا مزاد على "ازازة فاضية" واتفقنا على أن قيمتها مليون دولار وحد اشتراها فعلا الموضوع هيختلف .. تعالوا نشوف ازاي تويتة جاك دورسي قيمتها وصلت ملايين الدولارات!
تحدثنا في ثريد سابق عن فكرة العملة "بتكوين" وتقنية البلوكتشاين اللي من خلالها الناس ممكن يكون معاها فلوس رقمية حاملة للقيمة من غير تدخل لبنك مركزي وأنما من خلال شبكة لا مركزية تشبه المثل الشعبي "جمعية ودايرة يابا"
لو دخلت بنك وقولت له معايا 10 بتكوين حولهوملي دولار هيقولك امشي من هنا لا نعترف بالعملة دي لأنها غير مستقرة Volatile وفي بعض الأحيان هيتقبض عليك😄 بس لو اشتريت من حد بيستقبل الدفع بالعملة الرقمية العملية هتتم لأن البايع والشاري معترفين بالقيمة بتاعتها أمام العملات التقليدية
إذن نقدر نقول أن العملات الرقمية زي العملات التقليدية Fungible "قابلة للاستبدال" ممكن تداولها بنفس قيمتها في نفس المكان والزمان مقابل قيمتها من العملة التقليدية. هل ينفع لو سلفتك 10 جنيه ورجعتهالي خمستين اقولك لأ انا عايز نفس الورقة اللي ب 10 جنيه؟ أكيد لأ. دي فكرة كلمة Fungible.
في 2017، ظهرت فكرة أن العملة الرقمية تشتري "أصول رقمية" غير قابلة للاستبدال Non fungible Token (NFT Crypto). يعني أيه الكلام ده؟ ببساطة تخيل أنك دخلت معرض وعجبتك لوحة فنية واشترتها، اللوحة دي "أصل" ملكك ماينفعش تشتري بيها جبنة من البقال لأنها مش عملة وأحنا مش في عصر المقايضة
طيب تخيل معايا أن اللوحة دي حد زارك في بيتك و صورها وعمل منها نسخة هل ده معناه أنه امتلك أصل اللوحة؟ لأ. ده اللي حصل في الـ NFT Cryptos أن أصبح عندك "أصول رقمية" ممكن تشتريها بالعملة الرقمية الوهمية وتبيعها على حسب ارتفاع قيمتها أو انخفاضه بقوانين العرض والطلب على الأصل مش العملة
الـ NFT Cryptos هي عقود رقمية بتسمح أنك تمتلك "أصول رقمية" ممكن تبقا تويتة لجاك دورسي، ممكن تبقا عمل فني في صيغة ملف PDF، ممكن تبقا MP3 أي حاجة رقمية ممكن تشتريها ويبقا أصل الملف بأسمك وده اللي عمله جاك دورسي أنه عمل مزاد لأصل التويتة بتاعته على موقع أو متحف للأصول الرقمية
يعني عملنا عملة رقمية وهمية ودلوقتي بنشتري بيها اصول رقمية وهمية برضه؟ أه ولأ. الأصول الرقمية في الآخر بتعبر عن Intellectual Capital أو رأس مال فكري متمثل في "الملف الرقمي الـ PDF أو التويتة أو الصورة". هل الأصل ده ملموس؟ لأ.. هل العملة نفسها ملموسة؟ لأ، أحنا بنبيع الهوا في ازايز
في دفع شديد في اتجاه تثبيت العملات الرقمية كحامل للقيمة في السوق بحيث أنها أولا تبيع وتشتري أصول رقمية (ثم يتطور الأمر لأصول عادية) حتى يحدث شبه استقرار للعملة ثم نفيق على سوق عالمي جديد الأصل فيه لا قمح ولا ذهب ولا عملة صعبة وإنما الذهب الجديد وهو "البيانات والأصول الرقمية"
جاري تحميل الاقتراحات...