رتبها

مغامرتى من يومين كانت لمنطقة هرم سيلا الاثرية واحدة من المناطق الاثرية القديمة فى محافظة الفيوم مش بس كدا دى من اكثر المناطق المثيرة للدهشة و الحيرة!
هرم سيلا يقع على قمة جبل الروس بارتفاع ١٥٠ متر فوق مستوى سطح البحر وهو موجود فى الجانب الشمالى الشرقى لمدينة #الفيوم.

كان معروف وسط الاهالى قديماً بأسم القلعة، ولكن ماهية البناء حيرت علماء الاثار ودا اتضح مع اعمال الحفائر اللى تمت اواخر القرن التاسع عشر. بعض علماء الاثار زى عالم الاثار الانجليزى بترى اعتقد ان البناء عبارة عن مصطبة (مقبرة) تؤرخ للاسرة الثانية عشرة - الدولة الوسطى والبعض الاخر...

اعتقد انه مجرد هرم مدرج يعود للاسرة الثالثة او الخامسة - الدولة القديمة. ومن وقتها والهرم كان يتعرض لأعمال سرقة ونهب خصوصا فى الناحية الشمالية منه ومنتصف جسم الهرم نفسه.
اعمال الحفائر الحقيقية ابتدت سنة ١٩٨٧ لما جامعة بريجهام يونج ارسلت بعثة لاستكشاف وعمل مسح اثرى للهرم.

وجبانة فج الجاموس الموجودة فى سفح الهرم ودا تحت اشراف عالم الاثار ولفريد جريجس وعالم الاثار المصرى نبيل سويلم.

البعثة حققت اكتشافات مثيرة للاهتمام زى اكتشافهم لوحة حجرية منقوش عليها الاسم الحورى للملك سنفرو والكشف دا كان مهم جدا لانه اخيرا تم تحديد تاريخ بناء الهرم الى عصر الملك سنفرو - مؤسس الاسرة الرابعة ووالد الملك خوفو صاحب الهرم الاكبر فى هضبة الجيزة ....يعنى الهرم عمره 4600 سنة!

الهرم صغير ومصمت لا يحتوى على غرفة دفن وارتفاعه يقدر بحوالى ٥-٦ امتار وهو ضمن مجموعة خمسة اهرامات صغيرة منتشرة فى ارجاء مصر ومنها هرمنا دا فى سيلا - الفيوم اللى يُعتقد انه كان بيتم عنده ممارسة طقوس الغرض منهم احياء ذكرى الملك سنفرو. #الفيوم

الهرم غير مفتوح للزيارة والوصول للهرم صعب وغير مناسب لكبار السن لان الهرم مختفى فوق قمة جبل الروس ومافيش علامات ارشادية.
الوصول للهرم فعلا يعتبر مغامرة جميلة فى حد ذاتها وماتتفوتش بداية من تسلق الجبل والمشى على الرمال الى الاطلالة الرائعة على منخفض #الفيوم و ترعة بحر وهبى.