تاجر العملة ما بوقفك صفوف و ما بقول ليك السستم طاشي و لا بقفل الساعة ٢ ظهراً ده غير اهم ميزة انو عندو فروع/مناديب بره البلد و خصوصاً دول الخليج مع ميزة استلام فوري داخل السودان من دون اجراءات بيروقراطية و البتعامل معاك و بعرفك ممكن يحول ليك قروشك الان و يستلم منك في وقت تاني..

بعيداً عن الكلام الاقتصادي البحت و احتياطي دولار و مدى وفرتو و غيرو من الحسابات العلمية، ممكن الحاجات الفوق دي تكون سبب في فشل تعويم الجنيه و خصوصاً في البدايات، بعد ده شغل تنافس و خدمة عملاء..

يعني بس اتخيل انو حاجة زي انو تاجر العملة بشتغل طول ايام الاسبوع و في العطل الرسمية دي ممكن تفرق قدر شنو و في تاجر عملة في كل منطقة ده زي انو يكون متوفر ليك فرع بنك او صرافة جمبك..

ده غير انو في حاجة مهمة انو طريقة/مرونة تحديث السعر اليومي للصرف من البنوك ممكن تفرق شديد، اذا البنك بعلن عن سعر الصباح مثلاً، ممكن اثناء اليوم تجار العملة عندهم امكانية منافسة و تغيير سعر بمرونة طول اليوم خصوصاً انو اغلبهم عندهم قنوات مباشرة مع العملاء بتاعنو..