انا عندي اجابة حلوة تشرح التفاضل والتكامل ده الموضوع رياضيات بشكل بحت، الموضوع بدأ في التفاضل ان كان في مشكلتين أول مشكلة كانت مشكلة المساحة، وتاني مشكلة كانت مشكلة خط المماس وهشرحهم بشكل مبسط على قد ما اقدر ومافيش رياضة في الكلام مع انه بالرياضة امتع بصراحة
المهم مشكلة المساحة ديه بدأت من أيام الاغريق، الاغريق كانوا معلمين في حساب الاشكال الهندسية المضلعة، ازاي بقى؟ عن طريق انهم يقسموا الشكل المضلع لمثلثات وبعد كده يحسبوا مساحات المثلثات ويجمعوها وVoila! اديه مساحة الشكل ، المشكلة بقى بدأت في حساب الأشكال الدائرية، وطلعت مسألة عسيرة
جدا بالنسبة لهم فكان محاولة بطريقة اسمها Exhaustion method وهي كانت بانهم يزودوا اضلاع الشكل على قد ما يقدروا لغاية ويزودوا المثلثات ونظريا لو عدد الأضلاع وصل الى ما لا نهاية هيجيبوا مساحة الدايرة زي ما في الصورة كده كل ما بيزود عدد الاضلاع هيوصل لمساحة الدايرة، المهم وصلوا بشكل
يقرب للقانون الحقيقي، المهم التفاضل خاد نفس الفكرة ديه بشكل مختلف وأسس بقى علم التكامل، وده تخصصه انه يحل مشكلة المساحة، بتستخدم التكامل في ايه حساب مساحة الأشكال الهندسة غير المنتظمة، الأحجام للأجسام المجسمة أطوال الخطوط، الكتلة ومركز ثقل الجسم، القوى اللي بتأثر على سد بيخزن
المياة،حساب وقود قد ايه محتاجة الصاروخ عشان يهرب من عجلة الجاذبية وده الرياضيات بس، غير حاجة زي الكهرباء مثلا اللي قايمة على التكامل
المشكلة التانية كانت مشكلة خط المماس ، وهي الفكرة ان انت تدور على معادلة الخط المماس للدالة وبيتقاطع معاها في نقطة، من المعادلة ديه واستخدام النهاية، بقينا نعرف نحسب معدل التغير لأي دالة، ومعدل التغير ده لما تحسبه في دالة لتطبيق معين في سياق خاص بيها بيبقى ليها دلالات
ومن هنا بسبب القدرة علي حل مشكلة المماس قدرنا نحسب معدل التغير لأي دالة ،ومنه نشأ علم التفاضل او اشتقاق الدالة، وده نقدر نستخدمه في حساب سرعة ومعدل تسارع اي جسم متحرك في اللحظة اللي انت عايزة، بقينا نعرف معدل تغير التفاعلات الكيميائية، الديناميكا والكهرباء قايمين على التفاضل
المهم الليلة ديه كلها يعني ما اتحلتش الا لما عرفنا نربط ما بين مشكلة المساحة وخط المماس اللي منها نيوتن ولايبنيتز عملوا حاجة من أعظم الحاجات اللي انتجها العقل البشري وهي نظرية التفاضل الأساسية وهي ان التفاضل والتكامل هما عكس بعض يعني التفاضل عكس التكامل والعكس صحيح
المهم نيوتن قدر بالنظرية ديه يأسس الميكانيكا ويكتشف الجاذبية والقوانين اللي بتحكم حركة الكواكب، فشوف حل لمشكلتين زي دول قدروا يعملوا ثورة تغير البشرية وكل حاجة في حياتنا وتوصلنا للتقدم العظيم ده
جاري تحميل الاقتراحات...