رتبها

ازاي تحافظ على صحتك النفسية ؟
—
شوف الـ Thread

١- أهم عامل بيأثر على سرعة الحفاظ على الصحة النفسيه ، هو التأقلم و التكيف ، و دي مهارة بتتولد بيها أو ممكن تكتسبها مع الوقت و تراكم الخبرات و المواقف ، أهم ميزه من مميزات التأقلم و التكيف هو انك هتتجاوز اي حاجة وحشة تحصلك بسرعه

- التأقلم و التكيف هو إنك تلاقي شخص حد عزيز عليه توفى مثلاً و تلاقيه يقعد سنة / سنتين مش قادر يتجاوز ده و بالتالي نفسيته هتكون تحت الصفر ، و فيه شخص تاني حد عزيز عليه يموت و تلاقيه تجاوز الامر بعد اسبوع و عاش حياته الطبيعيه ، و قيس ده على اي حاجة في الحياة

- كل ما كان قدرتك على التكيف اسرع و اكبر ، هتقدر تتعامل مع الواقع اللي قدامك بصوره كويسه ، و بالتالي نفسيتك هتكون كويسه ، لأنك متقبل الوضع الجديد ، لكن كل ما كانت قدرتك على التكيف اقل هتكون مش متقبل الوضع و بالتالي نفسيتك هتكون زفت

- أهم سبب بيأثر على سرعه التكيف ، هو الإدراك ، انك تدرك الحقايق اللي قدامك و ان دي الحياة ، تدرك حقيقة الموت ، تدرك حقيقة المشاكل ، تدرك حقيقة الظروف ، تدرك حقيقة ان احوالك متغيرة ، تدرك ان مفيش حاجة ثابته ، تدرك إنها الدنيا ، تدرك ان الحياه غير عادلة

- الادراك هو العامل الأهم في انك تتقبل كل اللي بيحصلك ، و لما تتقبل اللي بيحصلك و تكون راضي ، هتقدر تتكيف مع اللي بيحصلك ، و لو تكيفت بسرعه على اللي بيحصلك هتكون نفسيتك احسن

٢- بلاش تكتم مشاعرك - عبر عن مشاعرك : من الغلط الشائع المنتشر بيننا هو اننا بنكتم مشاعرنا ، فمثلاً لما نكون متضايقين بنروح ننام و نكتم مشاعرنا جوانا ، و ده اكتر حاجة غلط ممكن تعملها ، لأن اللي بتكتمه و مش بتخرجه بيتراكم عليك

- من أهم أسباب التراكمات و الضغط العصبي ، هي الكتمان و كبت المشاعر ، و دي للأسف ثقافة غلط في الوطن العربي إتربينا عليها ، إتعلمنا ان عيب الراجل يعيط ! و إنك لازم تبان قوي حتي لو كانت القوة دي مجرد تمثيل ، الطبيعي بعد ده كله يظهر التراكمات الكبيرة اللي جوانا في سننا الصغير

- الأسوء إن التراكمات دي بتدور في حلقة مفرغة مش بتخلص ، فتلاقي ناس كتير بتطلع التراكمات اللي جواها دي و تأذي بيها ناس تانية ، فيتكون عندهم تراكمات يطلعوها علي ناس غيرهم ، المشكلة انهم بيفرغوا اللي جواهم من غير ما يعرفوا إنهم بيأذوا غيرهم

- الناس نوعين في تحملهم للضغط العصبي :
—
١- بيتحمل الضغط العصبي و تتراكم جواه المشاعر السلبية علي هيئة مشاكل نفسية زي العصبية
٢- مبيقدرش يتحمل الضغط و تتراكم المشاعر جواه و تظهر علي هيئة مرض عضوي ، تشنجات ، إغماءات ..

- ردود الفعل المبالغ فيها الناتجة عن التراكمات هي بتحصل بسبب إن عقلك الباطن هو اللي بيتحكم فيك ، بمعني إن لما يحصل موقف يستفز التراكمات اللي جواك بتظهر علي رد فعل مبالغ عن الموقف اللي تستحقه ، هنا عقلك الباطن هو اللي بياخد رد الفعل ده بدون ما تكون واعي

- ازاي تعبر عن مشاعرك ؟
—
١- ده فيديو في السويد للناس بتصرخ كل يوم بليل عشان يخرجوا الكبت اللي جواهم ، ده مش حل مناسب في مصر ، الحل المناسب في مصر زيه هو انك تكلم نفسك

٢- اكتب في نوته او كشكول كل مشاعرك و اللي بتحسه سواء سلبي او ايجابي ، عن تجربه دي بتريح جداً ، لانك بتقدر بعدين تحلل مشاعرك ، لانها مشاعرك لما تقولها غير لما تكتبها ، لما تقولها هتنساها او جزء منها فهيكون جزء ناقص في تحليلها

٣- فضفض لحد بتحبه لو عندك حد قريب منك ، الاشخاص القريبين مننا ميزتهم اننا بنصيح لبعض ، و تلاقي حد يهون عليك ، دي حاجة ممكن متكونش موجوده عند الناس كلها لكن تقدر تستبدلها بالكتابه

٤- الصلاة و الدعاء ، لو مش لاقي حد تتكلم معاه اتكلم مع ربنا ، دي تحربه عملها احمد شقيري على المخ و كان تأثير الصلاة عليه انها بتساعد في راحة البال و صفاء الذهن ، اشتكي لربنا و خرج كل اللي جواك له ، لو انت ملحد عندك حل الكتابه كويس برضو هيريحك

٣- حاول تتخلص من القلق : طبعاً الموضوع ده صعب و مش بالكلام ، التخلص من القلق حاجة بنعاني منها كلنا و مش سهل تتخلص منها او تقلل منها ، العلاج بينقسم لنوعين :
١- علاج ادراكي
٢- علاج سلوكي

١- العلاج الادراكي :
—
العلاج الادراكي بيعتمد على تنشيط الوعي جواك و بالتالي وعيك هيتحكم في طريقة تفكيرك و نظرتك للحياه ، و نظرتك لحياتك لما تتغير هتتغير معاها الافعال اللي بتعملها

- في الغالب القلق اللي بتعاني منه بيكون بسبب حاجة من الماضي او في المستقبل ، و ده لان وعيك لسه بيهمل اهم لحظة و هي لحظة الحاضر ، حاول تتعلم من ازمة كورونا انك تعيش اليوم بيومه و انك تركز في دلوقتي و بس ، انت مش ضامن تعيش بكرا

- اعمل اللي عليك و اسعى في كل حاجة بتعملها بكل مجهودك ، و اعرف ان سعيك مش معناه انك توصل ، لكن لما توقف السعي معناه انك مش هتوصل ، اعمل اللي عليك و متركزش في الغيبيات لانها بتاعت ربنا

- توقف عن الانتظار ، اعرف ان الانتظار بيزود القلق ، طول ما انت مستني حاجة تحصل هتكون قلقان و قلقك هيأثر بالسلب على نفسيتك

٢- العلاج السلوكي :
—
- القلق بنسبة ٩٠٪ بيحصل في وقت فراغك ، طول ما انت فاضي مش بتعمل حاجة هتفضل قلقان و دماغك لومؤاخذة هتفشخك ، و عشان تتغلب على القلق ده لازم تشغل نفسك متكونش فاضي ، طول ما انت فاضي دماغك مش هتسكت

١- ممارسة الرياضه : الرياضه عموماً بتساعدك تفرز هرمون السعادة و بتقلل من التوتر و القلق ، في غلطه كبيره بتحصل اثناء ممارسه الرياضه ان الناس بتسمع اغاني و تلاقي دماغها شغاله ، الاغاني مش هتساعدك تفصل لانك مش بتركز فيها انت حافظها اصلا

- دور على حاجة تركز فيها و انت بتمارس الرياضة ، اسمع بودكاست بدل الاغاني ، عندك البودكاست مجالاته كتير ، الكلام هيساعدك تركز فيه ، و ده هيديك كريديت كمان انك تنسى الالم اللي هتسببه الرياضه و دماغك هتفصل

٢- التنفس العميق
——
ده أهم تمرين ، لازم تعمله في يومك عموماً حتي لو مش قلقان ، لأنه بيخليك Relax و بيشيل الـ Tension اللي جواك
١- غمض عينك
٢- خد نفس عميق بحيث إن الرئة تكون علي أخرها
٣- خرج النفس واحدة واحدة بالراحة
٤- كررها أكتر من مرة

٣- ظبط نظامك الغذائي - امشي على دايت معين ، مش دايت تخس، لكن لما نظامك الغذائي يكون بايظ هيأثر عليك و هتكون قلقان ، مثلاً حاول تقلل من المنبهات زي الشاي و القهوه ، كل في مواعيد منتظمة ، متسهرش ، لان ده بياثر على هرومناتك
اتكلمت عن الموضوع في الفيديو ده youtu.be

٤- رابع عامل في الحفاظ على الصحة النفسيه هو انك تنظم علاقاتك مع الناس ، انك تحط حدود للناس اللي حواليك ، طول ما انت حاطط حدود هتقدر تحمي نفسك من ان الناس تأثر عليك و على نفسيتك

- ابعد عن الناس التوكسيك ، شوف مين بيأذيك و يخلي مزاجك وحش و نفسيتك زفت و ابعد عنه ، العلاقات التوكسيك هتخلص طاقتك و في النهايه لو كملت هيكون مصيرها انك هتبعد برضو بس طاقتك هتخص ، فاحمي نفسك و ابعد من دلوقتي

- ابعد عن الانتهازيين و المستغليين ، متديش فرصه لحد انه يستغلك مهما كنت بتحبه ، متخليش حد يستغلك عشان محتاجك و بعدين يرميك بمجود ما حقق مصلحته

٥- العطاء : العطاء واحد من اكبر الاسباب اللي بتساعدك في تحسين نفسيتك و نظرتك لنفسك ، حاول دايماً كل يوم تدخل الفرحة على قلوب الناس المحيطين بك سواء بالكلام او بالافعال

- حاول تقول للناس اللي بتحبهم انك بتحبهم و تعبر لهم عن امتنانك و تبعت لهم رسايل تفرحهم ، حاول تمارس العمل الخيري لان ده اثره كبير نفسياً ، حاول تشتري حاجات تفرح بيهم الناس اللي حواليك ، لو عندك ولاد ادخل عليهم كل يوم بحاجة بيحبوها ، ده بيسيب اثر كبير في النفس

- حاول تحقق نجاحات صغيره كل يوم ، ابسطها انك ترتب سريرك كل يوم ، لانك لما يكون يومك وحش ابسطها هترجع تلاقي سريرك مترتب فهيسيب جواك اثر كويس ، نجاحاتك الصغيره هي اللي بتهون عليك

٦- ابعد عن الاخبار السيئة ، مشكلة السوشيال ميديا انها خلت العالم كله اوضه و صاله سهل تعرف الاخبار اللي قاره تانيه ، ابعد نفسك عن السوشيال ميديا او ابسطها ابعد نفسك عن الصفحات اللي بتنزل اخبار وحشه لانها هتأثر عليك ، جيلنا انضج كتير من جيل ابهاتنا لكنه اكتر هشاشه نفسيه

٧- دلع نفسك ، حط عندك كل يوم وقت معين انك تدلع نفسك و تعمل فيه الحاجة اللي بتحبها او الحاجات اللي بتحبها حتى لو مزاجك وحش ، لانها بتخرج الكبت اللي جواك ، ده غير انها هتخيلك مستمتع في الاوقات اللي مزاج كويس فيها ، لما تدلع نفسك هتفصل من الحياه و الواقع الصعب

و بس ، و الكلام هيفضل كلام لحد ما يدخل حيز التنفيذ

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة