بين التوقعات و الامنيات
—
شوف الـ Thread
—
شوف الـ Thread
- في حاجة متأصلة في ثقافتنا و هي اننا مبنعرفش نفرق بين التوقعات و الامنيات ، مثال على ده : ماتش الأهلي و بايرن ميونخ ، لو جيت سألت حد تتوقع الماتش هيخلص كام يقولك الاهلي هيكسب ان شاء الله ، طبعاً ده مش على كله اغلب الناس كانت خايفه 😂
- ماتش بايرن ميونخ مثال حي على الخلط بين التوقعات و الامنيات ، احنا دايماً بنخلط بين الامنيات و التوقعات ، فبالتالي التوقعات بتوصل للسما و بعدين تلبس صدمات زي الفل
- ربنا خلق لكل واحد حواس و عقل عشان يشوف اللي قدامه و يحلله و بعدين ياخد قرار بناءاً على اللي شايفه ، و التوقعات بتيجي من تحليل الواقع اللي قدامك ، الواقع اللي قدامك بيقول ان البايرن اقوى بكتير جداً جدا من الاهلي و ان نسبه فوز البايرن ٩٩٪.
- المشكلة بقا بتيجي ان الامنيات دايماً بتتخلط مع التوقعات فبتأثر على القرار اللي بتاخده ، لأن العاطفه لما بتتدخل مع العقل بتإثر على القرار ، لأنها بتخليك تبص من اتجاه واحد بس و بتهمل باقي اللي حواليك
- قيس ماتش الاهلي و بايرن على أي حاجة في حياتك ، مثلاً أنت في علاقه مع شخص بتحبه و عمّال يأذيك ، علاقه توكسيك ١٠٠٪ ، و مع ذلك تقرر تكمل و تتحمل الأذى و كل شويه تلبس صدمات ، أنت شايف قدامك حقيقة انه بيأذيك و إنك تعبان منه ، لكن انت بتتمنى انك متبعدش عنه
- فالأمنية بتاعتك تولد عندك أمل انه هيتغير و يكون كويس فتخلي نسبه الامل اللي هي ١٪ انه يتغير تتحول لـ ٩٩٪ انه هيتغير ، فتاخد قرار انك تكمل بناءاً على ده ، نفس ماتش الاهلي انك بتتمنى الاهلي يكسب مع ان نسبة فوزه ١٪ ، فده يخليك تتوقع انه هيكسب مع انه مخالف للواقع
- او مثلاً تتوقع ان ابنك هيكون دكتور و هيجيب مجموع عالي في الثانويه ، و تهمل كل الحقايق اللي قدامك ، و ان ابنك مستواه مش كويس أو قدراته مش مش بتؤهله انه يكون في المكان ده ، فتتصدم انه جاب مجموع وحش في الثانويه
- عشان تقلل من صدماتك و تكون سعيد في حياتك أكتر ، لازم تكون توقعاتك اقل من الواقع ، و عشان توقعاتك تكون اقل من الواقع من اهم الخطوات اللي تاخدها هي إنك تفصل بين التوقعات و الامنيات ، متخلطش الاتنين ببعض
- دايماً لما تاخد قرار احكم على اللي انت شايفه دلوقتي ، لما تتوقع و تستنى حاجة من حد توقع على اللي انت شايفه قدامك ، اعرف ايه اهمية الحواس اللي ربنا اداهالك و هي انك تشوف و تحلل اللي قدامك
- قلل من العشم بتاعك من الناس اللي حواليك ، اعرف كويس اللي حواليك ، حلل كل الحقايق و المقدمات ، متستناش حاجة من حد انت معاشرتوش ، متحكمش ان اللي قدامك كويس و أنت علاقتك بيه سطحيه و مفيش اي اختبار حصل لعلاقتكم
- قال رجل لعمر بن الخطّاب -رضي الله عنه-: إنّ فلانًا رجل صدق، قال: سافرت معه؟ قال لا، قال: فكانت بينك وبينه خصومة؟ قال لا، قال: فهل ائتمنته على شيء؟ قال لا، قال: فأنت الذي لا علم لك به، أراك رأيته يرفع رأسه ويخفضه في المسجد
- خد قرارتك بناءاً على العقل و التحليل ، ابعد عاطفتك عن قراراتك ، إحنا مشكلتنا اننا شعب عاطفي و ده بيأثر على الشخصية ، افصل بين اللي انت عايزه و بين اللي قدامك ، كل ما عملت كدا هتقلل صدماتك و هتكون سعيد
و بس
جاري تحميل الاقتراحات...