بتشتغل وعندك بيت وعيال ومسئوليات والحياة صعبة وبعدين لقيت نفسك فوق كل ده عايز تدرس حاجة جديدة او دكتوراة مثلا هتحتاج عشرات الساعات على الأقل اسبوعيا عشان تنفذها.. هتجيب منين وقت..طب هل هتقدر توازن بين كل ده؟ يبدو أن الموضوع أشبه بالمستحيل.. تعالوا نشوف ازاي ممكن مايبقاش مستحيل 😁
شكرا لمخ الإنسان أحنا بنقدر نتعامل مع آلاف التحديات المعقدة والمعلومات لو قدرنا نركز على 3 حاجات: تقسيم وتنظيم المطلوب، تحديد الاولويات، والمكافأة. لو بصينا للتقسيم والتنظيم هتلاقي أنك لو كسرت الفيل الكبير ده لحاجات مطلوبة منك صغيرة مترتبة بأولوية الأهمية والوقت هتقدر تحققها..
بس عشان تحققها محتاج مفهوم الـ Timeboxing اللي يخليك تقسم الـ Calendar بتاعتك. الوقت هو أكبر عائق بس في نفس قدرتك على استغلال مهاراتك وعقلك بيعلي كفاءتك. وعشان تعمل ده لازم تثبت عامل الوقت التزاما لنفسك وتعلي من كفاءتك في استغلالة فكأنك تخلق زمن أكبر في نفس الحصة من الوقت.
عشان تقدر تعلي كفاءتك لازم ماتعتمدش فقط على ذاكرتك، لازم تهتم بتدوين افكارك وتكتب كل النقاط اللي تفكرك باللي انت عايز تعمله وتسترجع بيها الذاكرة. حاول تستخدم أدوات تميكن أي حاجة بتعملها (زي Auto reply emails مثلا أو دفع فواتيرك بشكل اوتوماتيكي) lifehacker.com
خلق روتين يومي لحياتك معتمد على المفاهيم ده في الأول مش بالضرورة يخليك تنفذ كل حاجة 100% بس الهدف مش أنك تحقق كل حاجة 100% دلوقتي، الهدف أنك تحقق الـ 100% على مدار الوقت. وأخيرا كافئ نفسك واللي حواليك، شارك اللي حواليك في ايمانك بتحقيق هدفك وكافئهم على مساعدتك.
وذكر نفسك دايما بشغفك وحبك للطريق اللي انت فيه وإيمانك بيه، أنت بتثبت لنفسك أولا قبل أي حد قدرتك على تحقيق اللي انت شايف انك تستحقه لنفسك. ونصيحة أخيرة حافظ على سلامة جسمك ودماغك لأن هو ده أغلى حاجة بتقدر تعمل بيها كل حاجة.
جاري تحميل الاقتراحات...