سيدنا أبو هريرة كان بيصرخ في المسجد.. والناس كانوا قايلين عندو صرعة وهم ماعارفين إنو عزة نفسو مابتخليهو يقول إنو بصرخ من الجوع، ومافي زول كان بحس بيهو ويأكلو هو وأمو غير واحد بس.. هو النبي صل الله عليه وسلم...
في مرة الصحابة كانوا معزومين عند صحابي جا العزومة واحد فقير ومافي زول قدم ليهو دعوة، كان جسمو فيهو جدري وهدومو مقطعة الصحابة خافوا منو عشان ماينقل ليهم العدوة، مافي غير واحد إتزحزح وقعدو جمبو وأكل معاه في نفس الصحن، وخلاهو يطلع منهم مجبور الخاطر..كان النبي صل الله عليه وسلم...
ماكان في زول بحب انو زوجتو تلد ليهو بنات.. مفتكرين إنو البجيب بنات ده عار عليهو وانو البنات بجيبوا النحس.. جاهم النبي وقال ليهم: إنو البخلف 3 بنات ويعلمهم ويعرس ليهم ويرحمهم بدخل الجنة, واحد من الناس قال ليهو: انا عندي 2 بس! رد النبي: ابو البنتين يدخل الجنة...
التالت رد وهو زعلان: انا ماعندي غير بنت واحدة..! يبتسم النبي ويقول: أبو البنت من أهل الجنة، ويغير مفاهيم الناس اجتماعية عن خلفة البنات ويخليهم يتنافسوا ببناتهم لأن بالنسبة ليهم بقت أسهل وأقرب طريق لدخول الجنة...
من حنانو.. زوجته صفية كانت قصيرة شدييد، فقعدوا ليها الناقة في الأرض عشان تقدر تطلع وبرضو ماقدرت تطلع.. فقام النبي صل الله عليه وسلم جلس ليها في الأرض وقال ليها اقيفي عليي واطلعي، وفعلاً طلعت فيهو وركبت الناقه بسهولة...
يتجرح في خدو, وتتكسر أسنانو, والدم بينزل منو زي الحنفية في غزوة أُحد فيقوم يرفع إيدو للسماء. الصحابة يفتكروا ان النبي حايدعي علي الكفار، فيخيب النبي ظنونهم ويدعي للناس الجرحوا بالهداية ويقول: اللهم إهدي قومي فإنهم لا يعلمون، اعذرهم علي جهلهم وإرشدهم للحق يارب"...
الصحابة إصطادوا ليهم فرخة.. لقي النبي الكتاكيت بكوركوا من الزعل علي امهم فيأمر اصحابو يرجعوا الفرخة لأولادها ومايوجعوا قلوبهم عليها.
يموت طير كان بونس طفل يتيم.. يمشي النبي للطفل ويعزيه ويواسيه في الطير، ويصلي ركعتين في بيت الطفل.. ويدعي ربنا يصبر قلبو علي فراق طيره...
يموت طير كان بونس طفل يتيم.. يمشي النبي للطفل ويعزيه ويواسيه في الطير، ويصلي ركعتين في بيت الطفل.. ويدعي ربنا يصبر قلبو علي فراق طيره...
أقول شنو ولا شنو.. عايزين كتب وملفات الدنيا كلها تتفرغ.. وياريت وقتها تكفي لما نملاها بجزء من صفاته وأخلاقه ومواقفه، مهما حاولنا حنكون مقصرين في حقه وتطبيق سُنته.. بس إنت حبيبنا وشفيعنا.. وإنت الربنا رسلك مع سيدنا جبريل وقال ليك: "ولسوف يعطيك ربك فترضي"...
ونحنا عارفين إنك ماحاترضي بأنو واحد مننا يفضل في النار، وحاتشفع لينا وتطلب السماح، وعارفين انك حتعرفنا من صلاتنا عليك لأنك قلت: أنا في روضتي حي، أسمع كل من يصلي عليّ.
صلوات ربي وسلامه عليك ياسيدي وياحبيبي يارسول الله.
صلوات ربي وسلامه عليك ياسيدي وياحبيبي يارسول الله.
جاري تحميل الاقتراحات...