#يلا_ثريد
تحت التغريدة دي وخلال الثريد التالي حأتكلم عن #الجميلة_أومبريا الغارقة في ساحل #بورتسودان
وقصتها شنو ؟
والاسرار الفيها ومنو الغرقها؟
وليه تصنف اجمل سفينة غارقة في العالم؟
الجاب السفينة الايطالية السودان شنو؟
قهوتكم وأرح
#تعرف_على_السودان
#السودان
#sudan
تحت التغريدة دي وخلال الثريد التالي حأتكلم عن #الجميلة_أومبريا الغارقة في ساحل #بورتسودان
وقصتها شنو ؟
والاسرار الفيها ومنو الغرقها؟
وليه تصنف اجمل سفينة غارقة في العالم؟
الجاب السفينة الايطالية السودان شنو؟
قهوتكم وأرح
#تعرف_على_السودان
#السودان
#sudan
أومبريا سفينة كبيرة إنتهى بناءها وأبحرت أول مرة في سنة 1911 م في هامبورغ بألمانيا كسفينة شحن وركاب طولها أكثر من 150 متر وحمولتها 2000 راكب واكتر من 9000 طن من البضائع وكانت تعمل بين الأرجنتين و أوروبا لكن إسمها (باهيا بلانكا ) بعدين إشترتا الحكومة الإيطالية 1935م وسموها Umberia
إيطاليا شغلت السفينة لنقل البضائع والجنود لمستعمراتها في شرق أفريقيا عبر قناة السويس وبتمر بالمياه السودانية دا كان خط سيرها المعتاد لكن الحصل انه في مايو 1940م لما إندلعت الحرب العالمية الثانية إيطاليا كانت لسة محايدة وحملوها بصورة سرية بحمولة تدافع بيها ايطاليا عن مستعمراتا
حمولة أومبريا كانت ضخمة وثمينة جدا في الوقت داك كانت بتحمل 360 ألف قطعة من المتفجرات ما بين المتفجرات من الأنواع 15 كيلو و100كيلو و60 صندوق من الديناميت والصواعق وكمان مواد البناء يعني حملت ما مجموعه 8600 طن من الأسلحة ,3 سيارات فيات لونغا كانت عربات ثمينة
مع الشحنة الضخمة دي والسرية دي عبرت أومبريا متجهة الى ميناء مصوع لأنه أريتريا وقتها كانت مستعمرة إيطالية ومن هناك كانت حتتجه الشحنات إلى مناطق مختلفة في آسيا وكتغطية تم تحميلها 1000 طن من الفحم والماء من ميناء بورسعيد عشان يخدعوا الحلفاء بأنها سفينة شحن عادية
بريطانيا كانت تسيطر على قناة السويس وأخرت اومبريا 3 ايام عشان يتأكدو من الشحنة بتاعتا وكانت في معلومات نه إيطاليا قربت تدخل في الحرب بس هي لسة محايدة عشان كدة كان من حقها تحمل أسلحة لمستعمراتها مادام محايدة بعد إنتهت مدة التأخير سمحوا ليهم يعبروا لكن بمرافقة من البحرية الملكية
بعد 3 أيام دخلت أومبريا المياه السودانية وهنا أجبرت تاني من البحرية البريطانية أنو تقيف للتفتيش بحجة التهريب قصاد سواحل بورتسودان ورسلوا ليهم سفينة من البحرية البريطانية فيها 20 ضابط إنجليزي فتشوا السفينة بدقة وما لقوا حاجة و أمروهم انو يقعدوا ويبيتوا الليلة في السفينة
صباح اليوم التالي كان البحار قبطان أومبريا لوينزو مويسان بيسمع في الراديو لموجة أريترية تابعة لإيطاليا في اللحظة ديك أعلن فيها موسيليني دخول إيطاليا الحرب العالمية الثانية ضد الحلفاء وأعلن أنو حتبدأ الضربات ضد الحلفاء بعد منتصف الليل وما في زول غيرو في السفينة سمع الكلام دا
عرف الكابتن انو السفينة الايطالية حتستولى عليها انجلترا و تستخدم حمولتا ضد بلده وأستغل انو حتمر ساعات قبل ما تتعرف الاخبار بصورة رسمية وكان قدامه ساعات بس عشان يتخذ خطوة , كلم الطاقم انهم يحرقوا كل الملفات السرية و انهم يعلنوا الطوارئ بسبب خلل كبير حصل للسفينة
وقام اتنين من الطاقم باستخدام مطرقة ثقيلة بكسر لوحين من الحديد الزهر يسدان مآخذ مياه البحر ، بالإضافة إلى اللوحة المساعدة والباب الحاجز للماء لحجرة حامل عمود المروحة ، مما أدى إلى إنشاء مسارات. قطرها حوالي 19 سم وبدأت الموية تدخل و أبلغوا الساحل انهم حيتأخروا عشان الخلل الطارئ
البريطانيين شافو انو الحاجة دي منطقية وخاصة انهم فكروا انو الخطوة دي حتأخر السفينة كذكاء منهم وشاركوا في عملية الاخلاء وطلعوا قوارب النجاة مع الطاقم الايطالي وامر مويسان المهندسين الايطاليين المعاهو انو يفتحوا بقية الصمامات ويغرقوا السفينة في مكانها وركبوا كلهم في قوارب النجاة
أُغرقت أومبريا عمدا وبكل بطء نزلت الى قاع البحر بكل ما تحمله من حمولة ثمينة بقرار من الربان بتاعها إنقاذا لبلده ولما وصلوا وتم استجواب القبطان والطاقم سألوه الانجليز ليه غرقتها بكل بساطة جاوب (لأنكم اعداءنا!) وبعد التحقيق تم أخذ كل الطاقم الى الهند وقضوا في السجن 4 سنوات.
أومبريا الآن قاعدة في ساحل #بورتسودان على بعد 30 كلم والمميز فيها انها كاملة ما حصل فيها أي تدمير بكامل بضاعتها ومتفجراتها وأعتبروها هواة السفن أجمل سفينة غارقة في العالم لأنها محتفظة بكامل جسم السفينة ودا شي نادر والشعاب المرجانية بنت فيها وأدتها جمال اضافي
أكتر الناس البيجوا يزوروا أومبريا بيكونوا من السياح الإيطاليين لأنهم بيعتبروها رمز بطولي وطني بالإضافة لمحبي الغطس لأن الكائنات البحرية والشعاب المرجانية وصفاء الموية في المنطقة دي كلها عوامل جذب مهمة ونادرة
الغواصين يقدروا يشوفوا البضائع الكانت بتحملها أومبريا والشعاب المرجانية بانية فيها بس الشئ الغريب أنه المواقع الإيطالية بتحذر دايما من عدم اللمس أثناء الغوص داخل أومبريا لأنه كمية المتفجرات الفيها كافية أنها تدمر بورتسودان إذا انفجرت القنابل وصواعقها ما عارفة هل دا صح او خطأ
في ختام الثريد دي مشاهد من تجربة غطس داخل أومبريا كلمة روعة شوية عليها كأنها حلم جميل موجودة في بلدنا #السودان الجميل
#انتهى_الثريد
#انتهى_الثريد
جاري تحميل الاقتراحات...