شغال على اللابتوب حسيت فجأة كأنه بطيء، حرارته بتعلى، بيطلع Errors كتيرة، في برامج مش شغالة، تحسه كده تركيزة مش زي الأول، فقد حاسة فهم الأوامر اللي بتديهاله وراح كاحح رسالة Blue Screen وتوقف عن العمل. اللابتوب محتاج تكشف عليه لأن ممكن يبقا في فيروس! طب منين؟ تعالوا نشرح القصة دي
برامج الكمبيوتر زي أعضاء جسمك، كل برنامج بيعمل مهمة معينة بناءا على الأوامر متكونة من Code عاملة زي الDNA بتاع الخلايا. فيروس الكمبيوتر مشابه جدا لفيروس الإنسان في أنه برنامج لا عايش ولا ميت،لحد ما يصيب برنامج يغير أوامره ويبتدي ينسخ نفسه على باقي البرامج فيغير عملها ويرهق الجهاز
أي فيروس هو جزء من مجموعة برامج اسمها Malware يعني أي برنامج هدفه يغير من عمل جهازك ويخليه يا إما يدمر ملفاتك يا يتجسس على ملفاتك، يا يسيطر على جهازك ويخليه ينفذ اوامر اللي هجم عليه. وزي الإنسان ما بيصيبه الفيروس من الجو أو بينتقل من إنسان لآخر، نفس الكلام في الكمبيوتر، طب ازاي؟
لو الإنسان بيختلط ببشر حواليه كتير عن طريق وجوده في اماكن نسبة الاصابة فيها عالية، فأنت بمجرد ما تتوصل بالانترنت بالـ Browser أو بالـ Apps انت في الشارع بتختلط بالشبكات المختلفة بيجيلك إيميلات، بتتكلم على واتساب، بتتبادل ملفات بتعملها Download. كله ده بيعرضك للإصابة.
الانترنت شوارع وحواري ومناطق مشبوهة لو زرت مكان موبوء (يعني دخلت على موقع ماتعرفوش أو مش متأمن)، لو واحد صاحبك عنده فيروس بعتلك إيميل أو رسالة، لو لا قدر الله في حد عايز يسرق بياناتك ويطالبك بدفع فديةولا واحد مريض عايز يستغلك، كل دي حاجات ممكن تصيبك وتخليك تصيب اللي حواليك.
واذا كان الإنسان قاعد في بيته وحاطط فلوسه في بنك بيحافظ عليه، فأنت معظم بياناتك (زي فلوسك) محطوطة الأيام دي على ال Cloud اللي هي سحابة من "مراكز البيانات Data Centers" بتتعامل من خلالها وفيها بياناتك، مع الفرق أن لو البنك اتسرق ملزم بفلوسك أنما لو بياناتك اتسرقت محدش هيعملك حاجة
طب ازاي تأمن نفسك؟ أولا: لازم يبقا عندك Antivirus زي الـ Vaccine كده دي برامج فيها Virus Definition File يعني ملف فيه الـ Code اللي بنعرف بيه الفيروسات المختلفة ولازم يبقا updated عشان فيروسات الكمبيوتر عددهم يقارب المليار وفي سنة واحدة بيحصل 7 مليار هجوم
الحاجة التانية لازم تلّبس الكمبيوتر بتاعك Mask وده اسمه بلغة الكمبيوتر Firewall وده برنامج وظيفته أنه يحميك من اي محاولات لاختراق جهازك. طب هل Firewall فعاليته 100%؟الموضوع محتاج معاة انك تتبع اجراءات السلامة وأساسها أنك ماتفتحش "لينكات" ماتعرفهاش وتاخد حذرك في التعامل مع الغرباء
الحاجة الثالثة: دايما تبص على أي App تنزله وتشوف ايه الـ App Permissions اللي ليه على جهازك، لو في App غريب عنك بياخد Access على حاجة ملهاش علاقة بالهدف من شغله يبقا في حاجة مش طبيعية. ولازم يبقا عندك Backup من بياناتك دايما ويا ريت لو ماتحتفظش ببيانات شخصية كتير على جهازك اصلا
مؤخرا ظهر ما يسمى بالـ Zero Click Attacks وده نوع من الهجوم بيحصل من غير ما أنت واخد بالك تماما من خلال ايميل أو صورة أو من خلال App ممكن من وراك يبقا قدر يتحكم في جهازك ويسرق البيانات ويخترق خصوصيتك.
itgovernanceusa.com
itgovernanceusa.com
وعلى ما يبدو فالالتزام بنصيحة الأم الأصيلة لطفلها بتاعة ماتخدش حاجة من حد ماتعرفوش يا حبيبي، واوعى تخلي حد يشممك حاجة، ولا حد يسألك انت ساكن فين وبابا مين، هي نفس النصائح اللي محتاج تتبعها وانت بتتعامل مع جهازك والانترنت. اتمنى أكون بسطلكم الموضوع وربنا يبعد عننا وعنكم المرض😄
جاري تحميل الاقتراحات...