سجن ١٨ يوم او غرامة ؟ قصة لأحد رحلاتي إلى سويسرا كيف وليش وصلت للمرحلة هذي ؟ #ثريد
انا من الناس اللي حبيت وتعلقت في سويسرا لدرجة انها تكون مجدولة بشكل سنوي في كل صيف حتى لو ماكانت وجهتي الرئيسية لذلك صرت أعرف كثير من تفاصيلها ويهمني ف الموضوع هذا تفاصيل المخالفات والغرامات المرورية
كنت ملتزم جدا في كل رحلة والحمدلله كان لوظيفتي في #ارامكو دور كبير في تهذيبي مروريا والتزامي بموضوع السلامة المرورية الشاهد من الموضوع في احد الرحلات استأجرت مرسيدس
المرسيدس من الراحة اللي تعيشها وانت تسوقها ومن جمال المناظر الطبيعية اللي تشوفها تنسى موضوع كم جالس تمشي وهل انت تجاوزت حد السرعة ام لا
والحمدلله مشت الأمور ووصلت #انترلاكن بالسلامة بس قلبي كان ناغزني وكنت انتظر رسالة توصلني ع الجوال او الايميل تنبهني بحصولي على مخالفة مرورية بس الشيء هذا ماحصل
انتظرت يومين وثلاثة ولاوصلني شيء وحتى يوم سلمت السيارة في المطار سألت المكتب اذا علي مخالفات او لا قالو حتى الآن ماوصلنا شيء المهم اني رجعت للسعودية وبين فترة واخرى اشوف الايميل والفيزا اذا خصمو منها شيء او لا
الكلام هذا كان في عام ٢٠١٤ ومشت الامور على وضعها يعني ضمنت انو مافيه ولا مخالفة تم تسجيلها علي في #سويسرا الشاهد من الموضوع رجعت سافرت في عام ٢٠١٧ بس اللي اختلف المرة هذي ان وصولي كان على مطار جنيف بشكل مباشر
يوم وصلنا بالسلامة وعند تختيم الجوازات قالت لي الموظفة انتظر طبعا تؤشر لي بيدها ماكانت تتكلم انجليزي بطلاقة جلست اسألها وش المشكلة توقعت عندي مشكلة في التأشيرة جلست تكرر علي حركة اليد يعني انتظر
انتظرنا حوالي ربع ساعة لدرجة ان كل ركاب الطيارة اللي كنت فيها ختمو جوازاتهم بالكامل الا انا وزوجتي فجأة بدون سابق انذار جابو لنا ٣ من افراد شرطة المطار وكل واحد رشاشه معه هههههههههههههههههههه ماتتخيلون كمية الرعب اللي دخلتنا وقتها واللي هبلني زيادة قالو تعال انت لحالك 🙂💔
قلت طيب وزوجتي مو المفروض تجي معي ليش تجلس لحالها قالو المشكلة فيك انت تعال وخلها تجلس في صالة الانتظار المهم اخذوني والله م أبالغ ان واحد على يميني وواحد يساري وواحد في الخلف وحاطيني بالنص بينهم
دخلوني في غرفة وقالو انتظر هنا وهذا اللي ذبحني لاهم علموني وش مشكلتي ولاهم خلوني اجلس مع زوجتي ولاهم جابو لي ضابط يتفاهم معي بعد انتظار حوالي ٤٥ دقيقة دخل علي الضابط وقال
انت عليك مخالفات مرورية قبل ٣ سنين ولاسددتها والنظام عندنا تتدبل المخالفة للحد الاعلى في حال ماسددتها قلت طيب متى المخالفات صارت وعلى اي سيارة وايش تفاصيلها قال ماعندنا اي معلومة عن تفاصيلها اللي علينا تجينا الأسامي ونمنعها من دخول #سويسرا لين يتم حل المشكلة
قلت طيب وش المطلوب مني الآن قال راح يتم حجزك لمدة ١٨ يوم وبعد ماتكمل العقوبة تسدد المخالفات بدون تدبيل او عندك خيار ثاني تسدد كامل المبلغ بالحد الأعلى الان وتطلع بدون حجز
عاد انا رحلتي كلها ١٤ يوم والحجز ١٨ يوم ههههههههههه غير حجوزات الفنادق والسيارة اللي راح اخسرها في حال اني طلبت حجز ورفع اعتراض على المخالفات اللي مكاني مستحيل يفكر او يشغل مخه من كمية الصدمة اللي شفتها والرعب اللي عشته
انا جاي لسويسرا ابي اغير جو ابي سعة صدر صعبه اتقبل اللي صار لي ف المطار وصعب اني اقبل بحجزي وارفع اعتراض لذلك اضطريت لسداد المبلغ وللأسف كان المبلغ كبير وأثر على ميزانية السفر بس الحمدلله ربي عوضنا برحلة كانت من اجمل رحلاتي ل #سويسرا
الشاهد من الموضوع أخذتها قاعدة وأنصح الجميع بها خلك جاهز لأي ظرف أو مشكلة تواجها في السفر وخل عندك مبلغ جانبي احتياطي ممكن تحتاجه في اي وقت آسف على الإطالة سالفة وحبيت اسولفها عليكم 😁❤️
@v8v880 كثير مرة
جاري تحميل الاقتراحات...