رتبها

ثريد| قصتي مع أول مشاريعي، ونقول ياربي ياكريم ان تجعله مشروع ناجح
يبغالكم كوب قهوة محترم ، لان الموضوع مطول شوي 😂🙏🏻

أولاً أنا عبدالله الحربي شاب سعودي طموح وعنده امنيات مثلي مثل كثرين من شباب جيلي،تخرجت من الجامعة وحاولت ألتحق ببرنامج الابتعاث،وبعد ثلاث محاولات ما اكتملت،من ربي علي والتحقت بالبعثة في المحاولة الرابعة،والصورة ادناه التقطت وانا في مطار الملك عبدالعزيز متجه الى🇺🇸لاول مره في حياتي

وعشان ما اطول عليكم،وانتقل للفصل التالي، رجعت لسعودية بعد كفاح ونضال استمر لمدة18شهر في دراسة اللغة،بدأت من المرحله اللي قبل الصفر،مرحلة ذس وذس ونوو ويس،وقدرت احصل على قبول نهائي في جامعة في جامعة CWRU لادرس ماجستير القانون الدولي التجاري،الصورة التقطت من المعهد بعد العودة للوطن

شكلي قاعد احكي قصة عمري😂😂
بحاول اختصر لكم بالضبط واش صار بعد رجعت والى الان،
دخلت في مشروع تطوير مزرعة الفراولة في مكة انا ومعايا شباب، وجات كورونا وخسرنا مع بعض قربة 60 ألف

كنا ناخذ الدخل اللي يجينا ونطور زيادة،يعني بالعربي،مامعنا شي في جيوبنا واللي كسبناه رجعنا نصبه في المشرع،على امل انه باقي ايام المشروع نحاول نكسب،ولكن قدر الله وماشاء فعل ودخلت علينا كورونا لما صرنا اخيراً جاهزين وبعد عمل استمر شهرين يومياً وبايدينا
الفديو للموقع بعد جهزناه

عشان بس اوضح احنا انا واللي معاي كنا مسؤولين عن تهيأت المكان بالكامل في مزرعة الفراولة والتابعة لدكتور عبدالعزيز الأنصاري، المهم جات كورونا وجا الحضر معناه ماعاد فيه احدد يقدر يحضر باقي الموسم وصارت الخسارة ، وما قلنا الا الحمد لله لعلها خيرة🤲🏼😇.

فتحت الدولة الحضر ، وقرر اخوكم يتزوج ولا كان في جيبي حرفياً ريال واحد، ولكن ثقتي بالله كبيره الحمد لله، تيسر كل شيء بيت ومهر وحفل زواج في غضون شهرين فقط، وتم الزواج ولله الحمد والشكر❤️🙏🏻

صح اني خرجت مديون بمبلغ كبير شوي ولكن السكون والاستقرار اللي حصلته بعد الزواج كان بستحق كل العناء والضغط اللي عشته قبله وبعده، واسئل الله أن يبارك بيني وبين أم عمر ويحفظنا يارب❤️🙏🏻
طيب مصاريف البيت بعد الزواج 😂😂
لا وظيفة ولا عمل وش الحل،
( على الله ياعبدالله)🤲🏼😇

تذكرت ايوه في اثناء مشروعنا مزرعة الفراولة كنت احاول اسوي لي مشروع مستقل انا ومعاي كم شريك،اشترينا شوية خشب وقلت لهم ابغا اعمل كفي ريفي داخل المزرعة،وانقل بعض الافكار اللي شفتها في 🇺🇸،قصينا الخشب وسوينا الكراسي والطاولات وجات كورونا وقفت كل شي،وصرت انا مقبل على خسارة ثانية💔

حطينا الخشب في حوش وجلس تحت الشمس والغبار والامطار مدة8اشهر،اللي معاي يقولون ها متى نكمل وانا اقولهم لما تجي الدراهم،وفعلياً كنت على وشك خسارة21ألف تضاف لديون اللي علي وخسارة موسم الفراولة،اش عملتي فيا ياكورونا،😂اوه نسيت اخبركم ترى اصبت انا والعروس بكورونا ثاني يوم بعد الزواج😇

الحمد لله طبعاً أولاً واخراً على كل حال، وترى لسع ما بديت هذي كانت بس مقدمات، وانا والله ما ابحث عن تعاطف ولا غيره بالعكس أن طرحت قصتي لناس اليوم عل وعسى تكون ملهمه لاي انسان في راسه طموح ويبحث عن رفعة الراس
المهم نكملل..

اتصل بي الدكتور مالك المزرعة وكلمني انه فيه مستثمر راح يطور المزرعة من الى واذا انا واللي معاي ودنا نشارك ، ممكن تكنون معانا في التنظيم والتسويق، مقابل حصة من ارباح تذاكر الدخول، طبعاً وافقت انا مباشرة ومن هنا بدأ التحدي الجديد😉

جلست مع المستثمر السيد حسام الرفاعي ومع الدكتور عبدالعزيز وشفت انه لسع ما بدأو في منطقة الجلسات، قلت له( اش رايك انا اجيب الجلسات الخشبية اللي عملتها السنة الماضية واجرر كم بوث على الاسر المنتجة واترزق الله، وافقووا ، وشاكر لهم دعمهم ووقفتهم هذي😇🙏🏻

الان جلست مع نفسي، وشفت الشغل اللي قامو فيه في المناطق الثانية من المزرعة وانا جاي على ارض جرداء بحط لي كم خشبة وامشي الحال، وقعدت احاول بشتى الطرق اني اجد حل، الصورة ادناه تبين لكم حجم التحدي ، والمشكلة الحقيقه حرفياً مافي جيبي ريال واحد😂😂

جبت لي كم عامل، وقعدت اقسم مصروفي في البيت بيني وبينهم حتى يمشي الشغل ويقصون لي باقي الخشب،لو معاي ميتين احط مية للبيت ومية اعطيها العمال ولا عشان يكملون لي شغلي، استمريت على هذا للحال قرابة الشهر وانهكت تماماً والمشكلة اني مؤمن في داخلي ان اللي راح اقدمه ماراح يكون شي يبيض الوجه

مع الوقت بدأت اقتنع اني ماشي غلط وحتى فكرة تأجير البوثات ماراح تغطي لي التكلفة ابداً قررت في لحظة وقبل موعد بداية المشروع بشهر، اني اعمل دراسة كاملة لعمل منطقة ريفيه تضم كفي ومطعم،وفعلاً بعد جهزت الدراسة ودخلت معاي شريك عمل مثلي وشرواي في الهجولة😂 وبدانا رحلة البحث عن مستثمرين

ابغاكم تفهمون شي مهم ترى لما بدينا نبحث عن المستثمرين، انا علمت شريكي انه لازم خلال اقل من اسبوع يكون المبلغ اللي رصدناه في دراسة الجدوى متوفر، مامعنا وقت وفكرتنا يحتاج لها وقت حتى نقدر ننفذها، المهم الحمد لله من قبل ومن توفر قربة نصف المبلغ خلال اقل من اسبوع
وبدأنا مباشرة العمل

مشكلة المكان اللي راح نبني فيه المشروع انه غير مهيأ (زراعياً) ومافيه اي مقومات البنية التحتية (الكهرباء والماء) ولا حتى مياه جوفيه
•حرثنا الارض وهيئناها لزراعة
• خططناها
• مددنا البنية التحتية، وجبنا خزانات وراويات ماء
• زرعنا المكان
• بنينا كشك الكفي
• واعمال الخشب مستمره

حرفياً كنت انا وشريكي حاتم السالمي ننام ونصحى في الموقع، واثر عوامل التعرية على اجسدنا ووجهينا خير دليل،
وبدأ المكان حبه حبه تبدأ مظاهره تبان

وفجأة بعد ما اشترينا اغراض الخيام ونصبنا وحده منها، جاء المطر قبل اسبوعين وتجمعت المياه في كامل المنطقة وغرقت كل شيء عملناه، وما كنا نقول غير الحمد لله على كل حال😇 وان شاء الله خيره...

حاولنا نصلح المشكلة وجبنا تريلة شفط مياه ، وامتلت كامله ولا شي تغير، قررنا انه نستخدم مواطير الخزانات وحطيناه وسط المياه وفعلاً نجحت الفكرة، كل خوفي كان ان العشب يتطين والرصيف يخرج من مكانه، وجلسنا الى الفجر، والحمد لله قدرنا نلحق

وفعلاً ولله الحمد والمنه ماجاء الليل، الا والماء كامل اختفى، وبقي علينا التنظيف من جديد،

الانجيلة بعد شرب الكمية الكبيرة من الماء استردت عافيتها واشتعلت خضره وهذي من خير ربي ، فيا ربي لك الحمد، وهذا المقطع بعد المطر باربعة ايام 😍😍😍

واستمرينا بالعمل حتى ننجز قبل يوم الافتتاح اللي اتفقنا فيه مع اصحاب المزرعة، وبدأت جماليات المكان تكتمل، ولكن ليقضي الله امراً كان مفعولاً، والحمد لله على كل حال، حصل التماس كهربائي واشتعلت النيران في مخزن وضعت فيه معدات القهوة وجلسات الخيام، لتصبح جميعها رماد
نكمل..

بلغت الخسائر كاملة قرابة ٢٧ الف، والحمد لله على كل حال، هذا الشي حصل قبل الافتتاح بثلاث ايام، ومع ذلك رفضت تاجيل الافتتاح، وحثيت الجميع على الاستمرار على الخطة، الميزانية اللي كنت راصدها لتشغيل والاحتياط، صرفتها لتغطية التلفيات الي صارت

الحمد لله وصلت معاكم لاخر الثريد, وفتحنا الكفي في الوقت المحدد وخلال شهر استطعنا نبني مكان من الصفر وبميزانية محدوده ، ينقصنا الان دعمكم بحضوركم وتشريفكم لنا في الموقع، واتمنى ان كل هالتعب اللي تعبناه يكون محل قبول لديكم

وفي الختام تعبتكم معاي في هالثريد، لكن هي تجربة مريت فيها وحبيت اشاركها معاكم
ودمتم بخير دايماً وابداً😇🙏🏻

#مكة #كفي #مكه_الأن #اسال_مكة #مزرعة_الفراولة #كافيهات_مكة #مقاهى_مكة #تجربة_الريف #النوارية

#مكة #كفي #مكه_الأن #اسال_مكة #مزرعة_الفراولة #كافيهات_مكة #مقاهى_مكة #تجربة_الريف #النوارية
#صباح_Iلخير

#مكة #كفي #مكه_الأن #اسال_مكة #مزرعة_الفراولة #كافيهات_مكة #مقاهى_مكة #تجربة_الريف #النوارية
#كم_مواليدك #عبدالله_الحمدان

@Badr_Alzidane
الله يبيض وجيهكم ويعيننا على الوفا معكم جميعاً وانت يا عيوني يابدر والله ما من كلام يوفيك حقك ووقفتك، ولا اقول غير الله يبيض وجهك وييسر كل خير😇🙏🏻🧡