ترييف الاسكندرية، هو مش مصطلح قائم بذاته للاسكندرية ، لكنه ظهر في التسعينات مع ترييف مدن تانية، لكن تجليه الاعظم كان في الاسكندرية ،المدينة اللي فضلت محافظة علي طراز معماري و طبيعة سكانية مميزة لحد اوائل السبعينات و بعد كده بدأ الانهيار التدريجي
الانهيار بدأ في السبعينات و بالتحديد من كلية طب اسكندرية، مجموعة من الطلبة منهم محمد اسماعيل المقدم و احمد فريد و سعيد عبد العظيم و ياسر البرهامي و غيرهم اسسوا ما يعرف اصطلاحا بالمدرسة السلفية/الدعوة السلفية، طبعا حد هيسألني و يقولي يا كابتن مدحت و ايه دور الدعوة بالترييف
اقوله بص يا عزيزي: الهجرات دايما من الجنوب للشمال و نادرا ما بيحصل العكس، بتوع افريقيا بيطلعوا علي اوروبا، بتةع الصعيد بيروحوا اسكندرية، بس دايما الهجرات دي بتكون مشروطة، بمعني المهاجر ده يا معاه فلوس و يعمل بيزنس و يتماهي مع المدينة او بيدور علي فرصة للتماهي او يفضل علي الهامش
بالتالي الهجرات الفردية مش مؤثرة الا لو كانت هجرات جماعية،و دي محصلتش علي الاقل في اسكندرية السبعينات، الدعوة السلفية بقي بحكم منطقها و غالبية اتباعها من الريف المصري،فتحت باب للهجرة غير مسبوق و كان الطبيعي انهم يتكدسوا في مناطق معينة، كمان كان ليهم نمط مختلف عن سكان المدينة
و النمط ده كان بيحكمه تجارة الضل، اعمال تجارية غير منظمة(الدولة اساسا مؤسساتها كافرة يبقي تاخد ضرايب ليه)، تحديد النسل حرام(زيادة سكانية مرعبة) و بالتالي مباني عشوائية كتير،مع غياب للدولة في تحديث التعليم و الصحة، بقي البديل مؤسسات الدعوة السلفية
بس هل الدعوة السلفية هي المسئولة لوحدها!! الصراحة لا الدولة لعبت دور،بص علي حي العجمي ماسأة متكاملة من ناحية البنية التحتية و شكل العمارات و الشوارع،الهانوفيل، كتل خراسانية، جرب تسأل عن ملاك العمارات القبيحة دي هتلاقيهم من الأرياف(نفس دور الصعايدة في تخريب الهرم و فيصل)
مع زيادة البناء العشوائي و تراجع دور الدولة، اصبح الترييف حتمية مش اختيار، و بالتالي اي افضلية للمدينة(الحلم) بقي مجرد خيال في ذهن سكانها الاصليين اللي بيحاولوا يصدروا فكرة عن مدينة جمالها متداري ورا كتير من مظاهر الترييف اللي من الصعب يتشال، ابراهيم عبد المجيد مثلا مهم هنا
ابراهيم عبد المجيد، كتب عن اسكندرية الاربعينات و الخمسينات و السبعينات ، مرة سجلت معاه لقاء تسجيلي لم يعرض للاسف عن اماكن معينة في الاسكندرية و كنا في 2006 اعتقد، الراجل كان حزين بشكل مرعب عن اللي حصل للمدينة، اللي حصل للاسكندرية حصل في اماكن تانية كتير في مصر
لكنه اكثر وضوحا في الاسكندرية لانها المدينة الاكثر حضورا (احيانا) حتي قبل القاهرة ، بالاضافة ان الترييف فيها واضح و بارز لانها شريط عمراني ضيق علي البحر و بالتالي العشوائية هتظهر بسرعة. الخلاصة الاسكندرية(الحلم) هي حلم بس مبقتش واقع و يوم عن يوم الحلم بيبعد و الواقع بيزداد قبحا
جاري تحميل الاقتراحات...