الملك فاروق كان له مشاكل وتصرفات غلط سياسية وكان ممكن يتحاسب عليها.. ولكن اللي حصل بعد ٥٢ إنه تم تشويهه بحاجات هو كان بريء منها زي إنه كان لا يفيق من الخمر بينما الثابت تاريخيا إنه جرب مرة واحدة في لندن لما كان ولي عهد وكان هناك مع أحمد حسنين باشا ولم يعجبه طعمها ولم يشربها تاني

الملك فؤاد كان شريب كبير لكن دماغه كانت توزن بلدين .. فتشويه فاروق بإنه لا يفيق من الخمر هو اللي ضيع فرصة محاسبته إنه مكانش حاكم قوي وذكي زي أبوه فؤاد مثلا ... وفي النهاية اللي حصل إن الناس لما اكتشفت إن حاجات تم اتهامه بيها طلع منها بريء ، لم تحاسبه على اللي كان غلط فيه بجد..

نفس دة حصل مع مبارك.. بعد الثورة كان فيه برامج تلفزيونية مع سواق الرئيس وطباخ الرئيس وطيار الرئيس وهدفها تشويه مبارك بشكل شخصي.. مع إنه بالفعل عمل جرائم سياسية لازم يتحاسب عليها.. ولكن بعد سنوات بقى الناس شايفة إنه بريء من كل حاجة ونسيوا الحاجات الأهم اللي لازم يتحاسب عليها مبارك

حاليا فيه ناس بتدعي إن صفوت الشريف هو اللي قتل سعاد حسني وبعدين دلوقتي بقى فيه ناس بتدعي إنه قتل عمر خورشيد... وكل دي معلومات مفبركة مع إن صفوت لازم يتحاسب عن تاريخه من الجرائم السياسية ... لكن اللي حيحصل إن بعد فترة الناس حتكتشف إن صفوت مظلوم في اتهامين ويبقى ملاك بجناحين...

كراهية الشخصية السياسية وانتقادها على مشاكلها السياسية حاجة، والفبركة على الشخصية من باب تصفية الحسابات حاجة تانية.
وَلَا يَجْرِمَنَّكُمْ شَنَآنُ قَوْمٍ عَلَىٰ أَلَّا تَعْدِلُوا ۚ اعْدِلُوا هُوَ أَقْرَبُ لِلتَّقْوَىٰ ۖ وَاتَّقُوا اللَّهَ ۚ إِنَّ اللَّهَ خَبِيرٌ بِمَا تَعْمَلُونَ