5 اصحاب عملوا جمعية بـ 5 جنيه. اتفقوا واحد فيهم يلم الفلوس ويسجل في ورقة مين دفع أمتى ومين عليه الدور وكله يمضي. ابن صاحب الورقة شقي لقاها راح واكلها. الأصحاب اتخانقوا على الدور ومين دفع ومين لسة. واحد منهم قالهم كان لازم نعملها Blockchain قالوله مين ده؟ قالهم تعالوا أشرحلكم!
لما واحد يكون عنده كل بيانات معاملات الدفع ومواعيد الجمعية ده خلى الموضوع كله زي Centralized Ledger بمعنى أن كل المعاملات متسجلة مركزيا، لما الورقة دي باظت باظت الثقة. لو كل واحد عنده نسخة من الورقة De-centralized Ledger كانت معاملات الجمعية هتفضل متسجلة عند الكل لو باظت عند طرف.
الـ Blockchain ببساطة هي تكنولوجيا لتسجيل أي معاملات (مالية أو غير مالية) لامركزيا Decentralized و مؤمن Encrypted بحيث كل أطراف أي معاملة يكون عندهم نسخة من كل المعاملات وفي نفس الوقت لو حدث اختراق وتعديل لمعاملات أي طرف مش هيأثر على النزاهة Integrity. طب بتشتغل أزاي؟
كلمة Blockchain متقسمة لـ Block (معاملة) وChain (سلسلة). الـ Block الواحد متسجل فيه تفاصيل المعاملة (مثال: مين دفع لمين وأمتى وكام وكود مؤمن Hash) كلBlock فيه معلومة عن الـ Hash بتاع آخر معاملة فبالترتيب بنعمل سلسلة من المعاملات المؤمنة كل الاطراف عندهم نسخة منها اسمها Blockchain
لما كل الاطراف يبقا عندهم نسخة كاملة من كل المعاملات يبقا أحنا بنثق فقط في المعاملات اللي اتعملها Validation يعني اتأكدنا أن مكانها في السلسلة مظبوط وأن كلنا عندنا نفس النسخة فلو فيه Block متسجل عند حد والتاني لأ تبقا معاملة غلط ومش حقيقية.
أشهر تطبيقات للـBlockchain هي العملة Bitcoin واللي سمحت أننا نشتري ونبيع بعملة مش مرتبطة ببنك مركزي هو اللي مسجل كل المعاملات أنما شبكة Blockchain كل معاملة فيها مؤمنة بكود وكل الاطراف عندها نسخة من قاعدة بيانات كل المعاملات. وبيتم التأكد من صحتها من خلال ما يسموا بالـ Miners
طب هل في استخدمات أخرى للـ Blockchain؟ كتير جدا في كل المجالات ليها استخدامات كتيرة غير التطبيقات المالية. أي تطبيقات فيها مركزية في تسجيل معاملاتها في قواعد بيانات ممكن تتحول للامركزية باستخدام الـ Blockchain. ممكن تفكروا أزاي نعمل مثال الجمعية السابق بالـ Blockchain بعد الشرح😄
جاري تحميل الاقتراحات...